நீங்கள் தேடியது "slug 96604"

அவனியாபுரம்:

மதுரை தெற்குவாசல், அவனியாபுரம், வில்லாபுரம் மற்றும் மாநகரப்பகுதிகளில் மோட்டார் சைக்கிள்கள் திருட்டு, செல்போன்கள் பறிப்பு போன்றவை தொடர் சம்பவங்களாக நடைபெற்று வந்தன.

இது குறித்து வந்த புகார்களின் அடிப்படையில் அதிரடி நடவடிக்கை மேற்கொள்ள போலீஸ் கமி‌ஷனர் டேவிட்சன் தேவாசீர்வாதம் உத்தர விட்டார்.

அதன் பேரில் திருப்பரங்குன்றம் உதவி போலீஸ் கமி‌ஷனர் பீர் முகமது, அவனியாபுரம் குற்றப்பிரிவு இன்ஸ்பெக்டர் முருகன், ஏட்டுகள் முனியாண்டி, ராஜபாண்டி, இளங்கோ, மகாலட்சுமி மற்றும் போலீசார் கொண்ட தனிப்படையினர் தீவிர விசாரணையில் இறங்கினர்.

தனிப்படையினர் மாநகரின் பல பகுதிகளிலும் வாகன சோதனையில் ஈடுபட்டனர். அப்போது, மோட்டார் சைக்கிளில் வந்த ஒரு வாலிபரை நிறுத்தி விசாரித்த போது அவர் முன்னுக்கு பின் முரணாக பேசினார். இதனைத் தொடர்ந்து அந்த வாலிபரை போலீஸ் நிலையம் கொண்டு வந்து விசாரித்தனர்.

அப்போது அவன் செல்போன்-மோட்டார் சைக்கிள் பறிக்கும் கும்பலைச் சேர்ந்தவன் என்பதும், அவனியாபுரம் வெள்ளபிள்ளையார் கோவில் தெருவைச் சேர்ந்த ஆறுமுகம் மகன் சரவணன் (வயது 19) என்பதும் தெரியவந்தது.

இவனுடன் வேறு சிலரும் சேர்ந்து கொண்டு மாநகரின் பல பகுதிகளில் சாலையில் செல்போன் பேசிக் கொண்டு செல்பவர்களிடம் இருந்து செல்போன்களை பறிப்பது, மோட்டார் சைக்கிள்கள் திருடுவது போன்றவற்றில் ஈடுபட்டது போலீசார் விசாரணையில் கண்டுபிடிக்கப்பட்டது.

சரவணன் கொடுத்த தகவலின் பேரில் எம்.எம்.சி. காலனி மருதுபாண்டி மகன் செந்தில்குமார் (19), அவனியாபுரம் அம்மாசி மகன் அஜித்குமார் (19), காளிமுத்து மகன் ஜெயக்குமார் (19), சோலையழகுபுரம் திருநாவுக்கரசு மகன் தினேஷ் (19), ஜீவாநகர் தங்கப்பாண்டி மகன் கார்த்திக் குமார் (19), ஜெய்ஹிந்துபுரம் கணேஷ் மகன் அய்யப்பன் (19) ஆகியோரை போலீசார் கைது செய்தனர்.

கைதானவர்களிடம் இருந்து 6 மோட்டார் சைக்கிள்கள், 13 செல்போன்கள் பறிமுதல் செய்யப்பட்டன. கைதான சரவணன் போலீசாரிடம் கூறுகையில், வீட்டு முன்பு நிறுத்தப்படும் மோட்டார் சைக்கிள்களை திருடி வெளி மாவட்டங்களில் விற்பதும், அங்கு திருடி வரும் மோட்டார் சைக்கிள்களில் மதுரையில் வலம் வருவதும் வாடிக்கை என்றான்.

அப்படி வரும்போது தனியாக யாராவது செல் போனில் பேசிக்செல்வதை கண்டால் அவர்களிடம் இருந்து செல்போனை பறித்துச் சென்று விடுவோம் என்றும் தெரிவித்துள்ளான்.

கைதான 7 பேரும் மதுரையில் எந்தப்பகுதிகளில் கைவரிசை காட்டியுள்ளனர். எத்தனை சம்பவங்களில் அவர்களுக்கு தொடர்பு உள்ளது? என்பது குறித்து போலீசார் தொடர்ந்து விசாரணை நடத்தி வருகின்றனர்.

சென்னை:

சென்னை தி.நகர் ராஜா பிள்ளை கார்டன் பகுதியைச் சேர்ந்தவர் சரவணன். சம்பவத்தன்று இவர் தனது மோட்டார் சைக்கிளில் மின்ட் தெரு பகுதியில் சென்று கொண்டிருந்தார்.

அப்போது மோட்டார் சைக்கிளில் வந்த 3 பேர் அவர் வைத்திருந்த செல்போனை பறித்துக் கொண்டு தப்பிச் சென்றனர். அவர் திருடன் திருடன் என்று கூச்சல் போட்டுக் கொண்டே அவர்களை துரத்தினர். பாரிமுனையில் உள்ள சென்னை மருத்துவ கல்லூரி அருகே சென்றபோது பூக்கடை போலீசார் பொதுமக்கள் உதவியுடன் கொள்ளையர்களை விரட்டினார்கள்.

அப்போது ஒருவன் சென்னை அரசு பொது மருத்துவமனைக்குள் தப்பி ஓடினான். அவனை போலீசார் மடக்கி பிடித்தனர்.

விசாரணையில் அவனது பெயர் சந்தோஷ்குமார் என்றும், புளியந்தோப்பு வ.உ.சி. நகரைச் சேர்ந்தவன் என்பதும் தெரிய வந்தது. அவனிடம் விசாரணை நடத்தியதன் அடிப்படையில் மற்றொரு கொள்ளையனை புளியந்தோப்பு வ.உ.சி. நகரைச் சேர்ந்த அபிமன்யு என்பவனை கைது செய்தனர்

அவர்களிடம் இருந்து 2 செல்போன்கள் பறிமுதல் செய்யப்பட்டன. தப்பி ஓடிய அரவிந்த் என்பவரை பூக்கடை போலீசார் தேடி வருகிறார்கள்.

போரூர் அருகே உள்ள காரம்பாக்கத்தைச் சேர்ந்தவர் கார்த்திகேயன். நேற்று மதியம் அவர் வீட்டின் அருகே உள்ள சாலையில் நடந்து சென்றார். அப்போது மோட்டார்சைக்கிளில் வந்த வாலிபர் கார்த்திகேயனிடம் இருந்த செல்போனை பறித்து தப்பி செல்ல முயன்றான்.

இதனை பார்த்து அதிர்ச்சி அடைந்த அப்பகுதி மக்கள் செல்போன் பறித்த வாலிபரை மடக்கி பிடித்து வளசரவாக்கம் போலீசில் ஒப்படைத்தனர். இன்ஸ்பெக்டர் அமுதா அவனிடம் விசாரணை நடத்தினார்.

அவன் குன்றத்தூர் பெரியார் நகரைச் சேர்ந்த அருண்குமார் என்ற பச்சை என்பதும் ஏற்கனவே பல முறை சிறை சென்றவர் என்பதும் தெரிய வந்தது. ஒரு வழப்பறி வழக்கில் கைதாகி நிபந்தனை ஜாமீனில் வந்த பச்சை குன்றத்தூர் போலீஸ் நிலையத்தில் தினமும் கையெழுத்திட்டு வந்தான்.

அவன் போலீஸ் நிலையத்தில் ஆஜராகி சென்ற போது மீண்டும் வழிப்பறியில் ஈடுபட்டது விசாரணையில் தெரிய வந்துள்ளது. அவனிடமிருந்து கத்தி மற்றும் மோட்டார் சைக்கிளை போலீசார் பறிமுதல் செய்தனர். #Tamilnews

ஈரோடு:

ஈரோடு ரெயில் நிலையத்திலும், ரெயிலில் வரும் பயணிகளிடமும் தொடர்ச்சியாக செல்போன் திருடும் சம்பவங்கள் தொடர்ச்சியாக நடந்து வருகின்றன.

இந்த நிலையில் மீண்டும் ஒரு பயணியிடம் பணம், செல்போன் திருடப்பட்ட சம்பவம் நடந்துள்ளது.

கும்பகோணம் அருகே உள்ள திருப்பனந்தல் பகுதியை சேர்ந்தவர் கவியரசன் (வயது 37). சமையல் மாஸ்டர்.

சம்பவத்தன்று இரவு இவர் கோவையில் இருந்து நெல்லைக்கு செல்லும் ரெயிலில் செல்வதற்காக ஈரோடு ரெயில் நிலையத்துக்கு வந்தார்.

ஆனால் அந்த ரெயிலை அவர் தவறவிட்டார். எனவே மறுநாள் அதிகாலையில் வரும் ரெயிலில் செல்லலாம் என்று நினைத்து ரெயில் நிலையத்தில் தங்கினார்.

அங்கு டிக்கெட் வழங்கப்படும் இடத்தின் அருகே படுத்து தூங்கினார். திடீரென எழுந்து பார்த்தபோது அவர் வைத்திருந்த ரூ. 3700 பணம் மற்றும் செல்போனை காணவில்லை.

கவியரசன் தூங்கியதை சாதகமாக வைத்து அவரிடம் இருந்து யாரோ மர்ம நபர் பணம், செல்போனை திருடியது தெரியவந்தது.

இது குறித்து ரெயில்வே போலீஸ் நிலையத்தில் புகார் செய்யப்பட்டது.போலீசார் வழக்குப்பதிவு செய்து விசாரணை நடத்தி வருகிறார்கள்.

ரெயில் நிலையத்தில் இது போன்று தொடர்ச்சியாக நடைபெறும் திருட்டு சம்பவங்கள் ரெயில் பயணிகளையும், மக்களையும் அச்சத்தில் ஆழ்த்தியுள்ளது.