நீங்கள் தேடியது "தீபாவளி"

குன்னூர்:

நீலகிரி மாவட்டம் குன்னூரில் தீபாவளி பொருட்கள் வாங்க பொதுமக்கள் கூட்டம் அலைமோதி வருகிறது. இதனால் ஜவுளிக்கடை, நகைக்கடைகளில் கூட்டம் அதிகமாக உள்ளது.

இதனால் குன்னூர் சுற்றியுள்ள கிராமப்பகுதிகளில் இருந்து குன்னூர் வரும் பஸ்களில் கூட்ட நெரிசல் அதிகமாக உள்ளது. குறிப்பாக மூப்பர்காடு, கொலக்கம்பை, முள்ளிகூர் உள்ளிட்ட பகுதிகளில் காலை முதல் மாலை வரை பஸ்களில் இடம் பிடிக்க பயணிகள் முண்டியடித்து வருகிறார்கள். இதனால் பஸ்களில் நெரிசல் ஏற்பட்டு வருகிறது.

சம்பவத்தன்று மாலை முள்ளிகூர் செல்லும் பஸ்சில் கூட்டம் அதிகமாக இருந்தது. பயணிகள் துண்டு, கைப்பை உள்ளிட்டவைகளை போட்டு சீட் பிடித்தனர். அப்போது அதே பஸ்சில் பயணம் செய்ய 2 போலீஸ்காரர்கள் வந்தனர். அதில் ஒருவர் ஜன்னல் வழியாக தனது துப்பாக்கியை சீட்டில் போட்டு இடம் பிடித்தார்.

இதைப்பார்த்த சக பயணிகள் அதிர்ச்சியடைந்தனர். இது குறித்து பயணிகள் கூறும்போது, பஸ்களில் சீட் பிடிக்க துப்பாக்கியை போடும்போது பயணிகள் அச்சம் அடைந்தனர். சமூக விரோதிகள் துப்பாக்கியை எடுத்துச்சென்றிருந்தால் விபரீதமாகி இருக்கும். போலீசார் இந்த செயலை தவிர்த்திருக்க வேண்டும் என்று கூறினர்.

போலீஸ்காரர் பஸ்சில் இடம் பிடிக்க துப்பாக்கி போட்ட போட்டோ சமூக வலைதளங்களில் பரவி வருகிறது.  

சென்னை:

தீபாவளி பண்டிகையை சொந்த ஊர்களில் கொண் டாட செல்லும் பயணிகள் வசதிக்காக சிறப்பு பஸ், ரெயில்கள் விடப்பட்டுள்ளன. ஆம்னி பஸ்களிலும் இடங்கள் நிரம்பி வழிகிறது. தமிழகத்தில் 1100 ஆம்னி பஸ்கள் பல்வேறு நகரங்களுக்கும், அண்டை மாநிலங்களுக்கும் இயக்கப்படுகின்றன.

பண்டிகை கால கூட்ட நெரிசலை பயன்படுத்தி ஆம்னி பஸ்களில் பலமடங்கு கட்டணம் வசூலிக்கப்படுகிறது. கட்டணத்தைவிட 3 மடங்கு கட்டணம் கூடுதலாக வசூலிப்பதால் பொதுமக்கள் பாதிக்கப்படுகிறார்கள். ஒரு சில ஆம்னி பஸ் ஆபரேட்டர்கள் ஆன்லைனில் வெளிப்படையாக கூடுதல் கட்டணம் நிர்ணயித்து பொதுமக்களிடம் வசூலித்து வருகின்றனர்.

அதிக கட்டணம் வசூலிக்கும் ஆம்னி பஸ்களை கண்காணிக்க வட்டார போக்குவரத்து அலுவலர்கள் தலைமையில் பறக்கும் படை அமைக்கப்பட்டுள்ளது. இவர்கள் கோயம்பேடு ஆம்னி பஸ்நிலையம், ஸ்ரீபெரும்புதூர் சுங்கச்சாவடி, கிழக்கு கடற்கரை சாலை சுங்கசாவடி, ஊரப்பாக்கம் தற்காலிக பஸ் நிலையம் ஆகிய இடங்களில் சோதனை மேற்கொள்கிறார்கள்.

இன்று (வெள்ளிக் கிழமை) 3,4 மற்றும் 5 ஆகிய தேதிகளில் ஆம்னி பஸ்களில் பயணிகளிடம் தீவிர சோதனை செய்கின்றனர். 4 நாட்களிலும் 4 குழுக்கள் வீதம் 16 குழுக்கள் நியமிக்கப்பட்டு கூடுதல் கட்டணம், பெர்மிட் குறித்து விசாரித்து நடவடிக்கை எடுக்கின்றனர். இதுகுறித்து அமலாக்கப் பிரிவு இணை ஆணையர் முத்து கூறியதாவது:-

ஆம்னி பஸ்களில் கூடுதல் கட்டணம் வசூலிப்பது தொடர்பாக பொதுமக்கள் புகார் தெரிவிக்க வேண்டும். 4 பஸ் நிலையங்களிலும் 4 நாட்கள் தீவிரமாக கண்காணிக்கப்படும். பயணிகளிடம் கூடுதல் கட்டணம் வசூலிப்பது உறுதி செய்யப்பட்டால் அந்த பஸ் சிறை பிடிக்கப்படும். ஆன்லைனில் அதிக கட்டணம் குறிப்பிடப்பட்டு இருந்தாலும் சம்பந்தப்பட்ட பஸ் நிறுவனங்கள் மீது நடவடிக்கை எடுக்க இயலாது.

அதனால் பஸ்சில் பயணம் செய்யும் போது அதிக கட்டணம் வசூலித்தது குறித்து புகார் தெரிவித்தால் கூடுதல் கட்டணம் திருப்பி கொடுக்கப்படும். மேலும் பெர்மிட் இல்லாமலும் இயக்கப்படும் ஆம்னி பஸ்கள் பறிமுதல் செய்யப்படும் என்றார். #Omnibuses

சென்னை:

தமிழக அரசு துறைகளில் பணியாற்றும் அதிகாரிகள் தீபாவளி மாமூல் வசூலில் ஈடுபடுவதாக லஞ்ச ஒழிப்பு போலீசுக்கு தகவல் கிடைத்தது.

இதனை தொடர்ந்து கடந்த 2 நாட்களாக மாநிலம் முழுவதும் லஞ்ச ஒழிப்பு போலீசார் அதிரடி சோதனையில் ஈடுபட்டனர். இதில் கட்டு கட்டாக ரூபாய் நோட்டுகள் சிக்கின. சென்னை உள்பட 24 இடங்களில் நடத்தப்பட்ட இந்த சோதனையில் மொத்தம் ரூ.44 லட்சத்து 30 ஆயிரம் பறிமுதல் செய்யப்பட்டுள்ளது.

சென்னையில் வடக்கு மாவட்ட டாஸ்மாக் மேலாளர் அலுவலகத்தில் ரூ.80 ஆயிரமும், தெற்கு மாவட்ட அலுவலகத்தில் ரூ.52,600-ம் சிக்கியது.

சுற்றுச்சூழல் என்ஜினீயர் ஒருவரின் அலுவலகத்தில் ரூ.2 லட்சத்து 49 ஆயிரத்து 500 பணம் பிடிபட்டது. ஸ்ரீபெரும்புதூர் பத்திரபதிவு அலுவலகத்தில் ரூ.28,500 பணம் கைப்பற்றப்பட்டது.

வேலூரில் உள்ள ஆவின் பொது மேலாளர் அலுவலகத்தில் அதிகபட்சமாக ரூ.14 லட்சத்து 80 ஆயிரம் பணம் கிடைத்தது. இதே போல தென்காசி, கோவில்பட்டி உள்ளிட்ட தென்மாவட்ட பகுதிகளிலும் சோதனை நடந்தது.

கோவில்பட்டி ஆர்.டி.ஓ. அலுவலகத்தில் ரூ.1 லட்சத்து 53 ஆயிரம் பணமும், தென்காசி ஆர்.டி.ஓ. ஆபிசில் ரூ.87 ஆயிரமும் சிக்கியது.

மேட்டூர் வட்டார போக்கு வரத்து அலுவலகத்தில் லஞ்ச ஒழிப்பு போலீசார் நுழைந்ததும் யாரும் அவரவரிடத்தில் அப்படியே நிற்க வேண்டும் என்று கூறினர். இதனால் அதிர்ச்சி அடைந்த இடைத்தரகர்கள் தங்களிடம் இருந்த பணத்தை ஜன்னல் வழியாகவும், அலுவலக மேஜையின் கீழேயும் வீசி எறிந்தனர். லஞ்ச ஒழிப்பு போலீசார் அந்த பணத்தை கைப்பற்றினர்.

ரூ.84ஆயிரத்து 450 பறிமுதல் செய்யப்பட்டது. போக்குவரத்து அலுவலர் சிங்காரவேலன், மோட்டார் வாகன ஆய்வாளர் ஜெயந்தி, அலுவலக ஊழியர் 8 பேர், இடைத்தரகர்கள் 25 பேரிடமும் 6 மணிநேரம் விசாரணை நடைபெற்றது.

பழனி முருகன் கோவிலில் நூற்றுக்கணக்கானோர் ஓய்வூதியம் பெற்று வருகின்றனர். ஓய்வூதியம் பெறும் நபர்கள் ஆண்டு தோறும் தங்கள் அடையாளத்தை புதுப்பித்துக் கொள்ள வேண்டும். இதற்காக பழனி கோவில் தங்கும் விடுதியில் அறநிலையத்துறை உதவி ஆணையர் சிவலிங்கம் முன்னிலையில் ஆள் அறிதல் புதுப்பிப்பு முகாம் நடந்தது.

இந்த முகாமில் அதிகாரிகளுக்கு லஞ்சம் கொடுக்கப்படுவதாக புகார் வந்தது. இதனையடுத்து அங்கு சோதனை செய்த போலீசார் கணக்கில் வராத ரூ.34 ஆயிரம் பணத்தை பறிமுதல் செய்தனர்.

தேனி வட்டார போக்கு வரத்து அலுவலகத்தில் நடந்த சோதனையில் ரூ.14 ஆயிரத்து 680 பறிமுதல் செய்யப்பட்டது.

கடலூர் வட்டார போக்கு வரத்து அலுவலகத்தில் கணக்கில்வராத ரூ.4 லட்சத்து 33 ஆயிரம் இருப்பது கண்டு பிடிக்கப்பட்டது. அவற்றை போலீசார் பறிமுதல் செய்தனர்.

புரோக்கர்கள் பையில் வைத்திருந்த 100-க்கும் மேற்பட்ட ஓட்டுனர் உரிமம், ஆர்.சி. புத்தகங்களும் கைப்பற்றப்பட்டன.

விழுப்புரம் பத்திரபதிவு இணை சார்பதிவாளர் அலுவலகத்தில் ஆவண எழுத்தர்கள் 4 பேர் தங்கள் பைகளில் 88 ஆயிரத்து 140 ரூபாய் வைத்திருந்தனர். அந்த பணத்துக்கு அவர்கள் உரிய கணக்கு காட்டவில்லை. இதனைத்தொடர்ந்து லஞ்ச ஒழிப்பு போலீசார் அந்த பணத்தையும் பறிமுதல் செய்தனர்.

ஸ்ரீரங்கம் வட்டார போக்குவரத்து அலுவலகத்தில் வாகனங்களை பதிவு செய்யவும், ஓட்டுனர் உரிமம் பெறவும் தினந்தோறும் 100-க்கும் மேற்பட்டோர் வந்து செல்கிறார்கள். அவர்களிடம் அரசுக்கு செலுத்த வேண்டிய கட்டணத்தைவிட கூடுதல் தொகை வசூலிப்பதாக புகார்கள் வந்தன.

அதன்பேரில் அங்கு நடந்த சோதனையில் ரூ.44 ஆயிரத்து 500 பிடிபட்டது. பரிசு பொருட்களும் சிக்கின.

வேலூர்ஆவின் பொதுமேலாளர் முரளிபிரசாத் காரில் இருந்து ரூ.11 லட்சமும், செயல் பொறியாளர் சேகரிடம் ரூ.2.85 லட்சமும் பறிமுதல் செய்யப்பட்டது.

தோட்டத்தில் வீசப்பட்ட ரூ.1 லட்சம் பணமும் சிக்கியது இதன் மூலம் இங்கு 14.85 லட்சம் பறிமுதல் செய்யப்பட்டது.

பொது மேலாளர் முரளிபிரசாத், சேகர் மீது வழக்கு பதிவு செய்து நடவடிக்கை எடுக்கப்படும் என அதிகாரிகள் தெரிவித்தனர்.

திருவண்ணாமலை வட்டார போக்குவரத்து அலுவலகத்தில் கணக்கில் வராத ரூ.10 லட்சத்தை அதிகாரிகள் பறிமுதல் செய்தனர்.

நேற்று ஒரே நாளில் மாநிலம் முழுவதும் 24 இடங்களில் நடத்தப்பட்ட இந்த சோதனை பெரும் பரபரப்பை ஏற்படுத்தி உள்ளது. இந்த சோதனை தீபாவளி வரை தொடரும் என்று எதிர்பார்க்கப்படுகிறது.

இதனால் அரசு அதிகாரிகள் கலக்கம் அடைந்துள்னர். கடந்த 2 நாட்களாக நடத்தப்பட்ட தொடர் சோதனையில் அரசு அலுவலகங்களில் கைமாற இருந்த லட்சக்கணக்கான லஞ்ச பணம் தடுத்து நிறுத்தப்பட்டுள்ளது குறிப்பிடத்தக்கது.