நீங்கள் தேடியது "slug 99996"

சென்னை:

தி.மு.க. தலைவர் கருணாநிதி வயோதிகம் காரணமாக உடல்நலம் பாதிக்கப்பட்டு கோபாலபுரம் வீட்டில் ஒய்வெடுத்து வருகிறார்.

அவரை அவ்வப்போது அறிவாலயத்துக்கும், சி.ஐ.டி. காலனியில் உள்ள கனிமொழி வீட்டுக்கும் அழைத்துச் சென்று வருகின்றனர். அவருக்கு முழுமையான நினைவு சக்தி வரும் வகையில் பயிற்சிகள் கொடுக்கப்பட்டு வருகிறது.

அரசியல் கட்சித் தலைவர்களும் அவ்வப்போது சென்று கருணாநிதியை சந்தித்து வருகின்றனர்.

அந்த வகையில் நேற்று இந்திய கம்யூனிஸ்டு கட்சியின் மாநில செயலாளர் இரா.முத்தரசன் கோபாலபுரம் சென்று கருணாநிதியை சந்தித்து பேசினார். அவருடன் இந்திய கம்யூனிஸ்டு முன்னாள் எம்.எல்.ஏ.க்கள் கே.சுப்புராயன், வை.சிவபுண்ணியம் ஆகியோரும் உடன் சென்றிருந்தனர்.

முத்தரசனை கருணாநிதியிடம் மு.க.ஸ்டாலின் அறிமுகப்படுத்தி வைத்தார். அதன்பிறகு சிறிது நேரம் உடல் நலம் விசாரித்துக் கொண்டனர். இந்த சந்திப்பின் போது துரைமுருகன், ஆ.ராசா, பொன்முடி, வெ.வேலு உடன் இருந்தனர்.

இந்த சந்திப்பு பற்றி முத்தரசன் கூறுகையில், தி.மு.க. தலைவர் கருணாநிதி எங்களை அடையாளம் கண்டு சிரித்தார். ஓரிரு வார்த்தைகள் பேசினார். அவரது உடல்நிலை முன்பை விட நன்றாக உள்ளது என்றார். #DMK #Karunanidhi #Mutharasan

வேதாரண்யம்:

வேதாரண்யம் தாலுக்கா கத்தரிபுலத்தில் அரசு உயர்நிலைப்பள்ளியில் 1973-ம் ஆண்டு முதல் படித்த முன்னாள் மாணவர்கள் ஓய்வு பெற்ற ஆசிரியர்கள் சந்திப்பு நிகழ்ச்சி நடைபெற்றது. நிகழ்ச்சியில் 45 ஆண்டுகளுக்கு முன்பு இப்பள்ளியில் படித்த மாணவர்களும் அவர்களுக்கு பாடம் நடத்திய ஆசிரியர்களும் கலந்து கொண்டனர்.

விழாவில் இப்பள்ளியில் பணியாற்றி ஓய்வு பெற்று பல்வேறு ஊர்களில் வாழ்ந்துவரும் ஆசிரியர்கள் ஆதிநெடுஞ்செழியன், நாகராஜன், ரசல், ராஜ்குமார், ராமநாதன், வீரப்பத்திரன், வடிவேல், சுந்தரேசன், ராமசந்திரன், கணேசன், ராமலிங்கம் உள்ளிட்ட 20-க்கும் மேற்பட்ட ஆசிரியர்கள் கலந்து கொண்டனர்.

மாணவர்களும் ஆசிரியர்களும் பழைய நினைவுகளை பேசி மகிழ்ந்தனர். பின்பு மாணவர்கள் ஆசிரியர்களுக்கு மாலை மற்றும் சால்வை அணிவித்து மரியாதை செய்தனர்.

கொல்கத்தா, சென்னை, கன்னியாகுமரி, தஞ்சாவூர், கடலூர் உள்ளிட்ட பல்வேறு பகுதிகளில் இருந்தும் வேதாரண்யம் பகுதிகளில் இருந்தும் 500-க்கும் மேற்பட்ட முன்னாள் மாணவர்களும் ஆசிரியர்களும் கலந்து கொண்டனர்.

இந்த விழாவில் கத்தரிப்புலம் கிராமத்தில் பிறந்து இப்பள்ளியில் படித்த தமிழரசன் கொல்கத்தாவில் அரசு பணியில் உள்ளார். அவர் வாட்ஸ்-அப்பில் இந்த சந்திப்பு விழா அழைப்பை பார்த்து கொல்கத்தாவில் இருந்து விமானம் மூலம் சென்னை வந்து அங்கு உள்ள தனது குடும்பத்தாரையும் அழைத்து கொண்டு வந்து விழாவில் கலந்து கொண்டார்.

விழா ஏற்பாடுகளை பள்ளியின் முன்னாள் மாணவர்கள் சாம்பசிவம், சிவகடாட்சம், தருமையன், இளவழகன், சாமியப்பன், ஜெகநாதன், சரவணன், வீரமணி, ராஜன் ஆகியோர் செய்திருந்தனர்.

விழாவில் கலந்து கொண்ட முன்னாள் மாணவர்கள் கூறும்போது, 45 ஆண்டுகளுக்கு பிறகு தங்களுடன் படித்தவர்களை சந்தித்ததில் மகிழ்ச்சி அடைகிறோம். எங்களின் ஆசிரியர்களை சந்தித்து ஆசி வாங்கியதை பெருமையாக நினைக்கிறோம். நாங்கள் படித்த பள்ளியை மேம்படுத்தவும், இப்பகுதி மாணவர்களின் முன்னேற்றத்திற்கு ஜ.ஏ.எஸ் சிறப்பு பயிற்சி வகுப்பு நடத்த உள்ளோம் என்றனர்.

சென்னை:

சென்னை அருகே நாவலூரில் உள்ள தனியார் ஐ.டி. நிறுவனத்தில் என்ஜினீயராக பணிபுரிந்து வருபவர் லாவண்யா (வயது30). இவரது சொந்த ஊர் ஆந்திரா மாநிலம் விஜயவாடா ஆகும்.

சென்னை பள்ளிக்கரணையில் அறை எடுத்து தங்கி வேலைக்கு சென்று வந்தார்.

கடந்த பிப்ரவரி மாதம் 12-ந்தேதி இரவு லாவண்யா பணிமுடிந்து தனது ஸ்கூட்டரில் வீட்டுக்கு சென்று கொண்டிருந்தார். பெரும்பாக்கம்-தாழம்பூர் சாலையில் உள்ள அரசன் காலனி என்ற இடத்தில் சென்றபோது அவரை பின்தொடர்ந்த 3 பேர் அவரது தலையில் இரும்பு கம்பியால் பலமாக தாக்கினார்கள். இதில் அவர் நிலைதடுமாறி விழுந்தார்.

பின்னர் அவர்கள் லாவண்யா அணிந்திருந்த நகை, பணம், லேப்டாப், செல்போன்கள் மற்றும் ஸ்கூட்டரை கொள்ளையடித்து சென்றனர். போலீசார் சம்பவ இடத்துக்கு சென்று அவரை மீட்டு பெரும்பாக்கத்தில் உள்ள தனியார் மருத்துவமனையில் அனுமதித்தனர். அங்கு அவர் சிகிச்சை பெற்றுவந்தார்.

இந்த சம்பவம் தொடர்பாக அந்த பகுதியில் உள்ள கண்காணிப்பு கேமராவில் பதிவான காட்சிகளை வைத்து போலீசார் விசாரணை நடத்தினார்கள். சம்பவம் நடந்த இடத்தில் இருந்து சிறிது தூரத்தில் கிடந்த அவரது ஸ்கூட்டரை மீட்டனர்.

இதுதொடர்பாக பள்ளிக்கரணை போலீஸ் இன்ஸ்பெக்டர் சிவகுமார் வழக்குப்பதிவு செய்து செம்மஞ்சேரி சுனாமி குடியிருப்பை சேர்ந்த நாராயண மூர்த்தி, விநாயக மூர்த்தி, லோகேஷ் ஆகிய 3 பேரை கைது செய்தனர்.

போலீஸ் கமி‌ஷனர் ஏ.கே. விஸ்வநாதன் ஆஸ்பத்திரிக்கு சென்று லாவண்யாவை சந்தித்து அவருக்கு ஆறுதல் சொல்லி தைரியமூட்டினார். போலீசாரும் அவருக்கு தைரியம் கொடுத்தனர்.

3 மாத சிகிச்சைக்கு பிறகு லாவண்யா பூரண குணம் அடைந்தார். அவர் இன்று சென்னை போலீஸ் கமி‌ஷனர் அலுவலகத்தில் கமி‌ஷனர் ஏ.கே.விஸ்வநாதனை சந்தித்து நன்றி தெரிவித்தார். சம்பவத்தின்போது தனது உயிரை காப்பாற்றிய போலீசாருக்கும் அவர் நன்றி தெரிவித்தார்.

அப்போது அவருடன் கூடுதல் கமி‌ஷனர்கள் சாரங்கன், ஜெயராம், பள்ளிக்கரணை போலீஸ் இன்ஸ்பெக்டர் சிவகுமார் ஆகியோர் உடன் இருந்தனர்.

கொள்ளையர்களால் தாக்கப்பட்ட சம்பவத்தில் இருந்து நான் மீண்டுவர எனக்கு பல்வேறு துறையை சேர்ந்தவர்களும் ஊக்கம் கொடுத்தனர். சம்பவம் நடந்த 10 நாட்கள் நான் எனது முகத்தை கூட கண்ணாடியில் பார்க்கவில்லை. போலீஸ் கமி‌ஷனர் என்னை சந்தித்து ஆறுதல் கூறி மன தைரியம் அளிக்கும் வி‌ஷயங்களை சொன்னார். என்னை யாரும் ஒதுக்கவில்லை. எல்லோரும் அளித்த ஊக்கம் தான் என்னை இயல்பு நிலைக்கு கொண்டுவந்தது. எல்லோருமே எனக்கு ஆறுதல் அளிக்கும் வகையில் பேசினார்கள். தமிழக மக்களும் எனக்காக பிரார்த்தனை செய்தனர். அவர்கள் அனைவருக்கும் நன்றி.

இவ்வாறு அவர் கூறினார்.

பேட்டியின்போது இன்ஸ்பெக்டர் சிவகுமாரை அண்ணன் என்று குறிப்பிட்ட லாவண்யா தான் குணமடையும் வரை அருகில் இருந்து அவர் பார்த்துக் கொண்டதாக தெரிவித்தார்.

போலீஸ் கமி‌ஷனர் அலுவலகத்துக்கு வந்த லாவண்யாவுக்கு முகத்தில் காயம் அடைந்த தழும்புகள் இருந்தன.