உத்தமபாளையம்:
கேரள வனப்பகுதியில் இருந்து இடம்பெயர்ந்த மக்னா யானை தேவாரம் வனப்பகுதியில் சுற்றித்திரிகிறது. இரவு நேரங்களில் விவசாய நிலங்கள் மற்றும் குடியிருப்பு பகுதியில் புகுந்து அட்டகாசம் செய்து வருகிறது.
மேலும் மக்னா யானை தாக்கி இதுவரை 7 பேர் உயிரிழந்துள்ளனர். எனவே யானையை பிடித்து கேரள வனப்பகுதியில் விடவேண்டும் என விவசாயிகள் வலியுறுத்தி வந்தனர்.
இதற்காக பொள்ளாச்சியில் இருந்து சிறப்பு படையினர் வரவழைக்கப்பட்டு யானையின் நடமாட்டத்தை கண்காணித்து வந்தனர்.
தற்போது 2 கும்கி யானைகள் வரவழைக்கப்பட்டு மக்னா யானையை பிடிக்க தீவிர தேடுதல் வேட்டையில் ஈடுபட்டுள்ளனர். இதற்காக வனப்பகுதியில் முகாமிட்டுள்ளனர். இருந்த போதும் மக்னா யானை அடர்ந்த வனப்பகுதிக்குள் சென்று அவர்களுக்கு போக்கு காட்டி வருகிறது.
ஆனால் மக்னா யானை பிடிபட்டால் மட்டுமே அப்பகுதி விவசாயிகள் மற்றும் பொதுமக்கள் நிம்மதியாக சென்று வரமுடியும். எனவே யானையை பிடிக்க வனத்துறையினர் தீவிர முயற்சியில் ஈடுபட்டுள்ளனர்.
