பரான்கியா:
23-வது உலகக் கோப்பை கால்பந்து போட்டி 2026-ம் ஆண்டு ஜூன், ஜூலை மாதங்களில் அமெரிக்கா, கனடா, மெக்சிகோ ஆகிய 3 நாடுகளில் நடக்கிறது. மொத்தம் 48 நாடுகள் பங்கேற்கின்றன. போட்டியை நடத்தும் நாடுகளை தவிர மற்ற அணிகள் தகுதி சுற்று மூலமே தேர்வாகும்.
தற்போது தகுதி சுற்று பல்வேறு நாடுகளில் நடக்கின்றன. இதில் தென்அமெரிக்க கண்டத்துக்கான தகுதி சுற்றில் 10 அணிகள் இடம் பெற்றுள்ளன. ஒவ்வொரு அணியும், மற்ற அணிகளுடன் தலா 2 முறை மோத வேண்டும். இதன்படி ஒவ்வொரு அணியும் மொத்தம் 18 ஆட்டங்களில் விளையாட வேண்டும். லீக் முடிவில் முதல் 6 இடங்களை பிடிக்கும் அணிகள் நேரடியாக உலகக் கோப்பைக்கு தகுதி பெறும். 7-வது இடத்தை பெறும் அணி பிளே-ஆப் சுற்றில் மோதும். எஞ்சிய 3 அணிகள் வெளியேறும்.
இந்த நிலையில் பரான்கியாவில் நேற்று முன்தினம் இரவு நடந்த ஒரு ஆட்டத்தில் கொலம்பியா, 'நம்பர் ஒன்' அணியும், உலக சாம்பியனுமான அர்ஜென்டினாவை சந்தித்தது. உள்ளூர் ரசிகர்களின் உற்சாகத்துடன் களம் புகுந்த கொலம்பியா 25-வது நிமிடத்தில் கோல் அடித்தது. அந்த அணியின் யர்சென் மோஸ்கியரா தலையால் முட்டி கோல் அடித்தார். 48-வது நிமிடத்தில் அர்ஜென்டினாவின் நிகோ கோன்சலேஸ் பதில் கோல் திருப்பினார்.
60-வது நிமிடத்தில் கிடைத்த பெனால்டி வாய்ப்பை கொலம்பியா கேப்டன் ஜேம்ஸ் ரோட்ரிக்ஸ் கோலாக்கினார். முடிவில் கொலம்பியா 2-1 என்ற கோல் கணக்கில் அர்ஜென்டினாவை வீழ்த்தியது. இதன் மூலம் இரு மாதத்துக்கு முன்பு கோபா அமெரிக்கா கால்பந்து இறுதி ஆட்டத்தில் அர்ஜென்டினாவிடம் அடைந்த தோல்விக்கும் பழிதீர்த்துக் கொண்டது. அர்ஜென்டினா அணியில் நட்சத்திர வீரர் லயோனல் மெஸ்சி காயம் காரணமாக ஆடவில்லை என்பது குறிப்பிடத்தக்கது.
மற்றொரு ஆட்டத்தில் பராகுவே 1-0 என்ற கோல் கணக்கில் முன்னாள் சாம்பியன் பிரேசிலுக்கு அதிர்ச்சி அளித்தது. பராகுவே அணியில் வெற்றிக்குரிய கோலை 20-வது நிமிடத்தில் டியாகோ கோம்ஸ் அடித்தார். தொடர்ந்து தடுமாறி வரும் பிரேசில் அணி முதல் பாதியில் இலக்கை நோக்கி துல்லியமாக ஒரு ஷாட் கூட அடிக்கவில்லை. பிற்பாதியில் வினிசியஸ் அடித்த சில ஷாட்டுகள் தடுக்கப்பட்டு விட்டது. கடந்த 5 ஆட்டங்களில் பிரேசிலுக்கு விழுந்த 4-வது அடி இதுவாகும். அத்துடன் 2008-ம் ஆண்டுக்கு பிறகு பராகுவேயிடம் பிரேசில் தோற்பது இதுவே முதல் முறையாகும். அடுத்த ஆட்டத்தில் சிலியை சந்திக்கிறது.
இதே போல் பொலிவியா 2-1 என்ற கோல் கணக்கில் சிலியையும், ஈகுவடார் 1-0 என்ற கோல் கணக்கில் பெருவையும் தோற்கடித்தது. வெனிசுலா- உருகுவே இடையிலான ஆட்டம் கோல் இன்றி டிராவில் முடிந்தது.
இந்த பிரிவில் ஒவ்வொரு அணியும் இதுவரை தலா 8 ஆட்டங்களில் விளையாடியுள்ளன. அர்ஜென்டினா 18 புள்ளிகளுடன் (6 வெற்றி, 2 தோல்வி) முதலிடத்தில் நீடிக்கிறது. கொலம்பியா 16 புள்ளிகளுடன் (4 வெற்றி, 4 டிரா) 2-வது இடத்திலும், உருகுவே (15 புள்ளி) 3-வது இடத்திலும், ஈகுவடார் (11 புள்ளி) 4-வது இடத்திலும் உள்ளன. பிரேசில் 10 புள்ளிகளுடன் (3 வெற்றி, ஒரு டிரா, 4 தோல்வி) 5-வது இடத்தில் இருக்கிறது.
