CNG பைக்கின் புது வேரியண்ட் அறிமுகம் செய்யும் பஜாஜ் - விலை குறைவா இருக்கும்..!

பஜாஜ் ஆட்டோ நிறுவனம் உலகின் முதல் CNG மோட்டார்சைக்கிள் - பஜாஜ் பிரீடம் CNG-ஐ கடந்த ஜூலை மாதம் அறிமுகம் செய்தது. பஜாஜ் பிரீடம் CNG மாடலின் விலை ரூ. 94 ஆயிரத்து 995, எக்ஸ்-ஷோரூம் என நிர்ணயம் செய்யப்பட்டு உள்ளது. இதன் டாப் என்ட் மாடல் விலை இதுவிட அதிகம் ஆகும்.

இந்த நிலையில், பஜாஜ் நிறுவனம் தனது பிரீடம் CNG மோட்டார்சைக்கிளின் குறைந்த விலையில் கிடைக்கும் புது வெர்ஷனை உருவாக்கி வருவதாக தகவல் வெளியாகி உள்ளது. இதனை உறுதிப்படுத்தும் வகையில், இந்த பைக் டெஸ்டிங் செய்யப்படும் புகைப்படங்கள் இணையத்தில் லீக் ஆகி உள்ளன.

புதிய வெர்ஷனில் விலை குறைப்புக்கு ஏற்ற மாற்றங்களை பஜாஜ் நிறுவனம் மேற்கொண்டு வருகிறது. குறைந்த விலை CNG பைக் அடுத்த ஆண்டு பிப்ரவரி, மார்ச் மாத இறுதிக்குள் அறிமுகம் செய்யப்பட்டு விடும் என்று எதிர்பார்க்கலாம்.

பஜாஜ் பிரீடம் CNG பைக்கின் புது வெர்ஷனில் எல்இடி யூனிட்-க்கு மாற்றாக ஹாலோஜன் லைட், புதிய ஹெட்லைட் பிராகெட் வழங்கப்படலாம். இதே போன்று டெலிஸ்கோபிக் ஃபோர்க்கை சுற்றி இருந்த கவருக்கு பதிலாக பிளாஸ்டிக்-ஆல் ஆன ஃபோர்க் கெயிட்டர்கள் வழங்கப்படுகின்றன.

பாடி பேனல்கள் மறைக்கப்பட்டு இருப்பதால், இந்த பைக் சிங்கில் டோன் பெயின்டிங் செய்யப்பட்டு இருக்கும் என்று தெரிகிறது. இத்துடன் புதிய ஃபென்டர்கள் மற்றும் ஸ்பிலாட்டர் கார்டுகள் வழங்கப்படுகின்றன.

இந்த பைக்கிலும் 125சிசி எஞ்சின் மற்றும் 5-ஸ்பீடு கியர்பாக்ஸ் வழங்கப்படும் என்று தெரிகிறது. இந்த யூனிட் 9.3 ஹெச்பி பவர், 9.7 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டிருக்கும்.