கோட்டை பெருமாள் கோவிலில் வைகுண்ட ஏகாதசி விழா 7-ம் தேதி தொடங்குகிறது.

சேலத்தில் பழமை வாய்ந்த சேலம் கோட்டை பெருமாள் கோவிலில் வைகுண்ட ஏகாதசி விழாவை முன்னிட்டு கடந்த மாதம் முகூர்த்தக்கால் நடப்பட்டது. வைகுண்ட ஏகாதசி விழா நாளை மறுநாள் (வெள்ளிக்கிழமை) தொடங்குகிறது.

விழாவின் முக்கிய நிகழ்ச்சியான சொர்க்க வாசல் திறப்பு உற்சவம் வருகிற 18-ந் தேதி நடைபெற உள்ளது. சொர்க்கவாசல் திறப்பு நிகழ்ச்சிக்காக அழகிரிநாதசாமி, ஸ்ரீதேவி, பூதேவி உற்சவ மூர்த்திகளுக்கு சிறப்பு அலங்காரங்கள் செய்யப்படும். நாளை மறுநாளில் இருந்து 29-ந் தேதி வரை நாள்தோறும் பகல் பத்து உற்சவங்கள் நடைபெறுகிறது.

வருகிற 18-ந் தேதி கோட்டை பெருமாள் கோவிலில் நடைபெற உள்ள சொர்க்கவாசல் திறப்பு உற்சவத்தை காண்பதற்காக ஆயிரக்கணக்கான பக்தர்கள் இரவு முதலே கோவிலுக்கு வந்து காத்திருப்பார்கள். மேலும் பெருமாளை தரிசிப்பதற்காக பக்தர்கள் காலை முதல் இரவு வரையிலும் கோவிலுக்கு வந்த வண்ணம் இருப்பார்கள். சேலம் மாநகரில் மட்டுமல்லாது மாவட்டத்தின் பல்வேறு பகுதிகளில் இருந்தும் பக்தர்கள் வருவார்கள்.

சேலம் டவுன் பட்டைக்கோவில் என்று அழைக்கப்படும் பிரசன்ன வரதராஜ பெருமாள், செவ்வாய்பேட்டை பிரசன்ன வெங்கடாசலபதி கோவில், அம்மாபேட்டை சிங்கமெத்தை சவுந்தரராஜ பெருமாள் கோவில், செவ்வாய்பேட்டை பாண்டுரங்கநாதர்சாமி கோவில், சேலம் 2-வது அக்ரஹாரம் லட்சுமி நாராயணசாமி கோவில், சின்ன திருப்பதி வெங்கடேச பெருமாள் கோவில் ஆகிய கோவில்களில் சொர்க்கவாசல் திறப்பு நிகழ்ச்சி நடைபெறும் என கோவில் நிர்வாகிகள் தெரிவித்தனர்.