தண்ணீர் உறிஞ்ச பயன்படுத்திய 5 மின்மோட்டார்கள் பறிமுதல்

மீஞ்சூர் அடுத்த அத்திப் பட்டு முதல் நிலை ஊராட்சியில் உள்ள வீடுகளுக்கு மேல்நிலை நீர்த்தேக்க தொட்டியில் இருந்து குடிநீர் வினியோகிக்கப்படுகிறது.

இந்நிலையில் ஊராட்சிக்குட்பட்ட அத்திப்பட்டு புதுநகர் பகுதியில் உள்ள வீட்டில் மின்மோட்டார் பொருத்தி தண்ணீர் உறிஞ்சப்படுவதால் பல்வேறு இடங்களுக்கு குடிநீர் வினியோகிப்பதில் பாதிப்பு ஏற்படுவதாக தொடர்ந்து புகார்கள் வந்தன. இதைத்தொடர்ந்து அதிகாரிகள் ஆய்வு செய்தபோது அத்திப்பட்டு புது நகர் பகுதியில் தண்ணீர் உறிஞ்ச பயன்படுத்திய 5 மின்மோட்டார்களை பறிமுதல் செய்தனர்.

திருட்டுத்தனமாக மின் மோட்டார் மூலம் குடிநீர் உறிஞ்சினால் குடிநீர் இணைப்பு துண்டிக்கப்படும் என ஊராட்சி நிர்வாகத்தினர் எச்சரிக்கை விடுத்து உள்ளனர்.