தஞ்சையில், அம்மன் கோவிலில் நகை திருட்டு

தஞ்சாவூர்:

தஞ்சை கீழவாசல் ஆட்டு மந்தை தெருவில் படைவெட்டி மாரியம்மன் கோவில் அமைந்துள்ளது. பிரசித்தி பெற்ற இந்த கோவிலில் தினமும் ஏராளமான பக்தர்கள் சாமி தரிசனம் செய்வர்.

இந்த நிலையில் நேற்று இரவு கோவிலில் வழக்கமான பூஜைகள் முடிந்து நடை சாத்தப்பட்டது. இன்று காலை கோவிலுக்கு வந்த பக்தர்கள் கதவு திறந்து கிடப்பதை பார்த்தும், அம்மன் கழுத்தில் கிடந்த 4 பவுன் தங்க சங்கிலியை காணாததை கண்டும் அதிர்ச்சி அடைந்தனர். உடனடியாக இது குறித்து தஞ்சை கிழக்கு போலீஸ் நிலையத்திற்கு தகவல் தெரிவித்தனர். அதன் பேரில் போலீசார் சம்பவ இடத்திற்கு வந்து பார்வையிட்டு விசாரித்தனர். அதில் நள்ளிரவில் மர்ம நபர்கள் கோவிலுக்குள் புகுந்து அம்மன் கழுத்தில் கிடந்த தங்க சங்கிலியை திருடி சென்றது தெரிய வந்தது.

இது குறித்த புகாரின் பேரில் போலீசார் வழக்கு பதிவு செய்து விசாரணை நடத்தி மர்ம நபர்களை வலைவீசி தேடி வருகின்றனர். இந்த சம்பவம் தஞ்சையில் பரபரப்பை ஏற்படுத்தி உள்ளது.