ராஜேந்திரபாலாஜி மீது வழக்கு தொடர கவர்னரிடம் அனுமதி கேட்டுள்ளோம்- சுப்ரீம் கோர்ட்டில் தமிழக அரசு தகவல்

புதுடெல்லி:

ஆவின் நிறுவனத்தில் வேலை வாங்கித்தருவதாக கூறி பலரிடம் 3 கோடி ரூபாய் வாங்கிக்கொண்டு மோசடி செய்ததாக முன்னாள் பால்வளத்துறை அமைச்சர் கே.டி.ராஜேந்திரபாலாஜி உள்ளிட்டோர் மீது விருதுநகர் மாவட்ட குற்றப்பிரிவு வழக்குப்பதிவு செய்யப்பட்டு உள்ளது.

இதுதொடர்பாக சங்கரமூர்த்தி பட்டியைச் சேர்ந்த ஆர்.முருகன் தாக்கல் செய்த இடையீட்டு மனுவை சுப்ரீம் கோர்ட்டு நீதிபதிகள் ரிஷிகேஷ் ராய், எஸ்.வி.என். பாட்டி ஆகியோர் அடங்கிய அமர்வு விசாரித்து வருகிறது.

இதற்கிடையே விருதுநகர் மாவட்ட குற்றப்பிரிவு துணை சூப்பிரண்டு உதயசூரியன் சார்பில் வக்கீல் சபரீஷ் சுப்ரமணியன் பிரமாண பத்திரத்தை தாக்கல் செய்தார்.

அதில், ஆவின் நிறுவனத்தில் வேலை வாங்கித்தருவதாக 3 கோடி ரூபாய் மோசடி புகார் தொடர்பான வழக்கின் புலன் விசாரணை நிறைவடைந்து உள்ளது. இந்த வழக்கில் 70 சாட்சிகள் விசாரிக்கப்பட்டு, 7 சாட்சியங்கள் இணைக்கப்பட்டு, 7 பேர் மீது குற்றம் சாட்டப்பட்டுள்ளது. ராஜேந்திர பாலாஜி மீது குற்றவழக்கு தொடுப்பதற்கான அனுமதி வழங்க கோரி மாவட்ட போலீஸ் சூப்பிரண்டு டி.ஜி.பி.க்கு கடந்த 18-ந் தேதி கடிதம் எழுதியுள்ளார். அனுமதி பெறுவதற்கான அனைத்து முயற்சிகளும் மேற்கொள்ளப்பட்டு உள்ளன. விரைவில் இறுதி அறிக்கை தாக்கல் செய்யப்படும்' என அதில் தெரிவிக்கப்பட்டுள்ளது.

இந்நிலையில் நேற்று நடைபெற்ற விசாரணையின் போது, ஆர்.முருகன் சார்பில் வக்கீல் எஸ்.பெனோ பென்ஸிகர் ஆஜராகி, இந்த விவகாரத்தை லஞ்ச ஒழிப்புத்துறை விசாரித்து இருக்க வேண்டும் என்று தெரிவித்தார்.

தமிழ்நாடு அரசின் சார்பில் கூடுதல் அட்வகேட் ஜெனரல் அமித் ஆனந்த் திவாரி ஆஜராகி, நிலை அறிக்கையை குறிப்பிட்டு வாதிட்டார்.

அப்போது, ராஜேந்திர பாலாஜி முன்னாள் அமைச்சர் என்பதால், அவருக்கு எதிராக வழக்கு தொடர கவர்னரிடம் அனுமதி கேட்டு உள்ளோம். இதுபோல 10 முன்னாள் அமைச்சர்களுக்கு எதிராக வழக்கு தொடர கவர்னரின் அனுமதிக்காக காத்திருக்கிறோம். விரைவில் அனுமதி கிடைக்கும் என நம்புகிறோம் என வாதிட்டார்.

இரு தரப்பு வாதங்களையும் பதிவு செய்து கொண்ட சுப்ரீம் கோர்ட்டு விசாரணையை தள்ளிவைத்தது.