ஆசிய சாம்பியன்ஸ் டிராபி ஹாக்கி: மலேசியாவை வீழ்த்தி ஹாட்ரிக் வெற்றி பெற்றது இந்தியா

ஹுலுன்புயர்:

ஆசிய சாம்பியன்ஸ் டிராபி ஹாக்கி போட்டி சீனாவின் ஹூலுன்பியர் நகரில் நடந்து வருகிறது. இதில் பங்கேற்றுள்ள 6 நாடுகளும் ரவுண்டு ராபின் முறையில் தலா ஒரு முறை மோதவேண்டும்.

லீக் முடிவில் முதல் 4 இடங்களைப் பிடிக்கும் அணிகள் அரையிறுதிக்கு தகுதி பெறும். அரையிறுதி 16-ம் தேதியும், இறுதிப்போட்டி 17-ம் தேதியும் நடக்கிறது.

இந்திய அணி முதல் ஆட்டத்தில் சீனாவை 3-0 என்ற கோல் கணக்கிலும், 2-வது ஆட்டத்தில் ஜப்பானை 5-1 என்ற கோல் கணக்கிலும் வீழ்த்தியது.

இந்நிலையில், இந்திய அணி 3-வது ஆட்டத்தில் இன்று மலேசியாவுடன் மோதியது. இந்த ஆட்டத்தில் இந்தியா 8-1 என்ற கோல் கணக்கில் அபாரமாக ஆடி ஹாட்ரிக் வெற்றி பெற்று அசத்தியது.