ரஜினிகாந்த் தற்போது இயக்குனர் கார்த்திக் சுப்புராஜ் இயக்கத்தில் புதிய படத்தில் நடித்து வருகிறார். இதன் படப்பிடிப்பு மேற்கு வங்காள மாநிலம் டார்ஜிலிங் மற்றும் அங்குள்ள மலைப் பகுதிகளில் நடந்தது.
இதில் ரஜினிகாந்த் பங்கேற்று நடித்து வருகிறார். படப்பிடிப்பை முடித்து விட்டு ரஜினிகாந்த் நாளை நள்ளிரவு விமானம் மூலம் சென்னை திரும்புகிறார்.
அரசியல் களத்தில் குதித்துள்ள ரஜினிகாந்த் தனது கட்சிக்கு மாநிலம் முழுவதும் நிர்வாகிகளை நியமித்துள்ளார். மாவட்ட வாரியாக நிர்வாகிகளை சந்தித்து ஆலோசனையும் நடத்தினார்.
உறுப்பினர்களை சேர்ப்பது, மக்கள் பணியில் ஈடுபடுவது, கட்சி வளர்ப்பது போன்ற அறிவுரைகள் வழங்கப்பட்டன. இதையடுத்து நிர்வாகிகள் கட்சி பணிகளில் மும்முரமாக ஈடுபட்டு வருகிறார்கள்.
இதற்கிடையே ரஜினி ‘காலா’ படப்பிடிப்பில் இருந்ததால் அரசியலில் வேகம் குறைந்தது. எந்தவித கருத்தும் கூறாமல் படப்பிடிப்பில் நடித்து வந்தார்.
அதன் படப்பிடிப்பு முடிந்த பிறகு தூத்துக்குடி சம்பவத்தில் பாதிக்கப்பட்டவர்களை நேரில் சந்தித்து ஆறுதல் கூறினார். அப்போது அவர் அளித்த பேட்டியை பலர் விமர்சனம் செய்தனர். அதற்கு அந்த கட்சி நிர்வாகிகளும் பதில் அளித்தனர்.
அதன்பிறகு ரஜினிகாந்த் புதிய படத்தின் படப்பிடிப்பில் கவனம் செலுத்தினார். அவர் படப்பிடிப்பை முடித்து சென்னை திரும்ப உள்ளதால் அரசியல் பணிகளை தொடங்க முடிவு செய்துள்ளார். இதனால் அரசியல் களத்தில் மீண்டும் ரஜினி வேகம் எடுப்பார் என்று எதிர்பார்க்கப்படுகிறது.
