தனியார் தொலைக்காட்சியில் நடிகர் விஜய் சேதுபதி தொகுத்து வழங்கும் 'பிக் பாஸ் சீசன் 8' கடந்த ஞாயிறு அன்று கோலாகலமாக துவங்கியது. அதில் தமிழகத்தைச் சார்ந்த பல போட்டியாளர்கள் பங்கேற்று பிக்பாஸ் வீட்டிற்குள் சென்றனர். அதே நாளில் நடிகர் சல்மான்கான் தொகுத்து வழங்கும் இந்தி பிக்பாஸ் சீசன் 18 நிகழ்ச்சியும் தொடங்கியது.
அந்நிகழ்ச்சியில் முதல் முறையாக தமிழகத்தைச் சார்ந்தவரும், நடிகையுமான ஸ்ருதிகா அர்ஜுன் பங்கேற்றுள்ளார். 2006 ஆம் ஆண்டு தொடங்கிய இந்தி பிக்பாஸ் சீசன் 1 முதல் இதுவரை நடந்த எந்தவொரு சீசனிலும் தமிழகத்தைச் சார்ந்தவர் பங்கேற்றது இல்லை. ஆனால் அப்பிம்பத்தை உடைத்து ஒரு தமிழ் நடிகை இந்தி பிக்பாஸ் நிகழ்ச்சியில் பங்கேற்றது இதுவே முதல் முறையாகும்.
"ஸ்ருதிகா", தமிழ் சினிமாவின் பழம்பெரும் நடிகரான "தேங்காய் சீனிவாசன்" அவர்களின் பேத்தி ஆவார். சினிமா குடும்ப பின்னணியில் பிறந்த இவர் சூர்யா நடிப்பில் வெளியான "ஸ்ரீ" திரைப்படத்தில் நாயகியாக அறிமுகமாகி, 'தித்திக்குதே', 'நளதமயந்தி' திரைப்படங்களிலும், மலையாள திரைப்படத்திலும் நடித்து உள்ளார்.
சில ஆண்டு கால இடைவெளிக்குப்பின் தனியார் தொலைக்காட்சியில் 'குக் வித் கோமாளி சீசன் 3', நிகழ்ச்சியில் பங்கேற்று, தனது குறும்புக்கார குணத்தினால் மக்கள் மனதை வென்றார். அதைத்தொடர்ந்து அத்தொலைக்காட்சியின் பல நிகழ்ச்சிகளில் பங்கேற்றவர் இன்று இந்தி பிக்பாஸ் சீசன் 18 நிகழ்ச்சியில், போட்டியாளராக பங்கேற்று உள்ளார்.
