பக்தர்கள் வருகை குறைவு: திருநள்ளாறு சனீஸ்வரர் கோவில் வெறிச்சோடியது

காரைக்காலை அடுத்த திருநள்ளாறில் உலகபுகழ் மிக்க சனீஸ்வரர் கோவில் உள்ளது. சனிக்கிழமைதோறும் ஆயிரக்கணக்கான பக்தர்களும், சனிப்பெயர்ச்சியின் போது லட்சக்கணக்கான பக்தர்களும் வருகை தந்து சாமி தரிசனம் செய்வது வழக்கம். பொங்கல் பண்டிகை தொடர் விடுமுறை என்பதால், திருநள்ளாறுக்கு ஏராளமான பக்தர்கள் வருவார்கள் என கோவில் நிர்வாகிகள் எதிர்பார்த்தனர்.

இந்த நிலையில் கொரோனா தொற்று பரவலை தடுக்க தமிழகத்தில் இரவு நேர ஊரடங்கு மற்றும் திருநள்ளாறு சனீஸ்வரர் கோவில் சாமி தரிசனத்திற்கு 2 டோஸ் கொரோனா தடுப்பூசி கட்டாயம் போன்ற கெடுபிடிகளால் சனீஸ்வரர் கோவிலுக்கு மிக குறைந்த அளவிலேயே பக்தர்கள் வந்திருந்தனர். அவர்கள் 2 டோஸ் செலுத்தியதற்கான சான்றை காண்பித்த பிறகே சாமி தரிசனம் செய்ய அனுமதிக்கப்பட்டனர். பக்தர்கள் வருகை குறைவால் கோவில் வளாகம், நளன் குளம் பகுதி வெறிச்சோடி காணப்பட்டது.