தி.மு.க. தலைவர் கருணாநிதிக்கு காங்கிரஸ் தலைவர் ராகுல் காந்தி வாழ்த்து

சென்னை:

தமிழ் சினிமா உலகின் தன்னிகரற்ற எழுத்தாளரும், தி.மு.க தலைவருமான கலைஞர் கருணாநிதி இன்று தனது 95-வது பிறந்தநாளை கொண்டாடுகிறார். அவரது பிறந்தநாளை முன்னிட்டு தமிழகம் முழுவதும் உள்ள தி.மு.க தொண்டர்கள் கேக் வெட்டியும் இனிப்புகள் வழங்கியும், நலத்திட்ட உதவிகள் செய்தும் சிறப்பாக கொண்டாடி வருகின்றனர்.

கருணாநிதியின் கோபாலபுரம் இல்லம் இருக்கும் பகுதியில் தொண்டர்கள் காலையிலேயே ஒன்றுகூடி கேக் வெட்டி மகிழ்ந்தனர். இதையடுத்து செயல்தலைவர் மு.க ஸ்டாலின் கலைஞர் கருணாநிதியை நேரில் சந்தித்து ஆசி பெற்றார்.

உடல்நலக்குறைவு காரணமாக இந்த வருட பிறந்தநாளை தொண்டர்களுடன் கொண்டாட மாட்டார் என எதிர்ப்பார்க்கப்பட்ட நிலையில், கருணாநிதி தனது தொண்டர்களை சந்தித்தார்.

கருணாநிதியின் பிறந்தநாளை முன்னிட்டு நாடு முழுவதும் உள்ள மாநில தேசிய கட்சித்தலைவர்கள் அவருக்கு வாழ்த்து தெரிவித்து வருகின்றனர். அந்த வகையில், காங்கிரஸ் கட்சியின் தலைவர் ராகுல் காந்தி தனது ட்விட்டர் பக்கத்தில் கருணாநிதிக்கு வாழ்த்து தெரிவித்துள்ளார்.
அவரது வாழ்த்து பதிவில், ‘கருணாநிதியின் நல்ல ஆரோக்கியம் மற்றும் மகிழ்ச்சியான வாழ்வுக்கு இறைவனை எப்போதும் வேண்டுகிறேன்’ என குறிப்பிட்டுள்ளார்.

மேலும், தேமுதிக கட்சியின் பொதுச்செயலாளர் விஜயகாந்தும், திராவிடர் கழகத்தலைவர் கி.வீரமணியும் கருணாநிதிக்கு பிறந்தநாள் வாழ்த்து தெரிவித்துள்ளனர். #HBDKalaignar95