சென்னை:
சட்டசபையில் இன்று கேள்வி நேரத்தின்போது பாதாள சாக்கடை திட்டம் குறித்து எஸ்.பி.வேலுமணி பதில் அளித்துக் கொண்டிருந்தார்.
அப்போது ரங்கநாதன் எம்.எல்.ஏ. (தி.மு.க.) துணை கேள்வி கேட்கும்போது, “கடந்த ஆட்சியில் நிறைவேற்றப்படாத திட்டங்கள் என்று அமைச்சர் அடிக்கடி கூறுவதாகவும் கடந்த ஆட்சி என்றால் அதுவும் அ.தி.மு.க. ஆட்சிதான். 2011-ல் இருந்து 7 ஆண்டுகளாக உங்கள் ஆட்சி நடப்பதாகவும்“ குறிப்பிட்டார்.
அப்போது அ.தி.மு.க. எம்.எல்.ஏ. ஒருவர் ரங்கநாதனை பார்த்து குரல் எழுப்பினார். உடனே ரங்கநாதன் அந்த எம்.எல்ஏ.வை பார்த்து, “நீங்கள் இப்படி பேசினால் நானும் அதேபோல் பேச தயார்” என்று சவால் விடுத்தார்.
இருவருக்கும் மோதல் ஏற்படாமல் இருக்க சபாநாயகர் தலையிட்டார். “எதுவாக இருந்தாலும் என்னை பார்த்து பேசுங்கள்” என்றார்.
அதற்கு ரங்கநாதன் எம்.எல்.ஏ., “நான் உங்களை பார்த்துதான் பேசுகிறேன். ஆனால் நீங்கள் எங்களுக்காக பரிந்து பேசுவதில்லை. அந்த எம்.எல்.ஏ. என்னை பார்த்து கேட்டதால் நான் திருப்பி கேட்டேன்” என்றார்.
உடனே சபாநாயகர் கூறும் போது, “நீங்கள் அதைப் பற்றி பொருட்படுத்தாமல் என்னை பார்த்து பேசுங்கள். நான் அவர்களை அமைதிப்படுத்துகிறேன்” என்றார்.
