திருவெண்ணைநல்லூர்:
திருவெண்ணைநல்லூர் அருகே உள்ள பேரங்கியூர் கிராமத்தை சேர்ந்தவர் ஆறுமுகம்(வயது 60). தொழிலாளி. இவரது மகன் தேவநாதன்(35). இவர்கள் 2 பேரும் இன்று காலை மடப்பட்டில் இருந்து பேரங்கியூருக்கு மாட்டு வண்டியில் சென்று கொண்டிருந்தனர்.
அரசூர் பாரதிநகர் அருகே திருச்சி-சென்னை சாலையில் சென்றபோது பின்னால் கன்னியாகுமரியில் இருந்து சென்னை நோக்கி கார் வந்தது. அந்த கார் திடீரென மாட்டுவண்டி மீது மோதியது. இதில் கார் நிலைதடுமாறி நடுரோட்டில் கவிழ்ந்தது. கார் மற்றும் மாட்டுவண்டி பலத்த சேதமடைந்தன.
மாட்டு வண்டியில் இருந்த ஆறுமுகம் மற்றும் அவரது மகன் தேவநாதன் ஆகிய 2 பேரும் தூக்கிவீசப்பட்டனர். இதில் தேவநாதன் சம்பவ இடத்திலேயே பரிதாபமாக இறந்தார். ஆறுமுகம் பலத்த காயம் அடைந்தார். காரில் இருந்த கன்னியாகுமரியை சேர்ந்த சிவராமன் உள்பட 2 பேரும் காயம் அடைந்தனர்.
இந்த விபத்தில் 2 மாடுகளும் சம்பவ இடத்திலேயே இறந்து விட்டன.
விபத்து குறித்து தகவல் அறிந்த திருவெண்ணைநல்லூர் போலீசார் சம்பவ இடத்துக்கு விரைந்து வந்தனர். பலத்த காயமடைந்த ஆறுமுகம், சிவராமன் உள்பட 3 பேரையும் மீட்டு சிகிச்சைக்காக முண்டியம்பாக்கம் அரசு ஆஸ்பத்திரிக்கு அனுப்பி வைத்தனர். அங்கு அவர்களுக்கு சிகிச்சை அளிக்கப்படுகிறது.
இதுகுறித்த புகாரின் பேரில் திருவெண்ணைநல்லூர் போலீசார் வழக்கு பதிவு செய்து விசாரணை நடத்தி வருகின்றனர். இந்த விபத்தால் அந்த பகுதியில் போக்குவரத்து பாதிக்கப்பட்டது.
