சென்னை:
துணை முதல்-அமைச்சர் ஓ.பன்னீர்செல்வம் மதுரை செல்லும் வழியில் சென்னை விமான நிலையத்தில் நிரூபர்களுக்கு பேட்டி அளித்தார். அப்போது அவர் கூறியதாவது:-
அ.தி.மு.க. செயற்குழு 23-ந்தேதிக்கு தள்ளி வைக்கப்பட்டுள்ளது. மாபெரும் மறைந்த அரசியல் தலைவர்களுக்கு இரங்கல் தெரிவிப்பதை பலர் அரசியலாக்க வேண்டும் என்று முயற்சிக்கிறார்கள். அது தவிர்க்கப்பட வேண்டும்.
வெள்ளப்பாதிப்பை தடுக்கவும், அதனால் ஏற்படும் பின்விளைவுகளை தடுக்கவும், தமிழக அரசு 11 மாவட்டங்களில் வெள்ள அபாய எச்சரிக்கை கொடுத்துள்ளது. மேலும் ஐ.ஏ.எஸ். அதிகாரிகளை நியமனம் செய்து கண்காணிக்கப்படுகிறது.
காவிரி, வைகை கரை யோரப் பகுதிகளில் வெள்ள பாதிப்பை தடுக்க ஒலி பெருக்கி மூலம் எச்சரிக்கை விடப்பட்டுள்ளது. காவிரி கரையோரங்களில் நட மாடுவது, செல்பி எடுப்பது போன்றவை தீவிரமாக கண்காணிக்கப்படுகிறது.
கடைமடை பகுதிவரை காவிரி தண்ணீர் முழுவதுமாக சென்றுவிட்டது. தேனி மாவட்டத்தில் நிலச்சரிவு காரணமாக பாதை தடை செய்யப்பட்டுள்ளது. நானும் கலெக்டரும் ஆய்வு செய்தோம். விரைவில் நிலச் சரிவு பகுதி சீர் செய்யப்படும். மேலும் பாதிக்கப்பட்ட மக்களுக்கு நிவாரண உதவி வழங்கப்படும்.
இவ்வாறு அவர் கூறினார். #Cauvery #PaneerSelvam
