சென்னை:
விடுதலை சிறுத்தைகள் கட்சி தலைவர் தொல்.திருமாவளவன் முதல்- அமைச்சர் எடப்பாடி பழனிசாமியை அவருடைய இல்லத்தில் சந்தித்தார்.
அப்போது முதல்-அமைச்சரிடம் 3 கோரிக்கைகள் அடங்கிய மனுவை கொடுத்தார். மனு குறித்து தொல்.திருமாவளவன் நிருபர்களிடம் கூறியதாவது:-
விடுதலை சிறுத்தைகள் கட்சி பொது செயலாளர் ரவிகுமாருக்கு கொலை மிரட்டல் உள்ளது. பெங்களூரில் கொலை செய்யப்பட்ட பத்திரிகையாளர் கவுரி லங்கேஷ் கொலை தொடர்பாக சிலர் கைது செய்யப்பட்டனர். அவர்கள் மூலம் ரவிகுமாரும் கொலை பட்டியலில் இருப்பதாக மத்திய உளவுத்துறை மாநில உளவுத்துறைக்கு தெரிவித்துள்ளது. எனவே, ரவிகுமாருக்கு மாநில அரசு தகுந்த பாதுகாப்பு வழங்க வேண்டும் என்று முதல்- அமைச்சரிடம் கேட்டுக்கொண்டேன்.
எஸ்.சி.எஸ்.டி. மாணவர்களுக்கு மத்திய அரசு வழங்கிவந்த கல்வி உதவித் தொகையை நிறுத்தி உள்ளது. இதற்கு 40 சதவீதம் தொகையும், மத்திய அரசு 60 சதவீத தொகையும் வழங்கினார்கள்.
இதற்காக மத்திய அரசு ரூ.1500 கோடி வழங்கியது. இந்த தொகை நிறுத்தப்படுவதால் உயர்கல்வி பயிலும் எஸ்.சி.எஸ்.டி. மாணவர்கள் பாதிக்கப்படக்கூடாது. எனவே மாநில அரசு இந்த மாணவர்களுக்கு முழு உதவித் தொகையாக கிடைக்க நடவடிக்கை எடுக்க வேண்டும் என்றும் கோரிக்கை விடுத்துள்ளோம்.
தமிழ்நாட்டின் இயற்கை வளத்தை காக்க எனது பிறந்தநாளையொட்டி வனப்பகுதியில் பனை விதை நடும் இயக்கத்தை தொடங்கினேன். இதன் மூலம் 1 லட்சம் பனைவிதைகளை நட திட்டமிட்டோம். தற்போது 5 லட்சம் பனை விதைகள் நடப்பட்டுள்ளன.
தமிழக அரசு 1 கோடி பனைவிதைகளை நட ஏற்பாடு செய்ய வேண்டும். தமிழகத்தின் பாரம்பரிய மரமான பனைமரம் வளர்ப்பதன் மூலம் இயற்கை வளத்தை மேம்படுத்த வேண்டும் என்றும் முதல்- அமைச்சரிடம் கோரிக்கை விடுத்துள்ளேன்.
இவ்வாறு திருமாவளவன் கூறினார். #TNCM #EdappadiPalaniswami #Thirumavalavan
