சென்னை:
ஜெயலலிதாவின் மரணத்துக்கு பிறகு சசிகலாவுக்கு எதிராக போர்க்கொடி தூக்கிய ஓ.பன்னீர் செல்வம் பின்னர் எடப்பாடி பழனிசாமியுடன் இணைந்தார்.
இதன் பின்னர் அ.தி.மு.க. ஒருங்கிணைப்பாளரான ஓ.பன்னீர்செல்வம், துணை முதல்-அமைச்சர் பொறுப்பையும் வகித்து வருகிறார். அ.தி.மு.க. இணை ஒருங்கிணைப்பாளராக எடப்பாடி பழனிசாமி உள்ளார்.
இவர்கள் இருவரும் கைகோர்த்த பின்னர் ஓரம் கட்டப்பட்ட டி.டி.வி.தினகரன், ஆர்.கே.நகர் இடைத்தேர்தலில் சுயேட்சையாக போட்டியிட்டு வெற்றி பெற்றார்.
இதன் பிறகு அ.தி.மு.க.வில் உள்ள தனது ஆதரவாளர்களை ஒருங்கிணைத்து அம்மா மக்கள் முன்னேற்ற கழகம் என்ற பெயரில் புதிய கட்சியை தொடங்கி நடத்தி வருகிறார். அ.தி.மு.க.வில் இருப்பது போன்றே தனது கட்சியிலும் அமைப்புகளை ஏற்படுத்தி புதிய நிர்வாகிகளையும் தினகரன் நியமித்துள்ளார்.
தமிழகம் முழுவதும் மாவட்ட செயலாளர்கள் முதல் கிளை கழக நிர்வாகிகள் வரையில் அத்தனை பொறுப்புகளிலும் தனது கட்சியில் தினகரன் ஆட்களை நியமித்துள்ளார்.
அ.தி.மு.க.வில் இருந்து பிரிந்து சென்ற அனைவரும் மீண்டும் கட்சியில் சேரலாம் என்று எடப்பாடி பழனிசாமியும், ஓ.பன்னீர்செல்வமும் அழைப்பு விடுத்து வருகிறார்கள். இது தொடர்பாக பலமுறை அவர்கள் பிரிந்து சென்ற கட்சியினருக்கு வேண்டுகோளும் விடுத்துள்ளனர்.
அ.தி.மு.க.வின் நலன் கருதி பிரிந்தவர்கள் மீண்டும் தாய் கழகத்தில் தங்களை இணைத்துக் கொள்ள வேண்டும். அதுபோன்று வருபவர்களை வரவேற்க காத்திருக்கிறோம் என்று இருவரும் கூறி இருக்கிறார்கள்.
அதே நேரத்தில் தினகரனை, எந்த சூழ்நிலையிலும் அ.தி.மு.க.வில் சேர்த்துக் கொள்ள வாய்ப்பு இல்லை என்றே அ.தி.மு.க. தரப்பில் கூறப்பட்டு வந்தது. இதற்கு தினகரன் ஆதரவாளர்கள் எதிர்ப்பு தெரிவித்து இருந்தனர்.
இந்த நிலையில் தினகரனை அ.தி.மு.க.வில் சேர்க்க மாட்டோம் என்பதை முதல்-அமைச்சர் எடப்பாடி பழனிசாமி திட்டவட்டமாக தெரிவித்து உள்ளார்.
சென்னை கோட்டையில் நேற்று நடைபெற்ற அமைச்சரவை கூட்டத்துக்கு பின்னர், அமைச்சர்களுடன் எடப்பாடி பழனிசாமியும், ஓ.பன்னீர் செல்வமும் தனியாக ஆலோசனை நடத்தினர். அப்போது தினகரன் அணியை அ.தி.மு.க.வுடன் இணைப்பது குறித்தும் விவாதிக்கப்பட்டது.
இந்த கூட்டத்தில் தினகரனுக்கு எதிரான நடவடிக்கைகளை தீவிரப்படுத்துவது என்று முடிவு செய்யப்பட்டது. அமைச்சர்கள் மத்தியில் பேசிய எடப்பாடி பழனிசாமி, தினகரன் கட்சியை அ.தி.மு.க.வில் இணைப்பதற்கான எந்த சூழலும் இல்லை என்றும், தினகரனை தவிர அவருடன் இருக்கும் அனைவருமே எப்போது வேண்டுமானாலும் கட்சியில் வந்து சேரலாம் என்று தெரிவித்தார்.
அதுபோன்று மனம் மாறி வருபவர்களை வரவேற்க அ.தி.மு.க. காத்திருக்கிறது என்றும் எடப்பாடி பழனிசாமி கூறினார்.
அ.தி.மு.க.வுடன், தினகரன் கட்சியை இணைக்க பிரதமர் மோடி முயற்சி செய்து வருவதாக வெளியாகும் தகவல்களில் உண்மை இல்லை என்றும், அதுபோல எந்த முயற்சியும் நடைபெறவில்லை என்றும் எடப்பாடி பழனிசாமி தெளிவுப்படுத்தி உள்ளார்.
அமைச்சர்கள் பேட்டி அளிக்கும்போதும், பொதுக்கூட்டங்களில் பேசும் நேரங்களிலும் தினகரனை கண்டிப்பாக தாக்கி பேச வேண்டும் என்றும், கடுமையாக விமர்சனம் செய்ய வேண்டும் என்றும் ஓ.பன்னீர்செல்வம் அறிவுறுத்தி உள்ளார்.
தற்போதுள்ள அமைச்சர்களில் சிலர் தினகரனை விமர்சித்து பேசுவதில்லை என்கிற பேச்சு பரவலாக உள்ளது. இதனை மாற்றும் வகையில் அமைச்சர்கள் அனைவருமே தினகரன் எதிர்ப்பை காட்ட வேண்டும் என்றும் ஓ.பன்னீர் செல்வம் கூறி உள்ளார். முதல்-அமைச்சர் எடப்பாடி பழனிசாமியும் இதற்கு பச்சைக்கொடி காட்டி உள்ளார்.
தினகரனை விமர்சித்து பேச வேண்டும் என்கிற கருத்தில் அவரும் உடன்பட்டுள்ளார். இதன் மூலம் தினகரன் அணியில் இருப்பவர்களை சேர்க்க தயாராக இருக்கும் எடப்பாடி பழனிசாமியும், ஓ.பன்னீர் செல்வமும் தினகரனை அருகில் அண்டவே விடக்கூடாது என்பதில் மிகவும் உறுதியாக இருப்பதும் தெளிவாகி உள்ளது. எனவே, இனி வரும் காலங்களில் அமைச்சர்கள், தினகரனை காரசாரமாக விமர்சனம் செய்ய வாய்ப்பு அதிகமாக உள்ளது. #EdappadiPalanisami #ADMK
