தேனி:
பாராளுமன்ற தேர்தலில் போட்டியிட விரும்புவோரிடம் இருந்து விருப்ப மனு வாங்கும் பணி அ.தி.மு.க.வில் நேற்று தொடங்கியது.
கட்சியின் ஒருங்கிணைப்பாளர் ஓ.பன்னீர்செல்வம், இணை ஒருங்கிணைப்பாளர் முதல்-அமைச்சர் எடப்பாடி பழனிசாமி ஆகியோர் விருப்ப மனு வழங்கும் பணியை துவக்கி வைத்தனர்.
துணை முதல்-அமைச்சர் ஓ.பன்னீர்செல்வத்தின் மகன் ரவீந்திரநாத்குமார் தேனி தொகுதிக்கும், முன்னாள் அமைச்சர் கோகுல இந்திரா மத்திய சென்னை தொகுதிக்கும், எம்.ஜி.ஆர். மன்ற செயலாளர் தமிழ் மகன் உசேன் ராமநாதபுரம், வேலூர் தொகுதிக்கும் விருப்ப மனுக்கள் வாங்கிச் சென்றனர்.
முன்னாள் அமைச்சர்கள் பி.வி.ரமணா, மாதவரம் மூர்த்தி, முக்கூர் சுப்பிரமணியன், முன்னாள் எம்.எல்.ஏ. ராஜலட்சுமி, வடசென்னை மாவட்ட செயலாளர் ராஜேஷ் உள்பட 250-க்கும் மேற்பட்டவர்கள் விருப்ப மனுக்களை பெற்றனர்.
துணை முதல்-அமைச்சர் ஓ.பன்னீர்செல்வத்தின் மகன் ரவீந்திரநாத் குமாரிடம் கேட்ட போது அவர் கூறியதாவது:-
நான் கட்சியின் அடிமட்ட தொண்டனாக இருந்து படிப்படியாக கட்சி பொறுப்புக்கு வந்தவன். அம்மா எனக்கு தேனி மாவட்ட இளைஞர் பாசறை செயலாளர் பதவியை தந்து அழகு பார்த்தார். அதில் திறம்பட பணியாற்றியதால் மாவட்ட ஜெயலலிதா பேரவை செயலாளர் பதவி வழங்கப்பட்டது.
கட்சி நிர்வாகிகள் அனைவருக்கும் நான் நன்கு அறிமுகம் ஆனவன்.
பாராளுமன்ற தேர்தலில் தேனி தொகுதியில் போட்டியிட விருப்பப்பட்டேன். எனது முடிவை தந்தையிடம் தெரிவித்தேன். அவர் மறுப்பு தெரிவிக்கவில்லை.
அ.தி.மு.க.வில் யார் வேண்டுமானாலும் விருப்ப மனு வாங்கிக் கொள்ளலாம் என்றார்.
நான் இதுவரை பல்வேறு தேர்தல்களில் கழக வேட்பாளர்களின் வெற்றிக்காக பணியாற்றிய அனுபவம் உண்டு. இந்த முறை நான் தேனி தொகுதியில் போட்டியிட விரும்புகிறேன். கட்சி அனுமதித்தால் களம் இறங்குவேன். வெற்றிக் கனியை சமர்ப்பிப்பேன்.
எனக்கு தேர்தலில் போட்டியிட வாய்ப்பு கிடைக்குமா? கிடைக்காதா? என்பதை கட்சி தலைமை முடிவு செய்யும். கட்சித் தலைமை எந்த முடிவு எடுத்தாலும் அதற்கு நான் கட்டுப்படுவேன்.
இவ்வாறு அவர் கூறினார். #ADMK #OPS #Ravindranathkumar
