மேல்மலையனூர் பகுதியில் இடிமின்னலுடன் பலத்த மழை- மின் நிறுத்தத்தால் விபத்து தவிர்ப்பு

மேல்மலையனூர்:

மேல்மலையனூர் நேற்று பிற்பகல் வானம் மேகமூட்டத்துடன் காணப்பட்டது. மாலை 4 மணிக்கு இடி, மின்னல், காற்றுடன் பலத்த மழை பெய்தது. இந்த மழை சுமார் 1 மணிநேரம் நீடித்தது. இதன் காரணமாக தாழ்வான பகுதிகளில் வெள்ளம் பெருக்கெடுத்து ஓடியது. பலத்த காற்று வீசியதால் தாயனூர் துணை மின் நிலையம் எதிரில் உள்ள மின்கம்பத்திலிருந்த மின்கம்பி அறுந்து மேல்மலையனூர் அவலூர்பேட்டை செல்லும் சாலையின் குறுக்கில் விழுந்தது.

முன்கூட்டியே மின்சாரம் நிறுத்தி இருந்ததால் பெரும் விபத்து தடுக்கப்பட்டது. இந்த மழை மேல்மலையனூர் சுற்றுப் புறப்பகுதிகளான சிறுதலைப்பூண்டி, மாந்தாங்கல், பழம் பூண்டி, பறையன் தாங்கல், செக்கடிக்குப்பம், கொடுக்கன்குப்பம் உள்ளிட்ட பகுதிகளிலும் பெய்ததால் விவசாயிகள் மகிழ்ச்சி அடைந்தனர்.