சென்னை

தென் தமிழகம் மற்றும் அதனை ஒட்டிய பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது. மேலும் லட்சத்தீவு மற்றும் அதனை ஒட்டிய தென்கிழக்கு அரபிக் கடல் பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது.

இதனால் இன்று தமிழகத்தில் ஒரு சில இடங்களில், புதுவை மற்றும் காரைக்கால் பகுதிகளிலும் இடி மின்னலுடன் கூடிய லேசானது முதல் மிதமான மழை பெய்யக்கூடும். ராமநாதபுரம், புதுக்கோட்டை, தஞ்சாவூர், திருவாரூர், நாகை, மயிலாடுதுறை, கடலூர் மாவட்டங்கள் மற்றும் காரைக்கால் பகுதிகளில் ஓரிரு இடங்களில் கனமழையும் சென்னையில் மிதமான மழைக்கு வாய்ப்புள்ளதாக சென்னை வானிலை ஆய்வு மையம் தெரிவித்து உள்ளது. இதனால் பல்வேறு பகுதிகளில் மழை பெய்து வருகிறது.

இதனிடையே சென்னை மற்றும் புறநகர் பகுதிகளில் நேற்று இரவு முதல் மழை பெய்து வருகிறது. இன்று காலையும் கோடம்பாக்கம், தியாகராய நகர், நுங்கம்பாக்கம், எழும்பூர், வடபழனி, புரசைவாக்கம், வேப்பேரி, பட்டினம்பாக்கம், மந்தைவெளி, வேளச்சேரி, மடிப்பாக்கம் உள்ளிட்ட பல்வேறு பகுதிகளில் மழை பெய்து வருகிறது.

கடந்த 24 மணி நேரத்தில் அதிகபட்சமாக திருவள்ளூர் மாவட்டம் கும்மிடிப்பூண்டியில் 6 செ.மீ. மழை பதிவாகியுள்ளது.

பொன்னேரி, செங்குன்றத்தில் தலா 3 செ.மீ, பூண்டி, திருத்தணி, ஊத்துக்கோட்டை, பூவிருந்தவல்லியில் தலா 2 செ.மீ மழை பதிவு.

ஆர்.கே.பேட்டை, ஆவடி, சோழவரம், திருவாலங்காடு, திருவள்ளூர், தாமரைப்பாக்கம், ஜமீன் கொரட்டூரில் தலா 1 செ.மீ மழை பதிவாகியுள்ளது.

சென்னை:

பெருநகர சென்னை மாநகராட்சி வெளியிட்டுள்ள செய்திக்குறிப்பில் கூறியிருப்பதாவது:-

இந்திய தேர்தல் ஆணையத்தின் உத்தரவின்படி, 1.1.2025-ம் தேதியை தகுதி ஏற்படுத்தும் நாளாக கொண்டு வாக்காளர் பட்டியலில் திருத்தம் மேற்கொள்ளும் வகையில் சென்னை மாவட்டத்தில் உள்ள 16 சட்டமன்ற தொகுதிகளுக்கான வரைவு வாக்காளர் பட்டியல் 29.10.2024 அன்று வெளியிடப்பட்டது.

இந்த வரைவு வாக்காளர் பட்டியல் சென்னை மாநகராட்சி மண்டல அலுவலகங்கள் 4, 5, 6, 8, 9, 10, 13 மற்றும் அனைத்து வாக்குச்சாவடி மையங்களிலும் பொதுமக்களின் பார்வைக்கு வைக்கப்பட்டுள்ளது. பொதுமக்கள் தங்களது பெயர் மற்றும் குடும்பத்தினர் பெயர் விவரங்கள் வரைவு வாக்காளர் பட்டியலில் இடம் பெற்றுள்ளனவா? என்பதை சரிபார்த்து கொள்ள கேட்டுக்கொள்ளப்படுகிறார்கள்.

வாக்காளர் பட்டியலில் பெயர் சேர்த்தல், நீக்குதல், முகவரி மாற்றம் செய்தல் போன்றவற்றை வாக்காளர்கள் மேற்கொள்வதற்கு வசதியாக நாளை (சனிக்கிழமை) மற்றும் 17-ந்தேதி (ஞாயிற்றுக்கிழமை) மற்றும் 23, 24 ஆகிய தேதிகளில் சென்னை மாவட்டத்திற்கு உட்பட்ட 947 வாக்குச்சாவடி மையங்களில் சிறப்பு முகாம்கள் நடத்தப்பட உள்ளன.

வாக்காளர் பட்டியலில் பெயர் சேர்க்கப்படாமல் உள்ளவர்கள் மற்றும் 1.1.2025 அன்று 18 வயது பூர்த்தி அடைபவர்கள் (1.1.2007-ந் தேதிக்கு முன்பாக பிறந்தவர்கள் மற்றும் 17 வயது நிரம்பி 18 வயது பூர்த்தி அடையும் நிலையில் உள்ளவர்களும்) படிவம்-6 மூலம் வாக்காளர் பட்டியலில் பெயர் சேர்த்துக்கொள்ளலாம்.

பெயர் நீக்கம் மற்றும் சட்டமன்ற தொகுதிக்குள்ளேயே ஒரு இடத்தில் இருந்து மற்றொரு இடத்திற்கு குடிபெயர்ந்து புதிய வசிப்பிடத்தில் உள்ளவர்கள், மேலும் வேறு தொகுதிக்கு குடிபெயர்ந்தவர்கள் வாக்காளர் பட்டியலில் பெயர் சேர்க்க மற்றும் திருத்தங்கள் செய்ய உரிய படிவத்தை பூர்த்தி செய்து அதற்கான ஆதாரத்தை இணைத்து அளிக்க வேண்டும்.

சிறப்பு முகாம் மட்டுமல்லாமல் பெருநகர சென்னை மாநகராட்சி மண்டல அலுவலரின் அலுவலகத்தில் 28-ந்தேதி வரை காலத்திற்குள் விண்ணப்பிக்கலாம். மேலும், http://voters.eci.gov.in/ என்ற இணையதளம் மூலமாகவும் பெயர்கள் சேர்க்கவும், நீக்கவும், திருத்தங்களை மேற்கொள்ளவும் விண்ணப்பிக்கலாம்.

இவ்வாறு அதில் கூறப்பட்டுள்ளது.

சென்னை:

வடகிழக்கு பருவமழை கடந்த மாதம் (அக்டோபர்) 15-ந்தேதி தொடங்கியதாக அறிவிக்கப்பட்டாலும், பருவமழை தீவிரம் அடையவில்லை. இந்த மாதம் முதல் வாரத்தில் காற்றழுத்த தாழ்வுப் பகுதி உருவாகி பருவமழை தீவிரம் அடையும் என சொல்லப்பட்டது. அந்த காற்றழுத்த தாழ்வுப் பகுதி உருவாகுவதிலேயே தாமதம் ஆனது. 3 முறை தள்ளிப்போய், கடந்த 11-ந்தேதி வங்கக்கடலில் காற்றழுத்த தாழ்வுப் பகுதி உருவானது. இந்த தாழ்வுப் பகுதியால் தமிழ்நாட்டில் பரவலாக மழைக்கு வாய்ப்பு இருக்கும் என வானிலை ஆய்வு மையமும், தனியார் வானிலை ஆய்வாளர்களும் தெரிவித்தனர்.

ஆனால் எதிர்பார்த்த அளவுக்கு மழை இல்லை. காற்றழுத்த தாழ்வுப் பகுதியும் வலு இழந்து போனது. இதனால் வடகிழக்கு பருவமழை தீவிரம் அடைவதில் மீண்டும் தாமதம் ஏற்பட்டு இருப்பதாக வானிலை ஆய்வாளர்கள் தெரிவிக்கின்றனர்.

இதற்கான காரணம் என்ன? வங்கக்கடலில் உருவான காற்றழுத்த தாழ்வுப் பகுதியால் எதிர்பார்த்த மழை கிடைக்காமல் போனது ஏன்? என்பது குறித்து தனியார் வானிலை ஆய்வாளர் டெல்டா வெதர்மேன் ஹேமச்சந்தரிடம் கேட்டபோது அவர் கூறியதாவது:-

வழக்கமாக 2 சுழற்சிகள் ஒன்று சேர்ந்து தாழ்வுப் பகுதியாக வந்த நிகழ்வுகளில் நல்ல மழை கிடைத்திருக்கிறது. ஆனால் கடந்த வாரத்தில் மியான்மரில் உருவான காற்று சுழற்சி வலு இழந்து, தென்மேற்கு வங்கக் கடலில் இருந்த காற்று சுழற்சியுடன் இணைந்து தாழ்வுப் பகுதியாக இலங்கையை நோக்கி தமிழக கடற்கரை பகுதிக்கு வரும் என எதிர்பார்க்கப்பட்டது.

ஆனால் தென்மேற்கு வங்கக்கடலில் இருந்த காற்று சுழற்சி வலு குறைந்து, மியான்மரில் இருந்து வந்த காற்று சுழற்சி வலுபெற்று மத்திய மேற்கு வங்கக் கடல் பகுதிக்கு நகர்ந்துவிட்டது. இதனால் எதிர்பார்த்த மழை கிடைக்காமல் போய்விட்டது. இருப்பினும், உள் மாவட்டங்கள், மேற்கு மாவட்டங்களில் மழை பெய்து இருப்பதை பார்க்க முடிகிறது.

அடுத்ததாக இலங்கைக்கு தென் கிழக்கில் காற்று சுழற்சி ஒன்று உருவாகியுள்ளது. இதன் காரணமாக 16-ந்தேதி (நாளை) வரை மழை இருக்கும். அதிலும் 15-ந்தேதி (அதாவது இன்று) காலை வட கடலோர மாவட்டங்களிலும், பிற்பகலில் 11 மணி முதல் 2 மணி வரை உள் மாவட்டங்களிலும், இரவில் மேற்கு தொடர்ச்சி மலையையொட்டிய பகுதிகளிலும் மழை பெய்யும். ஓரிரு இடங்களில் மிக கனமழைக்கான வாய்ப்பும் உள்ளது. அதன்பின்னர், ஓரிரு நாட்கள் இடைவெளிவிட்டு கிழக்கு காற்றினால் 20-ந்தேதியில் இருந்து மழை தொடங்கும். 24-ந்தேதியோ அல்லது அதற்கு பிறகோ தாழ்வுப் பகுதி ஒன்று உருவாகி, புயலாகவும் மாறுவதற்கான வாய்ப்பு அதிகம் உள்ளது. இந்த புயல் மழையை கொடுக்கக் கூடியதாகவே இருக்கும்.

இவ்வாறு அவர் கூறினார்.

இதன்படி பார்க்கையில் புயலுடன், வடகிழக்கு பருவமழை ஆட்டத்தை தமிழ்நாட்டில் தொடங்குவதற்கான வாய்ப்பு இருப்பதாகவே சொல்லப்படுகிறது. இந்த தாமதத்தால், அடுத்தடுத்து வரக்கூடிய நிகழ்வுகளும் தள்ளிப்போகிறது.

சென்னை குன்றத்தூரில் வீட்டில் எலியைக் கட்டுப்படுத்த வைக்கப்பட்ட மருந்து காற்றில் பரவி, தூங்கிக் கொண்டிருந்த 2 குழந்தைகள் மூச்சுத் திணறி உயிரிழந்த சம்பவம் அதிர்ச்சியை ஏற்படுத்தியுள்ளது.

கிரிதரன் என்பவர் தனது மனைவி பவித்ராவு மற்றும் விஷாலினி (6 வயது) சாய் சுதர்சன் (4 வயது) ஆகிய 2 குழந்தைகளுடன் குன்றத்தூரில் வசித்து வருகிறார். அவரது வீட்டில் எலி தொல்லை அதிகமாக இருந்ததால் எலி மருந்து, எலி பேஸ்ட் ஆகியவற்றை அதிகமாகப் பயன்படுத்தி வந்துள்ளார்.

இந்நிலையில் நேற்றிரவு எலி மருந்தின் நெடி வீடு முழுவதும் பரவியுள்ளது. இதனை சுவாசித்த நால்வருக்கும் மூச்சுத்திணறல் ஏற்பட்டுள்ளது.

2 குழந்தைகளும் மூச்சுத் திணறி உயிரிழந்த நிலையில், பெற்றோர் உயிருக்கு ஆபத்தான நிலையில் மருத்துவமனையில் சிகிச்சை பெற்று வருகின்றனர்.

இந்த விவகாரம் தொடர்பாக எலியை கட்டுப்படுத்த மருந்து வைத்த Pest Control நிறுவனம் மீது வழக்கு பதிந்துள்ள போலீசார் விசாரணை மேற்கொண்டு வருகின்றனர்.

சென்னை:

தென் தமிழகம் மற்றும் அதனை ஒட்டிய பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது. லட்சத்தீவு மற்றும் அதனை ஒட்டிய தென்கிழக்கு அரபிக்கடல் பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது. இதன் காரணமாக தமிழகத்தின் பல்வேறு பகுதிகளில் லேசானது முதல் மிதமான மழைக்கு வாய்ப்பிருப்பதாக வானிலை ஆய்வு மையம் தெரிவித்து இருந்தது.

இந்த நிலையில், சென்னை, திருவள்ளூர், வேலூர், திருவண்ணாமலை, திண்டுக்கல், மதுரை, சிவகங்கை, தென்காசி, திருநெல்வேலி உள்ளிட்ட 36 மாவட்டங்களில் இரவு 7 மணி வரை மழைக்கு வாய்ப்பு உள்ளதாக வானிலை ஆய்வு மையம் தெரிவித்துள்ளது.

சென்னை கிண்டி அரசு மருத்துவமனையில் மருத்துவர் பாலாஜி கத்தியால் குத்தப்பட்ட சம்பவம் பெரும் பரபரப்பை ஏற்படுத்தியது. மருத்துவர் கத்தியால் குத்தப்பட்ட சம்பவத்திற்கு எதிர்ப்பு தெரிவித்து மருத்துவர்கள் போராட்டத்தில் ஈடுபட்டனர்.

மேலும், இந்திய மருத்துவர் சங்கம் கண்டனம் தெரிவித்ததோடு ஒருநாள் வேலை நிறுத்த போராட்டத்தையும் அறிவித்தது. தமிழ்நாடு சுகாதாரத்துறை அமைச்சர் மா. சுப்பிரமணியம் மருத்துவர்கள் பாதுகாப்பை உறுதிப்படுத்தும் நோக்கில் அனைத்து மருத்துவ கல்லூரி மருத்துவமனைகளிலும் புறக்காவல் நிலையங்கள் அமைக்கப்படும் என்று தெரிவித்து இருந்தார்.

இதுதவிர, மருத்துவமனைகளில் தேவையான வெளிச்சம், மற்றும் விளக்குகள் உள்ளனவா? என்பதை உறுதி செய்ய வேண்டும் என்று தெரிவித்து இருந்தார். இந்த நிலையில், மருத்துவர் தாக்கப்பட்ட சம்பவத்தை தொடர்ந்து டிஜிபி சங்கர் ஜிவால், மருத்துவர்கள் பாதுகாப்பு குறித்து 24 மணி நேரமும் கண்காணிக்க வேண்டும் என ஐ.ஜி.-க்கள், காவல் ஆணையர்களுக்கு வாய்மொழி உத்தரவு பிறப்பித்துள்ளதாக தகவல் வெளியாகி உள்ளது.

அனைத்து மருத்துவமனைகளுக்கும் 24 மணி நேர பாதுகாப்பு அளிக்க வேண்டும் என்று தெரிவித்ததாக கூறப்படுகிறது. இத்துடன் சென்னையில் வருகிற நவம்பர் 18 ஆம் தேதி ஆலோசனை கூட்டம் நடத்த முடிவு செய்யப்பட்டுள்ளதாகவும் இந்த கூட்டத்தில் கலந்து கொள்ள காவல் ஐ.ஜி.க்கள் மற்றும் காவல் ஆணையர்களுக்கு அழைப்பு விடுக்கப்பட்டுள்ளதாக கூறப்படுகிறது. 

சென்னையில் கைதிகளை அழைத்துச் செல்லும் போது போலீஸ் வாகனத்தில் அமர்ந்து மது அருந்திய சிறப்பு உதவி ஆய்வாளர் லிங்கேஸ்வரன் பணியிடை நீக்கம் செய்யப்பட்டுள்ளார்.

லிங்கேஸ்வரன் பரங்கிமலை ஆயுதப்படையில் சிறப்பு உதவி ஆய்வாளராக பணியாற்றி வருகிறார். கைதியை சிறையில் விட்டு விட்டு திரும்பியபோது, காவல் வாகனத்தில் சீருடை அணியாமல் லிங்கேஸ்வரன் மது அருந்தும் வீடியோ இணையத்தில் வெளியானது.

உயர் அதிகாரிகள் நடத்திய விசாரணையில் லிங்கேஸ்வரன் மது அருந்தியது உறுதியான நிலையில் அவர் மீது நடவடிக்கை எடுக்கப்பட்டுள்ளது.

சென்னை:

சென்னை கிண்டியில் உள்ள அரசு மருத்துவமனையில் மருத்துவர் பாலாஜியை கத்தியால் குத்திய சம்பவத்தையடுத்து அரசு மருத்துவமனைகளில் மேற்கொள்ளப்பட விருக்கும் பாதுகாப்பு நடவடிக்கை பற்றி மக்கள் நல்வாழ்வுத் துறை அமைச்சர் மா.சுப்பிரமணியன் நிருபர்களுக்கு பேட்டி அளித்தார். அப்போது அவர் கூறியதாவது:-

கத்திக்குத்தால் காயம் அடைந்த மருத்துவர் பாலாஜியை இன்று நேரில் பார்த்து நலம் விசாரித்தேன். அவர் நலமுடன் இருக்கிறார். அவருக்கு ஏற்கனவே பேஸ் மேக்கர் கருவி பொருத்தப்பட்டுள்ளது. அதன் செயல் பாடுகளை அந்த நிறுவனத்தை சேர்ந்தவர்கள் நேரில் வந்து ஆய்வு செய்துள்ளார்கள்.

தீவிர சிகிச்சை பிரிவில் இருந்து மருத்துவர் பாலாஜி பிற்பகலில் கட்டணம் செலுத்தும் தனி வார்டுக்கு மாற்றப்பட்டார்.

மருத்துவர் பாலாஜி மிகச் சிறந்த மருத்துவர். அவருக்கு இன்னும் 5 ஆண்டுகள் பணிக்காலம் உள்ளது. இந்த பணிக்காலத்தையும் கிண்டி ஆஸ்பத்திரியிலேயே செய்ய வாய்ப்பு கிடைத்தால் மகிழ்ச்சி அடைவேன் என்று நலம் விசாரித்த முதலமைச்சர் மு.க.ஸ்டாலினிடம் தெரிவித்துள்ளார்கள்.

டாக்டர் பாலாஜி மீது கொடுமையான தாக்குதல் நடத்திய விக்னேஷ் மீது 126 (2) அத்துமீறி நுழைதல், 115 (2) காயத்தை ஏற்படுத்த வேண்டும் என்ற நோக்கத்துடன் செயல்படுதல், 118 (1) ஆபத்தான ஆயுதங்களால் காயம் ஏற்படுத்துதல், 121 (2) பணியில் இருக்கும் பொது ஊழியருக்கு காயம் ஏற்படுத்துதல், 109 கொலை முயற்சியில் ஈடுபடுதல், 351 (3) உயிருக்கு ஆபத்தை விளைவிக்கும் வகையில் காயத்தை ஏற்படுத்தி மிரட்டுதல் என 7 பிரிவுகளின் கீழ் வழக்குப்பதிவு செய்யப்பட்டுள்ளது.

இந்த சம்பவம் மருத்துவ ஊழியர்களுக்கு மிகப்பெரிய வருத்தத்தை ஏற்படுத்தி உள்ளது. இருப்பினும் அரசோடு இணைந்து மருத்துவ கட்டமைப்பு மற்றும் பொதுமக்கள் சேவை ஆகியவை பாதித்து விடக்கூடாது என்பதில் மருத்துவர்களும் கவனமாக இருப்பதற்கு பாராட்டுக்கள்.

அனைத்து அரசு மருத்துவக் கல்லூரி மருத்துவமனை மற்றும் இதர அரசு மருத்துவ மனைகளில் காவல் மற்றும் சுகாதாரதுறை இணைந்து பாதுகாப்புக் குறித்து கூட்டுத் தணிக்கை நடத்தப்பட வேண்டும்.

36 மருத்துவ கல்லூரி மருத்துவமனைகள், 37 மாவட்ட அரசு மருத்துவ மனைகள் மற்றும் வட்டார மருத்துவமனைகளில் விரைவில் கண்காணிப்பு கேமராக்கள் பொருத்தப்படும்.

அனைத்து மருத்துவ கல்லூரி மருத்துவமனைகளிலும் புறக்காவல் நிலையங்கள் அமைக்கப்படும். மருத்துவமனைகளில் தேவையான வெளிச்சம், மற்றும் விளக்குகள் உள்ளனவா? என்பதை உறுதி செய்ய வேண்டும்.

அனைத்து மருத்துவர்கள் மற்றும் மருத்துவப் பணி சார்ந்த பணியாளர்கள் காவல் உதவி என்கிற செயலியை அவர்களது கைப்பேசிகளில் பதிவிறக்கம் செய்து கொள்ள வேண்டும்.

பொதுமக்கள் மற்றும் நோயாளிகளின் உதவியாளர்கள் மருத்துவமனைகளில் அனுமதிக்கப்படுவதை முறைப்படுத்த பார்வையாளர் அடையாள அட்டை முறை அமல்படுத்தப்படும்.

அரசு மருத்துவ கல்லூரி மருத்துவமனைகளில் காலை 9 மணி முதல் மதியம் 1 மணி வரை வெளி நோயாளிகள் பிரிவு செயல்படுகிறது. இதில் தினமும் ஆயிரக்கணக்கானோர் வருகிறார்கள். எனவே ஸ்கேன், மெட்டல் டிடெக்டர் பரிசோதனையின் சாத்திய கூறுகள் பற்றி ஆய்வு செய்து நடவடிக்கை எடுக்கப்படும்.

இந்த சம்பவத்தில் மருத்துவரின் சிகிச்சை முறையில் குறைசொல்ல எந்த முகாந்திரமும் இல்லை. விக்னேஷின் தாயார் புற்று நோய் முற்றிய நிலையில் இருக்கிறார். அவருக்கு உரிய சிகிச்சை அளிக்கிறார்கள். இருந்தாலும் தாய் பாதுகாக்கப்பட வேண்டும் என்ற வெறியால் இந்த செயலில் விக்னேஷ் ஈடுபட்டுள்ளார். இது கண்டனத்துக்குரியது. அவருக்கு கடுமையான தண்டனை பெற்று தரப்படும்.

இவ்வாறு அவர் கூறினார்.

சென்னை:

அமைச்சர் அன்பில் மகேஷ் பொய்யாமொழி தமிழகம் முழுவதும் ஒவ்வொரு தொகுதியாக சென்று பள்ளிக்கூடங்களில் ஆய்வு செய்து வருகிறார். 234-வது தொகுதியாக முதலமைச்சர் மு.க. ஸ்டாலினின் சொந்த தொகுதியான கொளத்தூர் தொகுதியில் இன்று ஆய்வு செய்தார்.

கொளத்தூர் தொகுதி ஜி.கே.எம். காலனி பகுதியில் அமைந்துள்ள அரசு மாதிரி மேல்நிலைப்பள்ளியில் குழந்தைகள் தினமான இன்று அமைச்சர் அன்பில் மகேஷ் பொய்யாமொழி விரிவான ஆய்வு மேற்கொண்டு மாணவர்கள் மற்றும் ஆசிரியர்களின் கோரிக்கைகளை கேட்டறிந்தார். ஏஐ தொழில் நுட்பத்தின் உதவியுடன் ரோபோடிக்ஸ் கருவிகளை தயாரித்துள்ள மாணவர்களை சந்தித்து வாழ்த்து தெரிவித்தார்.

முதலமைச்சரின் காலை உணவு திட்டத்தில் மாணவர்களுக்கு உணவு பரிமாறி, பள்ளியின் உட்கட்டமைப்பு குறித்து விரிவான ஆய்வு மேற்கொண்டார். பள்ளியின் கழிப்பறை வசதிகளையும் பார்வையிட்டார். இந்த நிகழ்ச்சியில் அமைச்சர் பி.கே.சேகர்பாபு, மேயர் பிரியா ஆகியோர் கலந்து கொண்டனர்.

பின்னர் அமைச்சர் அன்பில் மகேஷ் பொய்யா மொழி நிருபர்களிடம் கூறியதாவது:-

2022-ம் ஆண்டு அக்டோபர் மாதம் ஆரம்பிக்கப்பட்ட இந்த ஆய்வு பயணத்தை 234 தொகுதிகளிலும் உள்ள பள்ளிகளில் மேற்கொண்டேன். 2 வருடம் கழித்து 234-வது தொகுதியாக கொளத்தூர் தொகுதியில் நிறைவு செய்திருக்கிறேன்.

இன்று குழந்தைகள் தினத்தில் ஆய்வை முடிப்பது போல் தானாகவே அமைந்துள்ளது. 234 தொகுதிகளிலும் பயணம் செய்தது பல்வேறு அனுபவங்களை எனக்கு வழங்கி உள்ளது.

பேராசிரியர் அன்பழகன் பள்ளி மேம்பாட்டு திட்டத்தில் 5 வருடங்களில் 18 ஆயிரம் வகுப்பறைகள் கட்ட திட்டமிட்டோம்.

இதில் காம்பவுண்ட் சுவர், ஆய்வகம், கழிவறை ஆகியவையும் அடங்கும். இதுவரை 7,756 வகுப்பறைகள் கட்டி முடிக்கப்பட்டுள்ளது.

இன்னும் 6,353 வகுப்பறைகள் கட்டப்பட்டுக் கொண்டிருக்கிறது. தொடர் கண்காணிப்பு காரணமாக இதை கட்டி முடித்துள்ளோம்.

அரசு பள்ளியை நோக்கி நிறைய பேர் வரும் போது கட்டமைப்பு தேவைப்படுகிறது. அதற்கேற்ப வகுப்பறைகள் கட்டப்பட்டு வருகிறது.

இவ்வாறு அவர் கூறினார்.

தென்மேற்கு வங்கக் கடலில் கடந்த 12-ந் தேதி (செவ்வாய்க் கிழமை) நிலை கொண்டிருந்த காற்றழுத்த தாழ்வு பகுதி (புயல்சின்னம்) வலுவிழந்தது. இருப்பினும், வடதமிழக கடலோரப் பகுதிகளையொட்டிய தென்மேற்கு வங்கக் கடலில் சென்னைக்கு அருகே வளி மண்டல கீழடுக்கு சுழற்சி நிலவுகிறது. இதனால், திருவள்ளூா், வேலூா் மற்றும் ஆந்திராவில் கனமழை பெய்ய வாய்ப்புள்ளது.

இதற்கிடையே, கேரள கடலோரப் பகுதிகளை யொட்டிய தென்கிழக்கு அரபிக் கடலிலும் வளி மண்டல கீழடுக்கு சுழற்சி நிலவுகிறது.

இதன் காரணமாக, இன்று (வியாழக்கிழமை) முதல் வருகிற 19-ந்தேதி வரை தமிழகத்தில் பல இடங்களிலும், புதுச்சேரி மற்றும் காரைக்கால் பகுதிகளிலும், இடி-மின்னலுடன் கூடிய மிதமான மழைபெய்ய வாய்ப்புள்ளது.

இன்று செங்கல்பட்டு, காஞ்சிபுரம், கள்ளக்குறிச்சி, திருவண்ணாமலை, விழுப்புரம், கடலூா், மயிலாடுதுறை, நாகை, தஞ்சாவூா், திருவாரூா், அரியலூா், பெரம்பலூா், புதுக்கோட்டை, சிவகங்கை, மதுரை, விருதுநகா், தென்காசி, ராமநாதபுரம், தூத்துக்குடி, திருநெல்வேலி, கன்னியாகுமரி ஆகிய மாவட்டங்களிலும்,

நாளை (15-ந்தேதி) தஞ்சாவூா், திருவாரூா், நாகை, மயிலாடு துறை, புதுக்கோட்டை, திண்டுக்கல், தேனி, மதுரை, விருதுநகா், தென்காசி, தூத்துக்குடி, திருநெல்வேலி, கன்னியாகுமரி, ராமநாத புரம், சிவகங்கை, நீலகிரி, கோவை, திருப்பூா் ஆகிய மாவட்டங்கள் மற்றும் புதுச்சேரி, காரைக்கால் பகுதிகளிலும் கனமழை பெய்ய வாய்ப்புள்ளது.

மேலும் 16-ந்தேதி (சனிக்கிழமை) நீலகிரி, கோவை, திருப்பூா், தேனி, திண்டுக்கல் ஆகிய மாவட் டங்களில் ஓரிரு இடங்களில் கனமழை பெய்ய வாய்ப்பு உள்ளது.

சென்னை மற்றும் புறநகா் பகுதிகளில் இன்று மற்றும் நாளை இடி, மின்ன லுடன் கூடிய மிதமான மழை பெய்ய வாய்ப்புள்ளது.

சென்னை:

சென்னை கிண்டியில் உள்ள மருத்துவமனையில் புற்றுநோய் பிரிவில் பணியாற்றிய மருத்துவர் பாலாஜி மீது நடத்தப்பட்ட கொடூர தாக்குதல் பெரும் பரபரப்பை ஏற்படுத்தியுள்ளது.

அதே ஆஸ்பத்திரியில் தாம்பரத்தை அடுத்துள்ள புதுபெருங்களத்தூரை சேர்ந்த பிரேமா என்பவர் சிகிச்சை பெற்றுள்ளார்.

புற்று நோயால் பாதிக்கப்பட்டுள்ள அவரை மகன் விக்னேஷ் உடனிருந்து கவனித்துள்ளார். தனது தாயாருக்கு சரியான சிகிச்சை அளிக்கப்படவில்லை என்றும் மருத்துவ விவரங்கள் பற்றி முறையாக தெரிவிக்கப்படவில்லை என்றும் இவர் கருதினார்.

இதைத்தொடர்ந்து அவர் மருத்துவர் பாலாஜியிடம் சென்று வாக்குவாதத்தில் ஈடுபட்டு அவரை சரமாரியாக கத்தியால் குத்தினார். இதில் தலை, உடல், கழுத்து உள்பட 7 இடங்களில் கத்தி குத்து விழுந்தது. இதில் நிலைகுலைந்து ரத்த வெள்ளத்தில் கீழே சாய்ந்த மருத்துவர் பாலாஜிக்கு அதே ஆஸ்பத்திரியில் சிகிச்சை அளிக்கப்பட்டு வருகிறது.

தலையில் ஏற்பட்ட காயத்துக்கு ஆபரேஷன் செய்யப்பட்டு மருத்துவர் பாலாஜியை சக மருத்துவர்கள் தீவிரமாக கண்காணித்து வரும் நிலையில் வாலிபர் விக்னேசை சரமாரியாக அடித்து உதைத்து போலீசில் ஒப்படைத்தனர். கிண்டி போலீசார் வாலிபரை கைது செய்தனர்.

விக்னேசிடம் போலீசார் நடத்திய விசாரணையில் புற்று நோயால் பாதிக்கப்பட்டுள்ள தாய் பிரேமா, கிண்டி ஆஸ்பத்திரியில் அனுமதிக்கப்பட்டிருந்த போது மருத்துவர் பாலாஜி முறையான சிகிச்சை அளிக்காமல் திட்டியதாலேயே ஆத்திரத்தில் அவரை கத்தியால் குத்தினேன் என்று பரபரப்பு வாக்கு மூலம் அளித்தார்.

இதைதொடர்ந்து வாலிபர் விக்னேஷ் மீது கடுமையான 7 சட்டப்பிரிவுகளின் கீழ் வழக்கு பதிவு செய்யப்பட்டதாக கைதான அவரை போலீசார் சைதாப்பேட்டை கோர்ட்டில் ஆஜர்படுத்தி நேற்று இரவு 11 மணி அளவில் புழல் சிறையில் அடைத்தனர்.

மத்திய அரசு கடந்த ஆண்டு ஐ.பி.சி. சட்டப்பிரிவுகளுக்கு பதிலாக புதிதாக பி.என்.எஸ் சட்டப் பிரிவுகளை உருவாக்கி அனைத்து குற்றங்களுக்கும் கடுமையான தண்டனை கிடைக்கும் வகையில் புதிய சட்டப் பிரிவுகளை உருவாக்கியுள்ளது.

அந்த சட்டப்பிரிவுகளின் படியே மருத்துவரை சரமாரியாக குத்தி கொலை வெறி தாக்குதலில் ஈடுபட்ட வாலிபர் விக்னேஷ் மீது போலீசார் வழக்கு பதிவு செய்துள்ளனர்.

பி.என்.எஸ்.109 கொலை முயற்சி உள்ளிட்ட கடுமையான சட்டப் பிரிவுகள் பாய்ந்துள்ளதால் வாலிபர் விக்னேசுக்கு 10 ஆண்டுகள் வரை சிறை தண்டனை கிடைக்க வாய்ப்பு இருப்பதாக போலீசார் தொவித்து

உள்ளனர். மருத்துவர் கத்தியால் குத்தப்பட்டது தொடர்பாக என்னென்ன பிரிவுகளில் வழக்கு போடப்பட்டுள்ளது என்பது பற்றிய விவரங்களை போலீசார் வெளியிட்டுள்ளனர்.

அதன் விவரம் வருமாறு:-

பி.என்.எஸ் 126(2) அரசு ஊழியரை பணி செய்ய விடாமல் தடுத்தல்.

115(2) திட்டமிட்டு தாக்குதல் நடத்தி காயம் ஏற்படுத்துதல்.

118(1) ஆபத்தான ஆயுதங்களால் தாக்கி கொடுங்காயத்தை ஏற்படுத்துதல்.

121(2) அரசு பணியில் இருப்பவரை அவரது கடமையை செய்ய விடாமல் தடுத்து தாக்குதலில் ஈடுபடுதல்.

109 (கொலை முயற்சி) 351 (3) நேரில் மிரட்டி எச்சரிக்கை விடுத்தல்.

இந்த 6 சட்டப்பிரிவுகள் தவிர 2008-ம் ஆண்டு தமிழ்நாடு மருத்துவ சட்டப்பிரிவான பிரிவு 3-ன் கீழும், வழக்கு பதிவு செய்யப்பட்டுள்ளது. இந்த சட்டப்பிரிவின் கீழ் அரசு ஆஸ்பத்திரியில் புகுந்து வன்முறையில் ஈடுபட்டதாகவும் விக்னேஷ் மீது குற்றம் சாட்டப்பட்டுள்ளது.

இந்த சட்டப்பிரிவுகள் அனைத்தும் ஆஸ்பத்திரியில் மருத்துவர்களை பாதுகாக்கும் வகையில் கொண்டு வரப்பட்டுள்ள புதிய சட்டப் பிரிவுகள் என்றும், இதனால் குற்றம்சாட்டப்பட்ட நபருக்கு எளிதாக ஜாமீன் கிடைக்காது என்றும் தெரிவிக்கப்பட்டுள்ளது.

இது பற்றி போலீஸ் அதிகாரி ஒருவர் கூறும்போது,

அரசு ஆஸ்பத்திரிக்கு சிகிச்சை பெறவருபவர்கள் பொறுமையை கடைபிடித்து செயல்பட வேண்டும் என்றும், எந்த விதமான சூழலிலும் வன்முறையில் ஈடுபடக்கூடாது. ஆஸ்பத்திரிகளில் வன்முறை சம்பவங்களில் யார் ஈடுபட்டாலும் அவர் மீது பாராபட்சமின்றி நடவடிக்கை எடுக்கப்படும் என்றும் தெரிவித்தார்.

கிண்டி சம்பவத்தை தொடர்ந்து அரசு ஆஸ்பத்திரிகளில் போலீஸ் பாதுகாப்பு பலப்படுத்தப்பட்டுள்ளது.

இதற்கிடையே கைதான வாலிபர் விக்னேஷ் கூறியிருப்பதை கிண்டி ஆஸ்பத்திரியில் மருத்துவர்கள் முழுமையாக மறுத்து உள்ளனர்.

இது தொடர்பாக கூறியுள்ள அவர்கள், புற்று நோய் சிகிச்சைக்காக சேர்க்கப்பட்டிருந்த விக்னேசின் தாய் பிரேமாவுக்கு தேவையான பரிசோதனைகள் மேற்கொள்ளப்பட்டு உரிய சிகிச்சை அளிக்கப்பட்டுள்ளதாக தெரிவித்து உள்ளனர்.

இந்தியாவின் முதல் பிரதமர் ஜவஹர்லால் நேருவின் பிறந்தநாளான நவம்பர் 14-ந்தேதி ஆண்டுதோறும் குழந்தைகள் தினமாக கொண்டாடப்படுகிறது.

அந்த வகையில் குழந்தைகள் தினமான இன்று பள்ளிகளில் அவர்களை கொண்டாடும் வகையில் சிறப்பு நிகழ்ச்சிகள் நடத்தப்படுகின்றன.

இந்நிலையில் தமிழக வெற்றிக்கழக தலைவர் விஜய் வெளியிட்டுள்ள எக்ஸ் தள பதிவில்,

ஒவ்வொரு குழந்தையும் தனித்துவமானது. அவர்களின் புன்னகை, விலைமதிப்பற்றது. குழந்தைகளின் மனது, பொறாமை, பழிவாங்குதல், ஏமாற்றுதல் போன்ற எந்த ஒரு தீய எண்ணத்தையும் கொண்டிராமல், தெளிந்த நீரைப் போல் பரிசுத்தமானது.

நமது எதிர்காலமான மழலைச் செல்வங்களுக்கு அடிப்படை உரிமைகளுடன் கூடிய சிறந்த, சுதந்திரமான எதிர்காலத்தை உருவாக்கிட இந்தக் குழந்தைகள் தினத்தில் உறுதியேற்போம்!

குழந்தைகளை எந்நாளும் பாதுகாத்துப் போற்றி மகிழ்வோம்!

இனிய குழந்தைகள் தின நல்வாழ்த்துகள்! என்று தெரிவித்துள்ளார்.