பாலக்கோடு,
தருமபுரி மாவட்டம் பாலக்கோடு அருகே மல்லசமுத்திரம் கிராமத்தில் உள்ள ஸ்ரீதேவி, பூதேவி சமேத லட்சுமி நரசிம்ம பெருமாள், ஆலய அஷ்டபந்தன மகா கும்பாபி ஷேக விழா நடைபெற்றது.
இந்த விழா கடந்த 29-ந் தேதி கணபதி பூஜையுடன் தொடங்கியது. அதிகாலை கலச ஆராதனை, நவகிரக ஹோமம், பஞ்ச சூக்த ஹோமம், துர்கா சகஸ்ர நாமம், மகா சாந்திஹோமம், வேத பாராயணம், பூர்ணாஹதி நடைபெற்றது.
இதையடுத்து யாக சாலையில் இருந்து புனித நீர் கலச தீர்த்தம் மற்றும் பால் குடத்தை கோவில் முக்கியஸ்தர்கள் எடுத்து சென்று கோயில் கலசத்திற்கு புனித நீர் ஊற்றி மஹா கும்பாபிஷேகம், திருக்குட நன்னீராட்டு செய்து தீபாராதனை காட்டினர்.
பின்னர் கலசத்திற்கு ஊற்றிய புனித நீர் பக்தர்கள் மீது தெளிக்கப்பட்டது. இதனையடுத்து லக்ஷ்மி நரசிம்ம பெருமாள் சுவாமிக்கு பல்வேறு திரவியங்கள், பூக்களால் அபிஷேகங்கள் செய்யப்பட்டு மகா தீபாரதனை காட்டப்பட்டது. லக்ஷ்மி நரசிம்ம பெருமாள் சிறப்பு அலங்காரத்தில் பக்தர்களுக்கு அருள் பாலித்தார்.
இந்த விழாவில் ஏராளமான பக்தர்கள் கலந்து கொண்டு சாமி தரிசனம் செய்தனர். பக்தர்கள் அனைவருக்கும் அன்ன தானம் வழங்கப்பட்டது.
இந்த விழாவிற்கான ஏற்பாடுகளை விழா குழுவினர், ஊர் பொதுமக்கள் மற்றும் குல தெய்வத்தார்கள் செய்திருந்தனர்.
