வீரபாண்டி :
பனியன் தொழில் சார்ந்து எண்ணற்ற வாகனங்கள் சுற்றுவட்டார பகுதியில் இருந்து தினசரி திருப்பூருக்கு வந்து செல்கின்றன.இதனால் திருப்பூர் - பல்லடம் சாலை எப்பொழுதும் போக்குவரத்து நெரிசல் நிறைந்து பரபரப்பாக இருக்கிறது. அதிலும் டி.கே.டி. மில் நால்ரோடு சந்திப்பில் போக்குவரத்து நெரிசல் அதிகம் ஏற்படுகிறது.
இது குறித்து வாகன ஓட்டிகள் கூறியதாவது:-
திருப்பூரிலிருந்து பல்லடம் செல்லும் சாலை டி.கே.டி.மில் பேருந்து நிறுத்தத்தில் அவ்வப்போது போக்குவரத்து நெரிசல் ஏற்பட்டு வாகனங்கள் தத்தளிக்கின்றன.பல்லடத்திலிருந்து திருப்பூர் செல்லும் பேருந்து நிற்பதற்கான பேருந்து நிறுத்தம் மாற்றி அமைக்கப்பட்டது. அதே போல் திருப்பூரிலிருந்து பல்லடம் செல்லும் போது டி.கே.டி. பேருந்து நிறுத்தம் டி.கே.டி. நால்ரோட்டிலிருந்து சிறிது தூரம் மாற்றி அமைக்க வேண்டும்.
பேருந்துகள் நால்ரோட்டில் நிற்பதால் போக்குவரத்து நெரிசல் ஏற்படுவதுடன் தினந்தோறும் விபத்துக்கள் ஏற்பட்டு வருகின்றன.எனவே பேருந்து நிறுத்தத்தை மாற்றி அமைக்க வேண்டும் என்று பொதுமக்கள் கோரிக்கை விடுத்துள்ளனர்.
