மும்பை:
மராட்டியம், குஜராத், அசாம், மேற்கு வங்காளம் மற்றும் கேரளா மாநிலங்களில் பருவமழை கொட்டித் தீர்த்து வருகிறது. இதனால் அம்மாநிலங்களில் உள்ள பல பகுதிகள் வெள்ளத்தில் தத்தளிக்கின்றன. பல கிராமங்களில் மக்கள் வெள்ளத்தில் சிக்கி அவதிப்பட்டு வருகிறார்கள்.
பலத்த மழையால் மும்பை மாநகரம் சில நாட்கள் வெள்ளத்தில் ஸ்தம்பித்தது. இதேபோல் குஜராத், அசாம், மேற்கு வங்காளத்திலும் இயல்பை விட மழை அதிகமாக இருந்தது.
வெள்ளத்தில் சிக்கிய மக்கள் மீட்கப்பட்டு நிவாரண முகாமில் தங்க வைக்கப்பட்டுள்ளனர். இந்த பருவ மழைக்கு இதுவரை 465 பேர் பலியாகி இருக்கிறார்கள்.
இது தொடர்பாக உள்துறை அமைச்சகம் வெளியிட்ட தகவலில் கூறியிருப்பதாவது:-
பருவமழைக்கு மகாராஷ்டிராவில் 138 பேரும், கேரளாவில் 125 பேரும், மேற்கு வங்காளத்தில் 116 பேரும், குஜராத்தில் 52 பேரும், அசாமில் 34 பேரும் பலியாகி இருக்கிறார்கள்.
மகாராஷ்டிராவில் 22 மாவட்டங்களும், மேற்கு வங்காளத்தில் 22 மாவட்டங்களும், அசாமில் 21 மாவட்டங்களும், கேரளாவில் 14 மாவட்டங்களும், குஜராத்தில் 10 மாவட்டங்களும் கடுமையாக பாதிக்கப்பட்டுள்ளன.
அசாமில் அதிகபட்சமாக 10 லட்சம் மக்கள் வெள்ளத்தால் பாதிக்கப்பட்டுள்ளனர். அங்கு 12 தேசிய மீட்பு குழுவினர் மீட்பு பணியில் ஈடுபட்டுள்ளனர். மேற்கு வங்காளத்தில் 1.65 லட்சம் மக்களும், கேரளாவில் 1.43 மக்களும் பாதிக்கப்பட்டுள்ளனர். #Monsoon #flood
