புதுடெல்லி:
கத்துவா, உன்னாவ் பாலியல் வன்கொடுமை சம்பவங்களுக்கு பிறகு பாலியல் வழக்கில் தொடர்புடைய குற்றவாளிகளுக்கு அதிகபட்சமாக மரண தண்டனை விதிக்க சட்டம் இயற்ற வேண்டும் என கோரிக்கைகள் வலுத்தது.
இதனை அடுத்து, பாலியல் வன்கொடுமையிலிருந்து சிறார்களை பாதுகாக்கும் சட்டத்தில் (போக்ஸோ) திருத்தம் செய்யும் அவசர சட்டத்துக்கு மத்திய அமைச்சரவை ஒப்புதல் அளித்ததை தொடர்ந்து, ஜனாதிபதி ராம்நாத் கோவிந்த் ஒப்புதலுடன் இந்த அவசர சட்டம் கடந்த ஏப்ரல் 22-ம் தேதி அமலுக்கு வந்தது.
இந்த அவசர சட்டத்திற்கு பதிலாக நிரந்தர சட்டம் கொண்டு வரும் பணியில் மத்திய அரசு ஈடுபட்டு வந்தது. இந்நிலையில், நிரந்தர சட்ட மசோதாவுக்கு பிரதமர் மோடி தலைமையிலான மத்திய அமைச்சரவை கடந்த மாதம் 18-ம் தேதி ஒப்புதல் அளித்தது.
பின்னர், நடப்பு பாராளுமன்ற கூட்டத்தொடரில் மக்களவையில் அறிமுகம் செய்யப்பட்ட இந்த மசோதா கடந்த மாதம் 30-ம் தேதி நிறைவேறியது. இந்நிலையில், இந்த மசோதா பாராளுமன்ற மாநிலங்களவை உறுப்பினர்களின் ஆதரவுடன் இன்று சட்ட வடிவம் பெற்றது.
இந்த சட்டத்தில் உள்ள முக்கிய அம்சமாக பாலியல் வன்கொடுமை குற்றத்திற்கு குறைந்தபட்ச தண்டனை 7 ஆண்டுகளில் இருந்து 10 ஆண்டுகளாக உயர்த்தப்பட்டுள்ளது.
12 வயதுக்கு உள்பட்ட சிறார்களுக்கு பாலியல் வன்கொடுமை அளித்ததாக ஆண்-பெண் யார் மீது குற்றம் சுமத்தப்பட்டாலும் அந்த வழக்குகள் 2 மாதத்திற்குள் முடிக்கப்பட வேண்டும்.
12 வயதுக்கு உள்பட்ட சிறார்கள் கூட்டு பாலியல் வன்கொடுமைக்கு ஆளானால் குற்றவாளிகளுக்கு மரண தண்டனை, வன்கொடுமை செய்யும் குற்றவாளிக்கு குறைந்த பட்சம் ஆயுள் தண்டனை விதிக்க வகை செய்கிறது. 16 வயதுக்கு உள்பட்ட சிறார்களை பாலியல் வன்கொடுமை செய்த குற்றவாளிகளுக்கு முன்ஜாமீன் அளிக்கப்படாது.
16 வயதுக்கு உள்பட்ட சிறார்களை வன்கொடுமை செய்த குற்றவாளிகளுக்கு வழக்கின் தண்மைக்கேற்ப குறைந்தபட்சம் 20 ஆண்டுகள் சிறை தண்டனை விதிக்க இந்த சட்டம் வகை செய்கிறது. #DeathForChildRapists #POCSO
