குஜராத் மாநிலத்தின் மூத்த காங்கிரஸ் தலைவர்களில் ஒருவராக இருந்தவர் கன்வார்ஜி பவாலியா. இவர் கடந்த குஜராத் தேர்தலின்போது ஜஸ்டன் தொகுதியில் நின்று வெற்றி பெற்றார். இவர் ஐந்து முறை எம்எல்ஏ-ஆகவும், ஒருமுறை நாடாளுமன்ற மக்களவை எம்பி-யாகவும் இருந்துள்ளார்.
காங்கிரஸ் கட்சியில் தன்னைப்போன்ற மூத்த தலைவர்களுக்கு மரியாதை இல்லை. அவர்கள் புறக்கணிக்கப்படுகிறார்கள் என்று குற்றம்சாட்டி காங்கிரஸில் இருந்து விலகினார். அத்துடன் தனது எம்எல்ஏ பதவியையும் ராஜினாமா செய்தார்.
காங்கிரஸில் இருந்து விலகிய அன்றைய தினமே பா.ஜனதாவில் இணைந்தார். இதனால் ஜஸ்டன் தொகுதிக்கு கடந்த 20-ந்தேதி இடைத்தேர்தல் நடைபெற்றது.
பா.ஜனதா சார்பில் கன்வார்ஜி பவாலியா நிறுத்தப்பட்டார். காங்கிரஸ் சார்பில் அவ்சார் நஹியா போட்டியிட்டார். இன்று வாக்கு எண்ணிக்கை நடைபெற்று வருகிறது. 19 சுற்றுகள் கொண்ட வாக்கு எண்ணிக்கையில் முதல் மூன்று சுற்றுகள் முடிவில் கன்வார்ஜி பவாலியா 2700 வாக்குகள் முன்னிலைப் பெற்றுள்ளார்.
மொத்த வாக்குகளும் எண்ணப்பட்டு மதியம் 12.30 மணியளவில் அதிகாரப்பூர்வ முடிவு அறிவிக்கப்படும் என எதிர்பார்க்கப்படுகிறது. 2017-ல் நடைபெற்ற சட்டசபை தேர்தலின்போது காங்கிரஸ் சார்பில் போட்டியிட்ட கன்வார்ஜி பவாலியா 84,321 வாக்குகள் பெற்று வெற்றி பெற்றார். அவரை எதிர்த்து போட்டியிட்ட பா.ஜனதா வேட்பாளர் 75,044 வாக்குகள் பெற்றிருந்தார்.
