அகமதாபாத்:
உலகம் முழுவதும் இன்று (பிப்ரவரி 14) காதலர் தினம் கொண்டாடப்பட்டு வருகிறது. இந்த தினத்தில் காதலர்கள் தங்கள் அன்பை வெளிப்படுத்தும் விதமாக பல்வேறு பரிசுப்பொருட்களை வழங்கியும், புத்தாடைகள் அணிந்தும் கொண்டாடி மகிழ்கின்றனர். விருப்பமான இடங்களுக்கு சேர்ந்து செல்வது, ரோஜாக்கள் பரிமாறிக்கொள்வது, சாக்லேட்டுகள் வழங்குவது போன்ற பல்வேறு விதங்களில் கொண்டாடுகின்றனர்.
இந்நிலையில் குஜராத்தைச் சேர்ந்த சில இளைஞர்கள் காதலர் தினத்தை, அகமதாபாத்தில் உள்ள முதியோர் இல்லத்தில் கொண்டாடி உள்ளனர். கேக் வெட்டியும், இனிப்புகள் வழங்கியும், அங்கிருந்த முதியவர்களுடன் இணைந்து ஆடிப்பாடி தங்கள் மகிழ்ச்சியை வெளிப்படுத்தினர்.
இது குறித்து இந்நிகழ்ச்சியில் பங்கேற்ற அன்சாரி எனும் இளைஞர் கூறுகையில், 'நம்மில் பலர், பெற்றோர்களே நமது முதல் காதல் என்பதை மறந்து விடுகிறோம். இக்காரணத்திற்காகவே இங்கு வந்து இத்தினத்தை அவர்களுடன் சேர்ந்து கொண்டாடுகிறோம். எங்கள் உடைகள் அயல்நாட்டினரைப் போல் இருக்கலாம், ஆனால் எண்ணங்களில் இன்றளவிலும் இந்தியராகவே இருக்கிறோம்’ என்றார். #valentineday
