புதுடெல்லி:
ஒடிசாவை சேர்ந்த சமூக சேவகி மற்றும் ஆராய்ச்சியாளரான இளம்பெண் வீட்டில் தகவல் ஏதும் சொல்லாமல் டெல்லிக்கு வந்தார்.
அவர் புவனேஸ்வரில் உள்ள உத்கல் காலச்சார பல்கலைக்கழகத்தில் முதுகலை பட்டம் பெற்றவர். ஆராய்ச்சியாளராகவும், சமூக துறையில் 8 ஆண்டுகளுக்கு மேலாக பணிபுரிந்து வந்தவர்.
இது குறித்து ஒடிசா பூரி போலீசில் அவரது குடும்பத்தினர் புகார் செய்தனர். போலீசார் விசாரணை நடத்தி வருகின்றனர்.
டெல்லி வந்த இளம்பெண் 10-ந்தேதி இரவில் சராய் காலே கான் பகுதியில் ஒரு கடை முன் பகுதியில் ரோட்டோரத்தில் அமர்ந்திருந்தார். அப்போது கடையை அடைத்த வியாபாரி பர்மோத் பாபு ரோட்டோரத்தில் பெண் ஒருவர் அமர்ந்திருப்பதை கவனித்தார்.
அந்த பெண்ணின் அருகில் ஊனமுற்ற பிச்சைக்காரரான முகமது ஷம்சுல் இருந்தார். வியாபாரியும், முகமது ஷம்சுலும் மது போதையில் இருந்தனர்.
இவர்கள் 2 பேரும் அந்த பெண்ணிடம் நைசாக பேச்சு கொடுத்து அவளை மறைவான இடத்துக்கு அழைத்து சென்று பாலியல் பலாத்காரம் செய்தனர்.
அப்போது அந்த வழியாக ஆட்டோவில் சென்ற பிரபு மஹ்தோ அதனை பார்த்தார். உடனே ஆட்டோவை நிறுத்தி அவர் வலுக்கட்டயாமாக அந்த இளம்பெண்ணை ஆட்டோவில் ஏற்றி வனப்பகுதிக்கு கொண்டு சென்றார். அங்கு அவரும் அந்த இளம்பெண்ணை பாலியல் பலாத்காரம் செய்தார். அதன் பின்னர் அந்த பெண்ணை ரத்த வெள்ளத்தில் சாலையில் வீசி விட்டு தப்பி சென்று விட்டார்.
காலையில் அந்த வழியாக சென்ற கடற்படை அதிகாரி ஒருவர் ரத்த வெள்ளத்தில் இளம்பெண் ஒருவர் மயங்கி கிடப்பதை கண்டு அதிர்ச்சியடைந்தார். இதுகுறித்து உடனடியாக டெல்லி போலீசாருக்கு தகவல் தெரிவித்தார்.
போலீசார் விரைந்து வந்து அந்த பெண்ணை மீட்டு விசாரணை நடத்தினர். விசாரணையில் அவர் ஒடிசாவை சேர்ந்தவர் என்பதும், ஆராய்ச்சியாளராகவும், சமூக சேவகியாகவும் செயல்பட்டது தெரியவந்தது.
இது குறித்து அவரது குடும்பத்தினருக்கு தகவல் தெரிவித்தனர்.
இளம்பெண்ணை கற்பழித்தது யார் என்று போலீசார் 10 தனிப்படை அமைத்து விசாரணை நடத்தினர். சுமார் 700 சி.சி.டி.வி. கேமரா காட்சிகளை ஆய்வு செய்தும், 150 ஆட்டோக்களை பிடித்தும் விசாரணை நடத்தினர். 20 நாட்களுக்கு பிறகு இந்த வழக்கில் துப்பு துலங்கியது. ஆட்டோ டிரைவர் பிரபு மஹ்தோவை பிடித்து விசாரணை நடத்தினர்.
அவர் தான் இளம்பெண்ணை ஆட்டோவில் கடத்தி வனப்பகுதிக்கு அழைத்து சென்று கற்பழித்ததையும் மேலும் இந்த சம்பவத்தில் 2 பேர் ஈடுபட்டனர் என்று அந்த வியாபாரியையும், பிச்சைக்காரரையும் அடையாளப்படுத்தினர்.
இதையடுத்து போலீசார் 3 பேரையும் கைது செய்தனர். பாதிக்கப்பட்ட இளம்பெண் தொடர்ந்து மனநல மருத்துவமனையில் சிகிச்சை பெற்று வருகிறார். இந்த சம்பவம் டெல்லியில் பெரும் பரபரப்பை ஏற்படுத்தி உள்ளது.
இதனிடையே டெல்லி வெல்கம் பகுதியை சேர்ந்த 14 வயது சிறுமி ஒருவர் வடகிழக்கு பகுதியில் உள்ள கடைக்கு சென்றார். நீண்ட நேரமாகியும் அவர் வீடு திரும்பவில்லை இதுகுறித்து அவரது பெற்றோர் போலீசில் புகார் தெரிவித்தனர்.
போலீசார் சிறுமியை தேடி வந்தனர். சி.சி.டி.வி. கேமராக்களை ஆய்வு செய்த போது சிறுமி அந்த பகுதியை விட்டு வெளியே செல்லாதது தெரியவந்தது.
இதையடுத்து போலீசார் அந்த பகுதியில் உள்ள ஒவ்வொரு வீடாக சென்று சோதனை நடத்தினர். ஒரு தம்பதியின் வீட்டில் இருந்து மயங்கிய நிலையில் சிறுமியை மீட்டனர். அவரை பாலியல் வன்கொடுமை செய்துள்ளனர் என்று போலீசார் தெரிவித்தனர்.
அந்த பெண்ணின் கணவரிடம் போலீசார் விசாரணை நடத்தினர். சம்பவத்தன்று வடக்கு பகுதிக்கு கடைக்கு வந்த சிறுமியிடம் நைசாக பேச்சு கொடுத்து தனக்கு உதவி தேவைப்படுகிறது என்று வீட்டுக்கு அழைத்து சென்று பாலியல் துன்புறுத்தல் செய்ததாக கூறினார். மேலும் தம்பதியினர் அந்த சிறுமியை விற்க திட்டமிட்டதாகவும் தெரியவந்துள்ளது.
இதையடுத்து அந்த தம்பதியை போலீசார் கைது செய்தனர்.
