மனதை கவரும் முருடேஷ்வர்!

கர்நாடகத்தில் உள்ள பல அழகான மாவட்டங்களில் உத்தர கர்நாடகா என்று அழைக்கப்படுகின்ற கடற்கரையையொட்டி அமைந்துள்ள மாவட்டம் ஒரு அழகான இயற்கை சூழலில் மேற்கு திசையில் அரபிக்கடலும் கிழக்கு திசையில் மலை பாங்கான பகுதிகளும் கொண்ட மங்களூரில் இருந்து கோவா செல்கின்ற பாதையில் அமைந்துள்ளது.

கொங்கன் ரெயில்வே கோட்டத்துக்குள் உள்ள இந்த இடத்தை மங்களூரில் இருந்து ரெயில் மூலமாக நான்கு மணி நேரத்தில் அடையலாம். சில ரெயில்கள் பட்கல் ரெயில் நிலையத்தில் நிற்கும். சில ரெயில்கள் முருடேஷ்வர் நிலையத்திலும் நிற்கும். அங்கிருந்து ஆட்டோக்கள் மூலமாக இந்த சுற்றுலாத் தலத்தை அடையலாம். பெங்களூரிலிருந்து வேறு பாதையில் ரெயில் அல்லது பேருந்து மூலம் அடையலாம்.

முருடேஷ்வர் என்ற இந்த ஊர் பெயரை பார்க்கும்போதே இது ஒரு சிவத்தலம் என்று உங்களுக்கு தோன்றலாம். ஆம் நீங்கள் நினைப்பது முற்றிலும் சரி. ராமாயண காலத்திற்கு முன்பே தொடர்புடைய இந்தத் தலத்தின் பெருமையை அறிவோம் வாருங்கள்...

ராவணன் இமயமலையில் கடுந்தவம் புரிந்து அங்கிருந்து ஈசனிடம் ஆத்ம லிங்கம் பெற்றுக்கொண்டு தன்னுடைய நாடான இலங்கைக்கு செல்லும்போது வழியில் மாலை நேரத்தில் சந்தியா வந்தனம் செய்ய வேண்டும் என்ற ஒரு நிலையில், அவர் கையில் வைத்திருந்த ஆத்ம லிங்கத்தை கொடுத்து அருளிய ஈசனின் வரத்திற்கேற்ப "லிங்கத்தை தரையில் வைத்து விட்டால் அங்கேயே நிலைத்து விடும். அதை மீண்டும் எடுக்க இயலாது" என்பதை நினைவுகூர்ந்து என்ன செய்வது என யோசித்தான்.

அப்போது பிள்ளையாரை ஒரு மாடு மேய்க்கும் சிறுவன் உருவத்தில் நாரதர் (இராவணன் லிங்கத்தை இலங்கைக்கு எடுத்து செல்லக்கூடாது என்ற நோக்கத்துடன்) அங்கு அனுப்பி விட அந்த சிறுவனிடம் ஆத்ம லிங்கத்தை கொடுத்து விட்டு தான் கடலில் குளித்துவிட்டு வரும்வரை "கீழே வைக்காமல் பார்த்துக் கொள்ள வேண்டும்" என்று ராவணன் கேட்டுக்கொண்டான்.

அந்த சிறுவனும் "நான் மூன்று முறை உங்களை அழைப்பேன். நீங்கள் வராவிட்டால் இந்த லிங்கத்தை கீழே வைத்து விடுவேன்" என்று கூற, "சரி அப்படியே செய்" என்று சொல்லிவிட்டு ராவணன் கடலில் நீராட சென்றான். மூன்று முறை தலை மூழ்கி குளிக்கும் பொழுது பிள்ளையார் வடிவில் வந்த சிறுவன் அவரை அழைத்தான்... ராவணன் வராததால் லிங்கத்தை கீழே வைத்துவிட்டு காத்திருக்க... சந்தியா வந்தனம் முடிந்து வந்த ராவணன் ஆத்ம லிங்கத்தை கையில் எடுக்க முடியாமல் போனதால் கோபத்துடன் அந்த சிறுவனின் தலையில் குட்ட, அந்த சிறுவனுக்கு தலையில் ஒரு குழி விழுந்ததாக சொல்லப்படுகிறது (அந்த வரலாற்றை சார்ந்த கோவிலை நாம் பின்பு காண்போம்).

கோபத்தில் இருந்த ராவணன் அந்த லிங்கத்தை பிடுங்க முயற்சிக்க, அது மூன்று துண்டுகளாக உடைந்திட பொறுமையிழந்து அவற்றை வெவ்வேறு இடத்தில் தூக்கி எறிந்திட அந்த இடங்களில் கோவில் கட்டப்பட்டு புண்ணிய தலமாக வழிபாடு நடத்தப்படுகிறது.

முருடேஸ்வராவும் ஆத்ம லிங்கத்தின் ஒரு பகுதியாகும். இந்த கோவில் சற்றே உயரமான குன்றின் மேல் கட்டப்பட்டு இருக்கிறது. ஒரு அருமையான கடலும் மலையும் இணைந்த சூழலில் நம் கண்களை கவரும் வண்ணம் இந்த கோவில் அமைந்துள்ளது. இங்குள்ள கோபுரம் ஆசியாவிலேயே மிக உயரமான கோபுரமாகும். அதை பார்க்கும்போது நமக்கு வியப்பு ஏற்படும்.

நாம் சிவபெருமானையும் சுற்றியுள்ள சன்னதிகளையும் வணங்கி வெளியே வந்து கொடிமரத்தின் அருகிலிருந்து ஒருபுறம் கடல் சூழ்ந்த பகுதியில் மீன்பிடி படகுகள் கரையில் நிறுத்தப்பட்டுள்ளதை பார்த்து ரசிக்கலாம்.

குன்றின் மேல்பகுதிக்குச் செல்ல படிக்கட்டுகள் உள்ளன. அங்கு தவ கோலத்தில் அமர்ந்திருக்கும் பிரம்மாண்டமான சிவபெருமான் சிலையின் அழகை காண கண்கோடி வேண்டும்.

கோவிலின் பின்புறத்தில் பாறைகளை ஒட்டி அரபிக் கடல் அலைகள் தொட்டு தொட்டு விளையாடி செல்வதை காணும்போது மனம் இயற்கையுடன் லயித்து விடுவதையும் நாம் அனுபவிக்க முடியும்.

சிவனை பார்க்க செல்லும் வழியில் இந்தத் தல வரலாற்றுக்கு காரணமான ஆத்ம லிங்கத்தை ராவணன் பிள்ளையாரிடம் கொடுப்பதைப் போன்ற காட்சி அமைப்பும் மற்றும் "பகிரதப் பிரயத்னம்" எனப்படுகின்ற சிவனின் தலையில் குடிகொண்டிருந்த கங்கையை இந்த பூமிக்கு தருவதற்காக பகிரத முனி எடுத்துக்கொண்ட விடாமுயற்சியை காட்டும் நிகழ்ச்சியையும் வெகு அழகாக கம்பீரமாக சிவன் நின்ற கோலத்திலும்... அவருக்கு அருகே பகிரத முனி கைகூப்பி வணங்கிய நிலையில் காமதேனு சிலையுடனும் வெகு அழகான சிற்பங்களை வடிவமைத்து பக்தியும் கலையும் இணைத்து இழைத்திருக்கிறார்கள்.

அதை பார்த்து ரசித்துக்கொண்டே மேலே போவதற்கு மனம் இல்லாமல் அங்கிருக்கின்ற படிகளில் ஏறி செல்லும்போது அடடா... அப்படி ஒரு அழகான காட்சி... யோக நிலையில் அமர்ந்த சிவபெருமானை பிரம்மாண்டமான பீடத்தில் அமைத்து அதன் கீழே இரண்டு சந்நிதிகளையும் பீடத்தினுள் சுற்றி வெகு அழகாக புராணக் காட்சிகளையும் அமைத்துள்ளனர்.

உள்ளே நாம் நுழையும்போது தேவலோகத்தில் இருப்பதைப் போன்ற உணர்வையும் அவற்றை யெல்லாம் அருகில் இருந்தே பார்ப்பதைப் போன்ற மனநிலையும் நமக்கு தோன்றினால் வியப்படைவதற்கு இல்லை.

அமர்ந்த கோலத்தில் இருக்கும் சிவனை சுற்றி வருகையில் பின்புறம் கண்ணுக்கெட்டிய தூரம் வரை அரபிக் கடல் அமைதியாக எந்தவித இடையூறும் தராமல் அங்கு வரும் பக்தர்களுக்கு ஒரு அமைதியான சூழலை ஏற்படுத்திக் கொடுப்பதை போன்று தோன்றும்.

அதே சமயத்தில் நாம் இறங்கி வரக்கூடிய பக்கத்தில் கடற்கரையில் குழந்தைகளுடன் பெரியவர்கள்... பெண்கள் என அனைவரும் குழந்தைகளாகி விளையாடுவதை காணலாம். மேலும் சில கடல் விளையாட்டுகளை விளையாடுவதற்கான பொழுதுபோக்கு இடமாகவும் சுற்றுலாத்தலமாகவும் கருதி அனைத்து தரப்பு மக்களும் வருகை புரிவதை காணலாம். பயணிகள் கடலில் ஒரு சுற்று சுற்றி வரக்கூடிய அளவில் மோட்டார் படகு சவாரியும் உள்ளது.

அந்த மலைப் பாங்கான பகுதியில் பச்சை பசேல் என்ற புல்வெளி செதுக்கப்பட்ட இடங்களில் கீதா உபதேசம் செய்யக்கூடிய கிருஷ்ணரின் சிலையும் சற்று மேலே அமைக்கப் பட்டிருக்கின்ற சூரியனார் சிலையும் உள்ளன.

அங்கு கடற்கரையையொட்டி கடலுக்குள்ளேயே உணவகங்கள் இருக்கின்றன. அங்கு அமர்ந்து ஒரு தேநீர் குடித்தாலும் கூட கடலும் தேநீரும் நம் மனம் விட்டு மறையாமல் பல்லாண்டு காலம் நங்கூரம் போட்டு தங்கி விடக் கூடிய அளவில் அமைந்துவிடும்.

அங்கு தங்க கூடிய அளவில் விடுதிகளும் இருக்கின்றன. அவையெல்லாம் முறையே முன்பதிவு செய்து போய் ஒரு நாள் தங்கியிருந்தால் இவை அனைத்தையும் முழுமையாக அனுபவித்து வர இயலும்.

இந்தக் கோவிலின் முன்பகுதியில் இரண்டு பெரிய யானை சிலைகள் நம்மை கம்பீரமாக வரவேற்பதை காணலாம். அதை தாண்டி உள் நுழையக்கூடிய கோபுரம் கிட்டத்தட்ட 237 அடிகளையும் 20 அடுக்கு களையும் கொண்டதாக இருக்கிறது. இந்த கோபுரத்திற்கு நாம் பணம் கொடுத்து சீட்டு வாங்கிக்கொண்டு மின்விசை மூலம் மேலே சென்று அங்கிருந்து கோவிலும் அங்கு சுற்றியுள்ள சூழலையும் காணக்கூடிய அளவில் அமைத்திருப்பது மிகவும் சிறப்பானதொரு வாய்ப்பு. இதனை தவறவிடாமல் அங்கு செல்லக்கூடிய பக்தர்களானாலும் சரி சுற்றுலா பயணிகள் ஆனாலும் சரி பயன்படுத்திக் கொள்ளுதல் நலம்.