போரூர்:
தீபாவளி பண்டிகையை முன்னிட்டு நேற்று கோயம்பேடு மார்க்கெட்டுக்கு விடுமுறை விடப்பட்டது. நள்ளிரவு முதல் மார்க்கெட்டுக்கு வரும் சில்லரை வியாபாரிகள் வருகை அதிகரித்து வழக்கம் போல காய்கறி விற்பனை விறுவிறுப்பாக நடைபெற்று வருகிறது. இன்று 300 லாரிகளில் மட்டுமே காய்கறி வந்துள்ளது.
தமிழகத்தின் பல்வேறு மாவட்டங்கள், ஆந்திரா, கர்நாடகா மாநிலங்களில் தொடர்ந்து பெய்து வரும் கனமழை காரணமாக காய்கறி உற்பத்தி கடுமையாகப் பாதிக்கப்பட்டுள்ளது. மேலும் அங்கு பயிரிடப்பட்டிருந்த காய்கறி செடிகள் பெரும்பாலும் மழையால் சேதமடைந்துள்ளது. இதன் காரணமாக கோயம்பேடு சந்தைக்கு வரும் சின்ன வெங்காயம், தக்காளி, கேரட், முருங்கைக்காய், குடை மிளகாய் உள்ளிட்ட காய்கறிகளின் வரத்து குறைந்து விலை அதிகரித்து உள்ளது.
கடந்த வாரம் மொத்த விற்பனை கடைகளில் ஒரு கிலோ ரூ.32-க்கு விற்ற தக்காளி மீண்டும் 2 மடங்காக விலை அதிகரித்து கிலோ ரூ.65-க்கும் சில்லரை விற்பனை கடைகளில் ஒரு கிலோ தக்காளி ரூ.75 முதல் 80 வரையிலும் விற்கப்பட்டு வருகிறது.
அதேபோல் மொத்த விற்பனையில் கடந்த வாரம் ஒரு கிலோ ரூ.40-க்கு விற்ற ஊட்டி கேரட் இன்று ரூ.60-க்கும், ஒரு கிலோ ரூ.40-க்கு விற்ற சின்ன வெங்காயம் ரூ.50-க்கும், ரூ.22-க்கு விற்ற உருளைக்கிழங்கு ரூ.30-க்கும், ரூ.15-க்கு விற்ற கோவக்காய் ரூ.40-க்கும் விற்பனை செய்யப்பட்டு வருகிறது.
இன்றைய காய்கறிகளின் மொத்த விற்பனை விலை விபரம் வருமாறு:-
தக்காளிரூ.65, நாசிக் வெங்காயம் ரூ.38, ஆந்திரா வெங்காயம் ரூ.22, சின்ன வெங்காயம் ரூ.50, ஆக்ரா உருளைக்கிழங்கு ரூ.25, கோலார் உருளைக் கிழங்கு ரூ.30, உஜாலா கத்தரிக்காய் ரூ.25, வரி கத்தரிக்காய் ரூ.20, வெண்டைக்காய் ரூ.25, அவரைக்காய் ரூ.40, பீன்ஸ் ரூ.40, ஊட்டி கேரட் ரூ.60, ஊட்டி பீட்ரூட் ரூ.40, கோவக்காய் ரூ.40, பன்னீர் பாகற்காய் ரூ.30, புடலங்காய் ரூ.10, வெள்ளரிக்காய் ரூ.8, மலபார் வெள்ளரிக்காய் ரூ.10, முருங்கைக்காய் ரூ.70, முட்டை கோஸ் ரூ.12, முள்ளங்கி ரூ.30, சவ்சவ் ரூ.10, பட்டை கொத்தவரங்காய் ரூ.20, பீர்கங்காய் ரூ.40, காலி பிளவர் ஒன்று ரூ.20, குடை மிளகாய் ரூ.100, பஜ்ஜி மிளகாய் ரூ.40, இஞ்சி ரூ.45 பச்சை மிளகாய் ரூ.20.
