பொன்னேரி:
மீஞ்சூரை அடுத்த வன்னிபாக்கம் ஊராட்சி மேட்டுப்பாளையம் மூகாம்பிகை நகர், கிராம தெரு சாலையில் டீக்கடை, காய்கறி கடை, சிமெண்ட் கடைகள் உள்ளன.
இந்த கடைகள் ஆக்கரமிப்பு இடத்தில் செயல்பட்டு வருவதாகவும், இதனை அகற்ற வேண்டும் எனவும் அப்பகுதி மக்கள் ஊராட்சி நிர்வாகத்திடம் மனு அளித்தனர். அதன்படி கிராம சபை கூட்டத்தில் தீர்மானம் நிறைவேற்றப் பட்டதாக தெரிகிறது.
இந்த நிலையில் வரு வாய்த்துறை, வட்டார வளர்ச்சி அதிகாரிகள் ஜே.சி.பி. எந்திரத்துடன் ஆக்கிரமிப்பு கடைகளை இடித்துஅகற்ற வந்தனர்.
அவர்களிடம் கடைகளை அகற்ற எதிர்ப்பு தெரிவித்து வியாபாரிகள் கடும் வாக்கு வாதத்தில் ஈடுபட்டனர். இதனால் அங்கு பரபரப்பு ஏற்பட்டது.
பாதுகாப்புக்கு வந்த போலீசார் வியாபாரிகளிடம் பேச்சுவார்த்தை நடத்தினர். அப்போது பத்து நாட்களுக்குள் தாங்களே கடைகளை அகற்றி விடுவதாக எழுத்து மூலமாக வியாபாரிகள் தெரிவித்ததனர்.
இதையடுத்து கடைகளை அகற்றுவது தற்காலிகமாக நிறுத்தப்பட்டது. அப்போது ஊராட்சி மன்றத்தலைவர் மஞ்சுளா பஞ்சாட்சரம் மற்றும் வார்டு உறுப்பினர்கள் உடன் இருந்தனர்.
