மதுரை:
மதுரை பீ.பி.குளம் முல்லை நகர் மற்றும் சுற்றுவட்டார பகுதிகளில் ஆயிரத்திற்கும் மேற்பட்ட குடும்பங்கள் வசித்து வருகின்றனர். இவர்களின் நிலத்திற்கு பட்டா இல்லை யென கூறப்படுகிறது.
இந்த நிலையில் மேற்கண்ட குடியிருப்புகள் நீர்பிடிப்பு பகுதியில் அமைக்கப்பட்டுள்ளதாக புகார்கள் எழுந்துள்ளது. இதையடுத்து அந்த வீடுகளை அகற்ற அரசு நடவடிக்கை எடுத்தது.
அதன்படி கடந்த சில நாட்களுக்கு முன்பு அரசின் நீர்வளத்துறை மூலம் குடியிருப்புவாசிகளுக்கு நோட்டீஸ் அனுப்பப்பட்டது. அதில் 48 ஆயிரத்து 990 சதுர மீட்டர் பரப்பளவு கொண்ட பீ.பி.குளம் கண்மாய் நீர்பிடிப்பின் ஒரு பகுதியினை ஆக்கிரமிப்பு செய்து உள்ளீர்கள்.
ஆக்கிரமிப்பை காலி செய்வது தொடர்பாக ஏற்கனவே அதற்கான படிவங்கள் மூலம் 2 முறை அறிவிப்பு வழங்கப்பட்டது. ஆனால் இதுவரையில் ஆக்கிரமிப்புகள் அகற்றப்படவில்லை. எனவே நாளை 10-ந்தேதிக்குள் ஆக்கிரமிப்புகளை தாங்களே அகற்றி கொள்ள காலகெடு வழங்கப்படுகிறது.
அதற்குள் அகற்றாத பட்சத்தில் மறுநாள் (11-ந்தேதி) நீர்வளத்துறை மூலம் ஆக்கிரமிப்புகள் அகற்றப்படும். அப்போது உடமைகளுக்கு சேதம் ஏற்பட்டால் நிர்வாகம் பொறுப்பேற்காது. மேலும் சட்டப்படியான நடவடிக்கை மேற்கொள்ளப்படும் என குறிப்பிடப்பட்டிருந்தது.
தமிழக அரசின் நீர்வளத்துறை அறிவிப்பு அப்பகுதி மக்களிடையே அதிர்ச்சியை ஏற்படுத்தியது. வீடுகளை காலி செய்ய மேலும் கால அவகாசம் வேண்டும் என வலியுறுத்தப்பட்டது.
இந்த நிலையில் நீர்வளத்துறையின் நடவடிக்கைக்கு தடை விதிக்க வேண்டும் என வலியுறுத்தி அப்பகுதி மக்கள் விருதுநகருக்குவரும் முதலமைச்சர் மு.க.ஸ்டாலினை சந்தித்து மனு கொடுக்க முடிவெடுத்தனர்.
அதன்படி இன்று காலை பீ.பி.குளம் முல்லை நகர் பகுதியை சேர்ந்த பெண்கள் உள்பட 500-க்கும் மேற்பட்டோர் வேன், கார், ஷேர் ஆட்டோ, மோட்டார் சைக்கிள்களில் சென்று முதலமைச்சரை சந்தித்து மனு கொடுக்க புறப்பட தயாரானார்கள்.
இதுகுறித்து தகவலறிந்த போலீசார் சம்பவ இடத்திற்கு வந்து பொதுமக்களிடம் பேச்சு வார்த்தை நடத்தினர். முதலமைச்சரிடம் மனு கொடுக்க உரிய அனுமதி பெற வேண்டும் என தெரிவிக்கப்பட்டது. ஆனால் அதனை அவர்கள் ஏற்க மறுத்தனர்.
தொடர்ந்து போலீசார் அவர்களிடம் பேச்சு வார்த்தை நடத்தினர். இதனால் அங்கு பரபரப்பு ஏற்பட்டது.
