கோவை:
கோவை மாவட்டத்தில் கடந்த சில தினங்களாக கடும் வெயில் கொளுத்தி வருகிறது. பகலில் வெயில் வறுத்தெடுத்தாலும், மாலைக்கு பிறகு இதமான காலநிலைக்கு மாறி விடுகிறது.
இன்று காலை முதலே கோவை மாநகர் பகுதிகளான பாப்பநாயக்கன்பாளையம், அவினாசி சாலை, ரெயில் நிலைய பகுதி, டவுன்ஹால், காந்திபுரம், காந்திபார்க், சிங்காநல்லூர் உள்ளிட்ட பகுதிகளில் கடும் மேக மூட்டம் நிலவியது.
மேகமூட்டத்துடன் சாரல் மழையும் பெய்தது. மழையால் வெப்பம் தணிந்து இதமான காலநிலை நிலவுகிறது. காலையில் வெயில் தெரியாத அளவுக்கு மேகமூட்டம் சூழ்ந்து காணப்படுகிறது.
கோவை மாநகர் மட்டுமின்றி புறநகர் பகுதிகளான பொள்ளாச்சி, வால்பாறை, மேட்டுப்பாளையம், காரமடை, அன்னூர், சூலூர், சுல்தான்பேட்டை, கருமத்தம்பட்டி உள்ளிட்ட அனைத்து பகுதிகளிலும் இதமான காலநிலை நிலவுகிறது.
நீலகிரி மாவட்டம் குன்னூர் மற்றும் அதன் சுற்றுவட்டார பகுதிகளில் பகல் நேரத்தில் வெயிலும், இரவில் கடும் நீர் பனிப்பொழிவு பொழிவும் காணப்பட்டது.
இந்நிலையில் குன்னூர், அருவங்காடு, வெல்லிங்டன், காட்டேரி,சேலாஸ், எடப்பள்ளி, வண்டிச்சோலை, சிம்ஸ் பூங்கா, கொலகம்பை, குன்னக்கம்பை உள்ளிட்ட பகுதிகளில் நேற்றிரவு நீர் பனி காணப்பட்ட நிலையில், இன்று அதிகாலை முதலே மேகமூட்டம் அதிகரித்துடன் பரவலான சாரல் மழையும் பெய்தது.
இந்த திடீர் சாரல் மழையுடன் கடும் குளிரும் மக்களை வாட்டி வதைத்து வருகிறது. கடும் குளிர் காரணமாக மக்கள் வீடுகளுக்குள் முடங்கியுள்ளனர்.
அத்தியாவசிய தேவைகளுக்கு வருபவர்கள் சுவர்ட்டர் அணிந்தபடியே வெளியில் வந்தனர். கடும் குளிர் காரணமாக பொதுமக்களின் இயல்பு வாழ்க்கை பாதிக்கப்பட்டுள்ளது.
கடும் மேகமூட்டம் நிலவுவதால் மேட்டுப்பாளையம்-குன்னூர் மலைப்பாதையில் எதிரே வரும் வாகனங்கள் தெரிவதில்லை. இதனால் அவ்வழியாக செல்லக்கூடிய வாகன ஓட்டிகள் தங்கள் வாகனங்களின் முகப்பு விளக்குகளை எரியவிட்டபடியே வாகனத்தில் பயணிக்கிறார்கள்.
