லண்டன்:
உலக கோப்பை கிரிக்கெட் போட்டியில் 17-வது நாளான இன்று 2 ஆட்டங்கள் நடக்கிறது. லண்டனில் ஓவல் மைதானத்தில் மாலை 3 மணிக்கு நடைபெறும் ஆட்டத்தில் ஆரோன்பிஞ்ச் தலைமையிலான ஆஸ்திரேலியா- கருணாரத்னே தலைமையிலான இலங்கை அணிகள் மோதுகின்றன.
ஆஸ்திரேலிய அணி 3 வெற்றி, ஒரு தோல்வியுடன் 6 புள்ளிகள் பெற்று 3-வது இடத்தில் உள்ளது. இலங்கை அணி ஒரு வெற்றி, ஒரு தோல்வி, 2 முடிவு இல்லை. ஆகியவற்றுடன் 4 புள்ளிகள் பெற்று 5-வது இடத்தில் உள்ளது.
ஆஸ்திரேலிய அணி ஆப்கானிஸ்தான் (7 விக்கெட்), வெஸ்ட் இண்டீஸ் (15 ரன்), பாகிஸ்தான் (41 ரன்) ஆகியவற்றை வீழ்த்தி இருந்தது. இந்தியாவிடம் 36 ரன்னில் தோற்றது.
இலங்கையை இன்று வீழ்த்தி 4-வது வெற்றியை பெறும் ஆர்வத்தில் ஆஸ்திரேலியா உள்ளது.
இலங்கை அணி தொடக்க ஆட்டத்தில் நியூசிலாந்திடம் 10 விக்கெட் வித்தியாசத்தில் தோற்றது. 2-வது ஆட்டத்தில் ஆப்கானிஸ்தானை 34 ரன்னில் வென்றது. பாகிஸ்தான், வங்காள தேசத்துடன் மோதிய ஆட்டம் மழையால் ரத்து செய்யப்பட்டது.
பலம் வாய்ந்த ஆஸ்திரேலியாவை வீழ்த்தி இலங்கை 2-வது வெற்றியை பெறும் வேட்கையில் உள்ளது.
கார்டிப் மைதானத்தில் மாலை 6 மணிக்கு நடைபெறும் 2-வது ஆட்டத்தில் தென் ஆப்பிரிக்கா- ஆப்கானிஸ்தான் அணிகள் மோதுகின்றன. டூபெலிசிஸ் தலைமையிலான தென் ஆப்பிரிக்கா 4 ஆட்டத்தில் விளையாடி இதுவரை வெற்றி பெறவில்லை.
இங்கிலாந்துடன் 104 ரன் வித்தியாசத்திலும், வங்காள தேசத்திடம் 21 ரன் வித்தியாசத்திலும் இந்தியாவிடம் 6 விக்கெட் வித்தியாசத்திலும் தோற்றது. வெஸ்ட் இண்டீசுடன் மோதிய ஆட்டம் மழையால் ரத்து ஆனது.
1 புள்ளியுடன் இருக்கும் தென் ஆப்பிரிக்கா ஆப்கானிஸ்தானை வீழ்த்தி முதல் வெற்றியை பெறும் ஆர்வத்தில் உள்ளது.
ஆப்கானிஸ்தான் மோதிய 3 ஆட்டத்திலும் தோற்றது. ஆஸ்திரேலியா, நியூசிலாந்து, இலங்கை அணியிடம் தோற்று இருந்தது.
தென் ஆப்பிரிக்காவுக்கு அதிர்ச்சி கொடுத்து முதல் வெற்றியை பெறும் ஆர்வத்தில் ஆப்கானிஸ்தான் உள்ளது.
