உலகக்கோப்பை கிரிக்கெட் தொடரில் இந்தியா சிறப்பான ஆட்டத்தை வெளிப்படுத்தி வருகிறது. விராட் கோலி, ரோகித் சர்மா, தவான் ஆகியோரின் சிறப்பான ஆட்டத்தாலும் பும்ரா, ஷமி ஆகியோரின் சிறப்பான பந்து வீச்சாலும் தோல்வியை சந்திக்காத அணியாக இருந்தது.
ஆனால், இங்கிலாந்துக்கு எதிரான போட்டியில் தோல்வியடைந்து அந்த பெருமையை இழந்தது. இந்திய அணி சிறப்பாக விளையாடினாலும் பவர்பிளேயான முதல் 10 ஓவர்களில் அதிரடி ஆட்டத்தை வெளிப்படுத்தியது கிடையாது. இது இந்திய அணியின் மீது மிகப்பெரிய விமர்சனத்தை எழுப்பியது.
தென்ஆப்பிரிக்காவுக்கு எதிராக ஒரு விக்கெட் இழப்பிற்கு 34 ரன்களும், ஆஸ்திரேலியாவுக்கு எதிராக விக்கெட் இழப்பின்றி 41 ரன்களும், வெஸ்ட் இண்டீஸ்க்கு எதிராக விக்கெட் இழப்பின்றி 53 ரன்களும், பாகிஸ்தானுக்கு எதிராக விக்கெட் இழப்பின்றி ஒரு விக்கெட் இழப்பிற்கு 41 ரன்களும், ஆப்கானிஸ்தானுக்கு எதிராக 1 விக்கெட் இழப்பிற்கு 47 ரன்களும் எடுத்திருந்தது. ஆனால் இங்கிலாந்துக்கு எதிராக 1 விக்கெட் இழப்பிற்கு 28 ரன்களே எடுத்திருந்தது. 6 போட்டியில் ஓவருக்கு சராசரியாக 4 ரன்களே எடுத்திருந்தது.
இன்றைய ஆட்டத்தில் ரோகித் சர்மா மற்றும் லோகேஷ் ராகுல் ஆகியோர் தொடக்கத்தில் இருந்து அதிரடி ஆட்டத்தை வெளிப்படுத்தினர். இதனால் விக்கெட் இழப்பின்றி 69 ரன்கள் குவித்தனர். தொடக்க ஜோடி அதிரடி ஆட்டத்தை வெளிப்படுத்தியிருப்பது இந்திய அணி நிர்வாகத்திற்கு தன்னம்பிக்கையை அதிகரித்துள்ளது.
