துணை சபாநாயகர் ராஜவேலு மீண்டும் ஆஸ்பத்திரியில் அனுமதி

புதுச்சேரி:

புதுவை சட்டசபையில் துணை சபாநாயகராக இருப்பவர் ராஜவேலு(64).

இவர் கடந்த 21-ந் தேதி சென்னை விமான நிலையத்துக்கு சென்றபோது திடீரென தலைவலி, வாந்தி, மயக்கம் ஏற்பட்டது. இதையடுத்து அவர் சென்னையில் உள்ள தனியார் மருத்துவமனையில் சிகிச்சைக்காக அனுமதிக்கப்பட்டார். அவரை பரிசோதித்து டாக்டர்கள் சிகிச்சை அளித்தனர்.

இதன்பின் அவர் சென்னையில் மகள் வீட்டில் ஓய்வெடுத்தார். துணை சபாநாயகர் ராஜவேலு சில ஆண்டுகளுக்கு முன் இதய நோயால் பாதிக்கப்பட்டு சிகிச்சை பெற்றுள்ளார். எனவே அவருக்கு முழு உடல் பரிசோதனை செய்யப்பட்டது. அதில் அவருக்கு இருதயத்தில் அடைப்பு இருப்பது உறுதியானது.

இதையடுத்து மீண்டும் அவர் சென்னை தனியார் மருத்துவமனையில் அனுமதிக்கப்பட்டுள்ளார். அவருக்கு ஆஞ்சியோபிளாஸ்டி செய்து ஸ்டென்ட் வைக்க டாக்டர்கள் திட்ட மிட்டுள்ளனர்.

சிகிச்சை வெற்றிகரமாக நடைபெறவும், துணை சபாநாயகர் ராஜவேலு நலம் பெற வேண்டியும் மணக்குள விநாயகர் , சமயபுரம் மாரியம்மன் கோவில், துணை சபாநாயகரின் குலதெய்வ கோவிலான மோட்சகுளம், நெட்டப்பாக்கம் தொகுதி யில் உள்ள கோவில்கள், கிருமாம்பாக்கத்தில் உள்ள மாரியம்மன் கோவில்களில் அபிஷேகம் மற்றும் சிறப்பு பிரார்த்தனைகளை அவரது உறவினர்கள், ஆதரவா ளர்கள் செய்தனர்.