கருவடிகுப்பம் குளம் ரூ.90 லட்சத்தில் புனரமைப்பு

புதுச்சேரி:

புதுவை கருவடிகுப்பம் ஜெயராம் கார்டனில் வில்லிமேடுகுளம் என்ற பாரதி குட்டை சுமார் 40 ஆயிரம் சதுர அடியில் உள்ளது. இந்த குளத்தில் கழிவுநீர் தேங்கி சுகாதாரம் சீர்கெட்டு, சுற்றுச்சூழலுக்கு பாதிப்பு ஏற்படுத்தி வந்தது.

இந்த நிலையில் உழவர்கரை நகராட்சியின் கோரிக்கையை ஏற்று இந்த குளத்தை புனரமைக்க ரோட்டரி கிளப் புதுவை காஸ்மோஸ் முன்வந்தது.

இதன்மூலம் குளத்தை தூர்வாருதல், பூங்காவாக மேம்படுத்துதல், சோலார் விளக்கு, நடைபாதை, அமரும் இருக்கை, மழைநீர் செல்ல வழித்தடங்கள், மரக்கன்றுநடுதல், புல்தரை, பாதுகாப்பு வேலி அமைத்தல் என ரூ.90 லட்சத்தில் பணிகள் நடத்தப்பட உள்ளது.

இந்த மேம்பாட்டு பணிகளுக்கான தொடக்க விழா நடந்தது. கல்யாணசுந்தரம் எம்.எல்.ஏ. பணிகளை தொடங்கி வைத்தார். நிகழ்ச்சியில் உழவர்கரை நகராட்சி ஆணையர் சுரேஷ்ராஜ், ரோட்டரி கிளப் காஸ்மோஸ் உறுப்பினர்கள், ஊர் பொதுமக்கள் பலர் கலந்துகொண்டனர்.