நீங்கள் தேடியது "இந்து அறநிலையத்துறை"

சென்னை:

தமிழகம் முழுவதும் வான்மழை பொய்த்து மக்கள் தண்ணீருக்காக திண்டாடுகிறார்கள். மனிதன் தீர்க்க முடியாத நெருக்கடிக்குள் சிக்கும் போது கடவுளே காப்பாற்று என்று முறையிடுவார்கள். கடவுள் நம்பிக்கை உள்ளவர்களிடம் இந்த உணர்வு இருக்கும்.

அதன்படி இந்து கோவில்களில் மழையை தருவிக்கும் பதிகங்கள், ராகங்கள், மூலம் பிரார்த்தனைகள், யாகங்கள் நடத்தும்படி அறநிலையத்துறை உத்தரவிட்டது. கோவில்கள் அறநிலையத்துறையின் கட்டுப்பாட்டில் இருப்பதால் அந்த துறையே இதற்கான ஏற்பாடுகளை செய்தது.


இதற்கு பக்தர்களிடையே எதிர்ப்பு கிளம்பியது. பக்தர்களின் நம்பிக்கை, வழிபாட்டு முறையை அரசால் செயல்படுத்த முடியாவிட்டால் அறநிலையத்துறை கோவில்களை விட்டு வெளியேற வேண்டும் என்று கருத்து தெரிவித்தனர்.

இந்த நிலையில் கருப்பணசாமி என்ற ஓய்வு பெற்ற அரசு ஊழியர் அறநிலையத்துறைக்கு ஒரு மனு அனுப்பி இருக்கிறார். அதில் கூறி இருப்பதாவது:-

யாகம் செய்தால் மழை வரும் என்ற விதி மற்றும் அரசாணையின் நகல்களை அளிக்க வேண்டும். மேலும் கோவில்களில் யாகம் நடத்திய பிறகு எந்தெந்த ஊர்களில் எவ்வளவு மழை பெய்தது என்ற விவரங்கள் தேவை.

மழை வேண்டி கோவில்களில் யாகம் நடத்த எவ்வளவு செலவானது? எந்த அதிகாரத்தின் அடிப்படையில் கோவில்களில் மழை வேண்டி யாகம் நடத்த இந்து அறநிலையத்துறை ஆணையர் உத்தரவிட்டார் என்ற விவரத்தையும் அளிக்க வேண்டும்.

இவ்வாறு அந்த மனுவில் குறிப்பிட்டுள்ளார்.

இந்த நிலையில் பல இடங்களில் மழை பெய்து வருகிறது. ஆங்காங்கே மழை பெய்வதற்கான வாய்ப்பு உள்ளது என்று வானிலை ஆய்வு மையமும் அறிவித்துள்ளது.

யாக பலனே மழையை தருவிப்பதாக பக்தர்கள் மகிழ்ச்சியுடன் தெரிவித்தனர். #VarunaYagam

சென்னை:

பொட்டலம் செய்து விற்கப்படும் அனைத்து உணவு பொருட்களிலும் இந்திய உணவு பாதுகாப்பு தர ஆணையத்தின் முத்திரை பதிக்கப்பட்டு இருக்க வேண்டும் என்று கட்டாய விதிமுறைகள் உள்ளது.

ஆனால், கோவில்களில் வழங்கப்படும் பிரசாத பொட்டலங்களில் இந்த முத்திரை இருப்பதில்லை. சாமிக்கு படைத்து விட்டு பின்னர் அவற்றை விற்பனைக்கு அனுப்புவதால் தர முத்திரை பெறுவது சாத்தியம் இல்லாததாக இருந்தது.

தற்போது பழனி கோவிலில் விற்கப்படும் பஞ்சாமிர்தத்துக்கு இந்த தர முத்திரை பெறப்படுகிறது.

இதேபோல் அனைத்து கோவில்களிலும் தர முத்திரை பெற்ற பிறகே அவற்றை விற்பனை செய்ய வேண்டும் என்று இந்து அறநிலையத்துறை கோவில் நிர்வாகங்களுக்கு உத்தரவிட்டுள்ளது.

இந்த கோவில்கள் அனைத்தும் தர முத்திரையை பெற வேண்டும் என்று அறிவுறுத்தப்பட்டுள்ளது. மத்திய உணவு தர ஆணையத்திடம் இருந்து தர முத்திரை பெற வேண்டுமென்றால் இது சம்பந்தமாக சம்பந்தப்பட்ட அதிகாரிகள் அடிக்கடி ஆய்வு செய்வார்கள். அதன் பிறகு தான் இந்த முத்திரை வழங்கப்படும்.

தயாரிக்கப்படும் பிரசாதங்கள் குறிப்பிட்ட நிர்ணயப்படி தரமானதாக இருந்தால் தான் அதற்கான முத்திரையை வழங்குவார்கள்.

இதனால் பக்தர்களுக்கு தரமான பிரசாதம் கிடைப்பதற்கு உத்தரவாதம் ஏற்படும்.

பெரும்பாலான கோவில்களில் பிரசாதங்களை தயாரித்து கொடுப்பதற்கு ஒப்பந்த அடிப்படையில் பணிகள் கொடுக்கப்பட்டு உள்ளன. அவற்றை அங்குள்ள ஆலய மட பள்ளியில் வைத்து தயாரித்து வழங்க வேண்டும்.

அதற்காக மட பள்ளியில் பாரம்பரியமாக உணவு தயாரிக்கும் தொழிலாளர்கள் ஈடுபடுத்தப்படுவார்கள். அவர்களுக்கு தேவையான பயிற்சிகளையும் உணவு தர அமைப்பு வழங்கும். #TemplePrasadam

திருச்சி:

திருச்சி ஸ்ரீரங்கம் ஆலயம் மீட்பு குழு சார்பில் ஸ்ரீரங்கம் புனிதம் காப்போம் என்ற பொதுக்கூட்டம் நடந்தது. செண்பக மன்னார் செண்டலங்கார ஜீயர் தலைமை தாங்கினார்.

இதில் சிறப்பு விருந்தினராக பா.ஜ.க. தேசிய செயலாளர் எச்.ராஜா கலந்து கொண்டு பேசியதாவது:-

கோவில் ஆகம விதிகளில் அரசு தலையிடக்கூடாது என்று சுப்ரீம் கோர்ட்டு 1940 ஆண்டு தீர்ப்பில் உள்ளது. இதனை தமிழக அறநிலையத்துறை கடைபிடிக்கவில்லை. கோவில்களுக்குள் அறநிலையத்துறை நுழையக்கூடாது என்று 1965-ம் ஆண்டு தீர்ப்பு உள்ளது. இதுவரை அதற்கு எந்த தடை ஆணையும் இல்லை. இதனால் அறநிலையத்துறை கோவில்களில் இருக்க கூடாது.

தமிழகத்தில் 38 ஆயிரத்து 635 கோவில்கள் உள்ளதாக கூறுகின்றனர். ஆனால் 5 சதவீத கோவில்களையே காணவில்லை. 10 சதவீதம் கோவில்கள் சிதிலமடைந்துள்ளன. கோவில் நிலங்களை நிர்வகிக்க 628 அதிகாரிகள் இருந்தும் நாளுக்கு நாள் கோவில்கள் மாயமாகி வருகின்றன.

கோவில் குருக்கள் அனைவருக்கும் ஒரு ஆண்டுக்கு ரூ.58 ஆயிரம் மட்டுமே சம்பளம் வழங்கப்படுவதாக ஆவணங்களில் உள்ளன. அதிகாரிகள், பணியாளர்கள் கோவில் வருவாயில் 18 சதவீதம் பராமரிப்பு என்ற போர்வையில் சுருட்டப்படுகின்றன.

கடந்த பல ஆண்டுகளாக கோவில் சொத்துக்கள் பராமரிப்புக்கு கணக்கு தணிக்கை நடக்கவில்லை. ஆனால் இதற்காக கோவில் வருவாயில் 4.5 சதவீதம் நிதி ஒதுக்கப்பட்டு செலவிடப்பட்டுள்ளதாக அரசு தெரிவிக்கிறது. ஸ்ரீரங்கம் கோவிலுக்கு 403 ஏக்கர் புஞ்சை, 15 தோப்புகள், 2 வணிக வளாகம் என்று கோடிக்கணக்கில் சொத்துக்கள் உள்ளன.

இதனை முறையாக பராமரித்து வரி வசூல் செய்வதில் அதிகாரிகள் கவனம் செலுத்தவில்லை. மாறாக கோவில் ஆகம விதிகளில் தொடர்ந்து தலையிட்டு பக்தர்களின் கோபத்தை சம்பாதிக்கின்றனர். இந்து கோவில்களை விட்டு அறநிலையத்துறை வெளியேற்றப்பட வேண்டும் என்ற நிலைப்பாட்டில் உறுதியாக உள்ளோம்.

தமிழகத்தில் உள்ள கோவில் நிலையங்களில் உள்ள 20 லட்சம் வீடுகளுக்கு குறைந்த பட்சம் வாடகை வசூல் செய்தால் கூட பல லட்சம் கோடிகள் வருமானம் வரும். இதை வைத்து இந்து குழந்தைகளுக்கு இலவச தரமான மருத்துவத்தை அளிக்க முடியும்.

இவ்வாறு அவர் பேசினார். #BJP #Tamilnews