நாகர்கோவில்:
நாகர்கோவிலில் உள்ள ஒரு தனியார் பெண்கள் பள்ளி விடுதியில் தங்கி இருந்த பிளஸ்-1 மாணவி அனிட்டா மர்மகாய்ச்சலுக்கு பலியானார்.
இதையடுத்து நாகர் கோவில் பகுதியில் மர்ம காய்ச்சல் பாதிப்பு இருக்கிறதா? என்பதை சுகாதார துறை அதிகாரிகள் ஆய்வு செய்தனர். மேலும் காய்ச்சல் அறிகுறி உள்ளவர்கள் உடனடியாக அருகில் உள்ள அரசு ஆஸ்பத்திரிகளுக்குச் சென்று உடல் பரிசோதனை செய்து கொள்ள வேண்டும் எனவும் அறிவுறுத்தினர்.
மேலும் நகரில் சுகாதாரத்தை மேம்படுத்தவும் நடவடிக்கைகள் எடுக்கப்பட்டது. கழிவு நீர் ஓடைகளை சுத்தப்படுத்தும் பணிகளும் நடந்து வந்தது.
இந்நிலையில் நாகர்கோவில் ராமன்புதூர் பகுதியைச் சேர்ந்த ஓய்வு பெற்ற பேராசிரியை ஒருவர் காய்ச்சலால் பாதிக்கப்பட்டு ஆசாரி பள்ளம் அரசு ஆஸ்பத்திரிக்கு கொண்டு வரப்பட்டார். 60 வயதான அவருக்கு கடந்த சில நாட்களாக காய்ச்சல் இருந்ததாகவும், இதற்காக அருகில் உள்ள தனியார் ஆஸ்பத்திரியில் சிகிச்சை பெற்று வந்ததாகவும் தெரிவித்தார். அங்கு ரத்த பரிசோதனை செய்தபோது அவருக்கு பன்றி காய்ச்சல் நோய்க்கான அறிகுறி இருப்பதாக தெரிய வந்தது.
இதையடுத்து ஆசாரி பள்ளம் அரசு ஆஸ்பத்திரியில் உள்ள பன்றிகாய்ச்சல் தனி வார்டில் அந்த பெண் அனுமதிக்கப்பட்டார். அவரது ரத்த மாதிரிகள் சேகரிக்கப்பட்டு நெல்லையில் உள்ள ஆய்வு கூடத்திற்கு அனுப்பி வைக்கப்பட்டது. 2 நாளில் ரத்த ஆய்வு முடிவுகள் தெரிய வரும். அப்போது அந்த பெண்ணுக்கு பன்றிக் காய்ச்சல் நோய் தானா? என்பது உறுதிப்படுத்தப்படும்.
இதுபற்றி மாவட்ட சுகாதாரத்துறை துணை இயக்குனர் டாக்டர் மதுசூதனன் கூறியதாவது:-
நாகர்கோவில் பகுதியில் உள்ள மக்கள் காய்ச்சல் அறிகுறி இருந்தால் உடனடியாக அருகில் உள்ள ஆஸ்பத்திரிகளுக்கு சென்று சிகிச்சை பெற்றுக் கொள்ள வேண்டும்.
தாங்களாகவே சுய மருந்து எடுத்துக் கொள்ள வேண்டாம். அது ஆபத்தில் முடியும். அரசு ஆஸ்பத்திரிகளில் போதுமான மருந்து, மாத்திரைகள் உள்ளன. அங்குச் சென்று சிகிச்சை எடுத்துக் கொள்ள வேண்டும்.
இவ்வாறு அவர் கூறினார். #Swineflu
