நீங்கள் தேடியது "காமராஜர் சிலை"

பெரம்பலூர்:

காமராஜர் பிறந்த நாளை முன்னிட்டு பெரம்பலூரில் காமராஜர் சிலைக்கு நாடார் சங்கத்தினர், காங்கிரஸ் கட்சியினர் மாலை அணிவித்து மரியாதை செலுத்தினர். பள்ளிகளில் காமராஜர் பிறந்த நாள் கல்வி வளர்ச்சி நாளாக கொண்டாடப்பட்டது.

பெருந்தலைவர் காமராஜரின் 116-வது பிறந்த நாள் விழா நேற்று தமிழகம் முழுவதும் கொண்டாடப்பட்டது. அதன்படி பெரம்பலூர் மாவட்டத்தில் காமராஜரின் பிறந்தநாள் விழா கொண்டாடப்பட்டது. பெரம்பலூர் புதிய பஸ் நிலையம் அருகே உள்ள காமராஜர் சிலைக்கு பெரம்பலூர் மாவட்ட நாடார் உறவினர் முறை சங்கத்தின் தலைவர் நடராஜன் தலைமையில் சங்கத்தினர் மாலை அணிவித்து மரியாதை செலுத்தினர். பின்னர் பொதுமக்களுக்கு இனிப்புகளை வழங்கினர். இதில் செயலாளர் தினகர், பொருளாளர் பால்ராஜ் மற்றும் சங்க நிர்வாகிகள், உறுப்பினர்கள் பலர் கலந்து கொண்டனர்.

இதேபோல் பெரம்பலூர் மாவட்ட காங்கிரஸ் தலைவரும், வக்கீலுமான தமிழ்ச்செல்வன் தலைமையில் காங்கிரஸ் கட்சியினர் காமராஜர் சிலைக்கு மாலை அணிவித்து மரியாதை செலுத்தினர். இதில் மாநில செயற்குழு உறுப்பினர்கள் சிவாஜி மூக்கன், தங்கவேல், மாவட்ட மகிளா காங்கிரஸ் தலைவர் இந்திராணி உள்ளிட்ட பலர் கலந்து கொண்டனர். பெரம்பலூர் மாவட்ட தேசியவாத காங்கிரஸ் கட்சியின் செயலாளர் குணசேகரன் தலைமையில், அக்கட்சியினர் காமராஜர் சிலைக்கு மாலை அணிவித்து மரியாதை செலுத்தினர்.

பள்ளிகளில் காமராஜர் பிறந்த நாள் விழா கல்வி வளர்ச்சி நாளாக கொண்டாடப்பட்டு வருகிறது. அதன்படி நேற்று விடுமுறை நாளாக இருந்தாலும் பள்ளிகளில் காமராஜர் பிறந்த தினத்தை, கல்வி வளர்ச்சி நாளாக கொண்டாடப்பட வேண்டும் என்று அனைத்து பள்ளிகளின் தலைமை ஆசிரியர்களுக்கும், தமிழக கல்வித்துறை சார்பில் ஏற்கனவே சுற்றறிக்கை விடப்பட்டிருந்தது. அதன்படி நேற்று பெரம்பலூர் மாவட்டத்தில் உள்ள பள்ளிகளில் காமராஜர் பிறந்த நாள் விழா கல்வி வளர்ச்சி நாளாக கொண்டாடப்பட்டது.

அதன்படி பெரம்பலூர் அரசு மேல்நிலைப்பள்ளியில் நடந்த கல்வி வளர்ச்சி நாள் விழாவிற்கு தலைமை ஆசிரியர் சுந்தரராசு தலைமை தாங்கினார். ஆசிரியர் ராஜேந்திரன் வரவேற்றார். அப்போது பள்ளி வளாகத்தில் அலங்கரிக்கப்பட்டிருந்த காமராஜர் உருவப்படத்திற்கு மாணவ-மாணவிகள் மலர் தூவி மரியாதை செலுத்தினர். பின்னர் அவர்களுக்கு இனிப்புகள் வழங்கப்பட்டது. பின்னர் காமராஜர் பிறந்த நாளையொட்டி காமராஜர் பற்றிய பேச்சு போட்டி, கட்டுரை போட்டி, ஓவிய போட்டி, பாட்டு போட்டி உள்ளிட்டவைகள் மாணவ-மாணவிகளுக்கு நடத்தப்பட்டது. அதில் வெற்றி பெற்ற மாணவ-மாணவிகளுக்கு பரிசுகளும், பிளஸ்-2, எஸ்.எஸ்.எல்.சி. பொதுத்தேர்வில் அதிக மதிப்பெண்களை பெற்ற முதல் மூன்று மாணவ-மாணவிகளுக்கு பரிசுத் தொகையும் வழங்கப்பட்டது.

இதை போல் கல்வி வளர்ச்சி நாள் விழாவையொட்டி பெரம்பலூர் தனியார் தொடக்கப்பள்ளியில் அலங்கரிக்கப்பட்டிருந்த காமராஜர் உருவப்படத்திற்கு மாணவ- மாணவிகள் மெழுகுவர்த்தி ஏந்தி மரியாதை செலுத்தினர். துறைமங்கலம் பகுதியில் உள்ள மாற்றுத்திறனாளி மாணவர்களுக்கான தனியார் சிறப்பு பள்ளியிலும் காமராஜர் பிறந்த நாள் விழா கொண்டாடப்பட்டது. அப்போது மாற்றுத்திறனாளி மாணவர்கள் காமராஜர் உருவப்படத்திற்கு மலர் தூவியும், இரு கரங்களையும் கூப்பியும் மரியாதை செலுத்தினர்.

காமராஜர் பிறந்த நாளை முன்னிட்டு நேற்று சமூக வலைத்தளங்களான பேஸ்புக் (முகநூல்), வாட்ஸ்-அப் களில் நிறைய பேர் காமராஜர் படத்தினை பகிர்ந்தனர். நிறைய பேர் வாட்ஸ்-அப்களில் ஸ்டேட்டஸ்களில் காமராஜர் படங்களையும், அவரை பற்றின வீடியோ காட்சிகளையும் வைத்திருந்தனர் என்பது குறிப்பிடத்தக்கது. நேற்று விடுமுறை தினம் என்பதால் பெரம்பலூரில் உள்ள நிறைய தனியார் பள்ளிகளில் நேற்று முன்தினமே காமராஜர் பிறந்த நாளை கல்வி வளர்ச்சி நாளாக கொண்டாடினர். காமராஜர் பிறந்த நாள் விழா கொண்டாடப்படாத பள்ளிகளில் இன்று (திங்கட்கிழமை) கொண்டாடப்படவுள்ளது. 

சேலம்:

சேலம் டவுன் 2-வது அக்ரஹாரம் தெருவில் பெருந்தலைவர் காமராஜர் சிலை உள்ளது. நேற்று காமராஜரின் பிறந்தநாள் என்பதால் அவரது சிலைக்கு அரசியல் கட்சிகள் மற்றும் பல்வேறு அமைப்பினர் மாலை அணிவித்து மரியாதை செலுத்தினர். பா.ஜனதா கட்சி சார்பில் மத்திய மந்திரி பொன்.ராதாகிருஷ்ணன், காமராஜர் சிலைக்கு மாலை அணிவித்து மரியாதை செலுத்துவதற்காக அக்கட்சியினர் ஏற்பாடு செய்திருந்தனர். இதற்காக காமராஜர் சிலை அருகே பா.ஜனதா கட்சியின் கொடிகள் கட்டப்பட்டிருந்தன. மேலும் கட்சி தொண்டர்களும் மத்திய மந்திரியை வரவேற்க காத்திருந்தனர்.

இந்தநிலையில், காங்கிரஸ் கட்சி சார்பில் மாநகர் மாவட்ட தலைவர் ஜெயபிரகாஷ் தலைமையில் கட்சி தொண்டர்கள் காமராஜர் சிலைக்கு மாலை அணிவிப்பதற்காக அங்கு வந்தனர். அப்போது, சிலை அருகே பா.ஜனதா கொடிகள் கட்டப்பட்டிருந்ததை கண்ட காங்கிரஸ் தொண்டர்கள் அதிர்ச்சி அடைந்து, அதற்கு கடும் எதிர்ப்பு தெரிவித்தனர்.

பெருந்தலைவர் காமராஜர் சிலை அருகே எந்த கட்சி கொடியும் இல்லாத சமயத்தில் பா.ஜனதா கொடி மட்டும் எப்படி கட்டலாம்? என்றும், அதை உடனடியாக அவிழ்க்கவில்லை என்றால் நாங்களே அவிழ்த்து விடுவோம் என காங்கிரஸ் கட்சியினர் தெரிவித்தனர். அதற்கு மத்திய மந்திரி பொன்.ராதாகிருஷ்ணன் வந்து கொண்டிருப்பதாகவும், அவர் வந்துவிட்டு சென்றபிறகு கொடியை அப்புறப்படுத்திவிடுவதாக பா.ஜனதாவினர் கூறினர். ஆனால் அதை ஏற்க மறுத்த காங்கிரஸ் தொண்டர்கள் சிலர், சிலை அருகே கட்டப்பட்டிருந்த பா.ஜனதா கட்சி கொடியை அவிழ்க்க முயன்றனர்.

இதை பார்த்த பா.ஜனதாவினர் எதிர்ப்பு தெரிவித்து கோஷமிட்டனர். பின்னர், காங்கிரஸ்-பா.ஜனதா தொண்டர்கள் இடையே வாய்த்தகராறு ஏற்பட்டு தள்ளுமுள்ளு நடந்தது. ஒரு கட்டத்தில் இரு தரப்பினரும் ஒருவரை ஒருவர் கொடி கம்புகளால் அடித்து மோதிக்கொண்டனர். மேலும், கூட்டத்துக்குள் சிலர் கற்களையும் வீசி தாக்கினர்.

அந்த சமயத்தில் கூட்டத்தில் இருந்த ஒருவர் திடீரென பெரிய கல்லை எடுத்து காமராஜர் சிலை மீது வீசினார். ஆனால் அந்த கல் சிலை மீது படாமல் சிலையின் பீடத்தில் விழுந்தது. இதனால் அங்கு பதற்றமும், பரபரப்பும் ஏற்பட்டது. அப்போது, அங்கு பாதுகாப்பு பணியில் இருந்த டவுன் போலீசார் இரு கட்சி தொண்டர்களையும் தடுத்து சமாதானப்படுத்த முயன்றனர். ஆனால் அவர்கள் கேட்காமல் தொடர்ந்து பயங்கர மோதலில் ஈடுபட்டனர்.

அப்போது, மத்திய மந்திரி பொன்.ராதாகிருஷ்ணன் காரில் அங்கு வந்தார். பின்னர், அவரது முன்னிலையிலும் காங்கிரஸ்-பா.ஜனதா கட்சி தொண்டர்கள் ஒருவரை ஒருவர் அடித்து மோதிக்கொண்டனர். பிறகு பா.ஜனதா தொண்டர்கள் அமைதியாக இருக்குமாறும், கட்சி கொடியை அவிழ்த்து வேறு இடத்தில் கட்டுமாறும் அவர் கேட்டுக்கொண்டார். இதையடுத்து சிலை அருகே கட்டப்பட்டிருந்த பா.ஜனதா கொடிகள் அவிழ்த்து வேறு இடத்தில் கட்டப்பட்டன. இருப்பினும், மத்திய மந்திரியுடன் காங்கிரஸ் நிர்வாகிகள் கடும் வாக்குவாதத்தில் ஈடுபட்டனர். அவர் களை போலீசார் சமாதானம் செய்தனர்.

இந்த மோதல் சம்பவத்தில் பா.ஜனதா சூரமங்கலம் மண்டல தலைவர் ரமேஷ் படுகாயம் அடைந்தார். மேலும், காங்கிரஸ் தொண்டர்கள் சிலருக்கும் காயம் ஏற்பட்டதாக கூறப்படுகிறது. இதைத்தொடர்ந்து காமராஜர் சிலைக்கு மத்திய மந்திரி பொன்.ராதாகிருஷ்ணன் மாலை அணிவித்து மரியாதை செலுத்திவிட்டு காரில் அங்கிருந்து புறப்பட்டு சென்றார். இதையடுத்து மோதலில் படுகாயம் அடைந்த பா.ஜனதா நிர்வாகி ரமேஷ், அங்குள்ள ஒரு தனியார் ஆஸ்பத்திரியில் அனுமதிக்கப்பட்டு சிகிச்சை பெற்று வருகிறார். பா.ஜனதா-காங்கிரஸ் தொண்டர்கள் மோதல் சம்பவத்தால் காமராஜர் சிலை அருகே ஏராளமான போலீசார் குவிக்கப்பட்டு பாதுகாப்பு பணியில் ஈடுபட்டனர்.