நீங்கள் தேடியது "சென்னை துறைமுகம்"

சென்னை:

சென்னை துறைமுக தின விழா மற்றும் நவீன பன்னாட்டு பயணிகள் முனையம் தொடக்க விழா சென்னை துறைமுகத்தில் நேற்று நடைபெற்றது. விழாவுக்கு மத்திய நிதி மற்றும் கப்பல்துறை இணை மந்திரி பொன்.ராதாகிருஷ்ணன் தலைமை தாங்கினார்.

மத்திய சுற்றுலாத்துறை மந்திரி கே.ஜெ.அல்போன்ஸ் சிறப்பு விருந்தினராக கலந்து கொண்டு நவீன பன்னாட்டு பயணிகள் முனையத்தை திறந்துவைத்தார். விழாவில் தமிழக சுற்றுலாத்துறை அமைச்சர் வெல்லமண்டி நடராஜன், சென்னை துறைமுக தலைவர் ப.ரவீந்திரன், சுற்றுலாதுறை ஆணையர் வி.பழனிகுமார், சுங்கத்துறை ஆணையர் அஜித்குமார் உள்பட ஏராளமானோர் கலந்து கொண்டனர்.

புதிதாக தொடங்கப்பட்டுள்ள நவீன பன்னாட்டு பயணிகள் முனையத்தின் மொத்த பரப்பளவு 2 ஆயிரத்து 880 சதுர மீட்டர் ஆகும். 17 கோடியே 24 லட்சம் ரூபாய் மதிப்பில் இந்த முனையம் புதுப்பிக்கப்பட்டுள்ளது.

விழாவில், சிறப்பாக பணிபுரிந்த துறைமுக அதிகாரிகள், ஊழியர்களுக்கு விருதுகள் வழங்கப்பட்டன. மேலும் விழாவையொட்டி நடைபெற்ற பல்வேறு போட்டிகளில் வெற்றி பெற்ற அதிகாரிகள் மற்றும் அவரது குழந்தைகளுக்கு பரிசுகள் வழங்கப்பட்டன.

விழாவில் பொன்.ராதாகிருஷ்ணன் பேசியதாவது:-

நாட்டில் உள்ள 12 பெரிய துறைமுகங்களில் 3 துறைமுகங்கள் தமிழகத்தில் உள்ளன. அதில் சென்னை துறைமுகம் பெரிய துறைமுகமாக உள்ளது. கடந்த 2014-ம் ஆண்டு இந்த துறைமுகத்தின் நிகர லாபம் ரூ.6 கோடியாக இருந்தது. தற்போது இதன் நிகர லாபம் ரூ.230 கோடியாக உயர்ந்து உள்ளது.

இந்தியாவின் முதன்மை துறைமுகமாக இதனை கொண்டு வர சில பிரச்சினைகள் உள்ளன. குறிப்பாக மதுரவாயல் பறக்கும் சாலை திட்டம். சென்னை துறைமுகம் முதன்மை பெற வேண்டுமானால் கிடப்பில் போடப்பட்ட இந்த திட்டத்தை உயிர்பெற செய்ய வேண்டும்.



இந்த திட்டத்தை செயல்படுத்த வேண்டும் என்பதற்காக துறைமுக அதிகாரிகள், சாலை மேம்பாட்டு துறை அதிகாரிகள் மற்றும் தமிழக அரசு அதிகாரிகளுடன் கடந்த வாரம் ஆலோசனை கூட்டம் நடத்தினார்கள்.

கூடிய விரைவில் இந்த திட்டத்துக்கான அடிக்கல் நாட்டு விழா நடக்கும் என்று நம்புகிறேன். தமிழக சுற்றுலா துறையானது கன்னியாகுமரி, ராமேசுவரம், மணப்பாடு, மகாபலிபுரம் வரை பயணிகள் போக்குவரத்துக்கான ஒரு திட்டத்தை உருவாக்கி உள்ளனர்.

அந்த திட்டத்தை திருவனந்தபுரம் கோவளம் வரை நீட்டிக்க வேண்டும் என்று மத்திய மந்திரி கே.ஜெ.அல்போன்சிடம் தெரிவித்து உள்ளேன்.

இவ்வாறு அவர் பேசினார்.

மத்திய மந்திரி கே.ஜெ.அல்போன்ஸ் கூறுகையில், ‘உலக அளவிலான சுற்றுலாத்துறையில் இந்தியா 3-வது இடத்தில் உள்ளது. மோடி பிரதமராக பதவியேற்கும் போது இந்தியா 65-வது இடத்தில் இருந்தது குறிப்பிடத்தக்கது.

இந்திய அளவில் வெளிநாட்டு சுற்றுலா பயணிகளை கவர்வதில் தமிழகம் 2-வது இடத்திலும், உள்நாட்டு சுற்றுலாத்துறையில் முதல் இடத்தையும் பிடித்துள்ளது. சென்னை முதல் கன்னியா குமரி வரையிலான கடல்வழி பயணிகள் போக்குவரத்து உள்பட பல்வேறு திட்டங்களுக்கு ரூ.140 கோடி ஒதுக்கீடு செய்யப்பட்டுள்ளது’ என்றார். #PonRadhakrishnan #BJP 

சென்னை:

கிரீஸ் நாட்டின் போர்டோ எம்போரியஸ் நிறுவனத்துக்கு சொந்தமான ‘எம்.டி. நியூ டைமண்ட்’ என்ற மிகப்பெரிய கப்பல், கச்சா எண்ணெயுடன் சென்னை துறைமுகத்துக்கு வந்துள்ளது. கேப்டன் நிகிடாஸ் என்பவரின் தலைமையின் கீழ் 24 பணியாளர்களுடன் கடந்த 20-ந் தேதி ஈராக்கில் உள்ள அல் பஸ்ராவில் இருந்து புறப்பட்டு நேற்று காலை 9.46 மணிக்கு இந்த கப்பல் சென்னைக்கு வந்தது.

சென்னை துறைமுகத்தில் இதுவரை கையாளப்பட்ட எண்ணெய் கப்பல்களில் இது தான் மிகப்பெரியது. இந்த கப்பலை மத்திய இணை மந்திரி பொன்.ராதாகிருஷ்ணன், சென்னை துறைமுக தலைவர் ரவீந்திரன் ஆகியோர் வரவேற்றனர்.


சென்னை துறைமுகத்துக்குள் முதல் முறையாக மிகப்பெரிய கப்பல் வந்து இருக்கிறது. இதன் மூலம் கடல்சார் வர்த்தக சேவையில் சென்னை துறைமுகம் மைல் கல்லை எட்டி உள்ளது. 1 லட்சத்து 60 ஆயிரம் டன் கச்சா எண்ணெயை சென்னையில் இறக்குமதி செய்ய வந்து இருக்கிறது. இந்த கப்பல் 3 லட்சம் டன் கச்சா எண்ணெயை சுமந்து வரும் திறன் கொண்டது.

தற்போது சோதனை ஓட்டமாக அதன் கொள்ளளவை பாதியாக குறைத்து கொண்டுவரப்பட்டு இருக்கிறது. முழு கொள்ளளவுடன் கப்பல் துறைமுகத்துக்குள் வருவதற்கு 20 மீட்டர் ஆழம் தேவை. நமது துறைமுகம் 12 மீட்டர் ஆழம்தான் இருக்கிறது. அதை 16 மீட்டராக ஆழப்படுத்துவதற்கான பணிகள் நடைபெற்று வருகிறது. இன்னும் 2 ஆண்டுக்குள் 16 மீட்டர் ஆழத்தை நடைமுறைக்கு கொண்டு வந்துவிடுவோம். அப்படி வந்தால் 2 லட்சத்து 50 ஆயிரம் டன் கொள்ளளவு கொண்ட எண்ணெய் கப்பலை நிறுத்த முடியும். துறைமுக விரிவாக்க பணிகளுக்காக ரூ.14 கோடிக்கு ஒப்பந்தம் போடப்பட்டு இருக்கிறது.

சென்னை துறைமுகத்துக்குள் மிகப்பெரிய கச்சா எண்ணெய் கப்பல் வருவதால் துறைமுக உபயோகிப்பாளர்களுக்கு 30 முதல் 40 சதவீதம் செலவினம் குறையும்.

மதுரவாயல்-துறைமுகம் பறக்கும் சாலை திட்டத்துக்கான விரிவான திட்ட அறிக்கை 2 மாதத்தில் முடிந்துவிடும். குளச்சல் துறைமுகத்துக்கான விரிவான திட்ட அறிக்கை இறுதி கட்டத்தில் இருக்கிறது.

தூய்மை இந்தியா திட்டத்தின் ஒரு பகுதியாக துறைமுகத்துக்குள் சாலை மற்றும் கப்பல் தளங்களில் தூசுவை அகற்ற சுத்தம் செய்யும் எந்திரம் வாங்கப்பட்டு இருக்கிறது. இதன் மூலம் ஒரு மணி நேரத்தில் 5 கிலோ மீட்டர் தூரத்தை சுத்தம் செய்ய முடியும். சென்னை துறைமுகத்தில் மணல் இறக்குமதி செய்ய ஒப்புதல் வாங்கப்பட்டு இருக்கிறது.

இவ்வாறு அவர்கள் தெரிவித்தனர். #ChennaiPort

சென்னை:

சென்னை துறைமுக சபை செயலாளர் வெளியிட்டுள்ள அறிக்கையில் கூறியிருப்பதாவது:-

சென்னை துறைமுகம் கடந்த 13-ந்தேதி ‘எம்.வி. லேடி செலின்’ என்கிற கப்பலில் இருந்து 4 ஆயிரத்து 257 டன் சரக்குகளை ஒரே நாளில் இறக்குமதி செய்து சாதனை படைத்து உள்ளது.

இதற்கு முன்பாக கடந்த 2014-ம் ஆண்டு நவம்பர் மாதம் 5-ந்தேதி ‘எம்.வி.ஒயின் ஷன்’ என்ற கப்பலில் இருந்து ஒரே நாளில் 3 ஆயிரத்து 531 டன் சரக்கு இறக்குமதி செய்தது சாதனையாக இருந்தது.

தற்போதைய சாதனைக்கு காரணமான, கப்பலில் இருந்து சரக்குகளை இறக்குமதி செய்த பெல் நிறுவனத்துக்கும், சரக்கு இறக்கும் ஊழியர்களுக்கும் துறைமுக சபை தலைவர் ரவீந்திரன் வாழ்த்து தெரிவித்து உள்ளார்.

இவ்வாறு அதில் கூறப்பட்டு உள்ளது. #chennaiharbor