நீங்கள் தேடியது "தமிழக அரசு மருத்துவமனைகள்"

சென்னை:

தமிழகத்தில் உள்ள அரசு ஆஸ்பத்திரிகளில் நோயாளிகளிடம், சி.டி. ஸ்கேன், எக்ஸ்ரே எடுப்பதற்கு ஊழியர்கள் பணம் பெறுவதாக குற்றச்சாட்டுகள் எழுந்தன.

டாக்டர்கள் ஒப்புதல் சீட்டு இல்லாமல் மருந்து - மாத்திரைகளை விற்பனை செய்வதாகவும், மருத்துவ உபகரணங்கள் மற்றும் நோயாளிகளுக்கு வழங்கப்படும் உணவு இருப்புகளை குறைவாக ஆவணங்களில் பதிவு செய்து இருப்பதாகவும் லஞ்ச ஒழிப்புத் துறை போலீசுக்கு ஏராளமான புகார்கள் வந்தன.


சென்னை ராஜீவ்காந்தி அரசு ஆஸ்பத்திரி, திருவல்லிக்கேணி கஸ்தூரிபா காந்தி ஆஸ்பத்திரி, காஞ்சீபுரம், திருவள்ளூர், திண்டுக்கல், தஞ்சை, மதுரை, கடலூர், கோபிசெட்டிபாளையம், ஓமலூர் ஆகிய 10 அரசு ஆஸ்பத்திரிகளில் ஒரே நேரத்தில் சோதனை மேற்கொண்டனர்.

ஆஸ்பத்திரியில் உள்ள மருந்து, மாத்திரைகள் வழங்கும் இடம், எக்ஸ்ரே, ஸ்கேன் எடுக்கும் பகுதி, அறுவை சிகிச்சைக்கான மருத்துவ உபகரணங்கள் வைக்கும் இடம், உணவு இருப்பு ஆகியவற்றில் சோதனை செய்தனர். ஊழியர்கள் பதிவேடு, ஆவணங்களை ஆய்வு செய்தனர்.

அப்போது உள்நோயாளிகள், புறநோயாளிகளிடம் ஆஸ்பத்திரி ஊழியர்கள் லஞ்சம் வாங்கியது தெரிய வந்தது.

சென்னை அரசு ஆஸ்பத்திரியில் 11 பேர் கொண்ட லஞ்ச ஒழிப்புத்துறை போலீசார் சோதனை செய்தபோது 3 ஊழியர்களிடம் கணக்கில் வராத தலா ரூ.1000 பணம் பறிமுதல் செய்யப்பட்டது. இதை அவர்கள் நோயாளிகளிடம் லஞ்சமாக பெற்றது தெரிய வந்தது.

இதே போல் திருவல்லிக்கேணி கஸ்தூரிபா மகப்பேறு ஆஸ்பத்திரியில் பிரசவத்துக்காக வரும் பெண்களின் உறவினர்களிடம் ஊழியர்கள் லஞ்சம் வாங்கியது தெரிய வந்தது.

அங்கு நடந்த சோதனையில் பல முக்கிய ஆவணங்களை போலீசார் பறிமுதல் செய்தனர். அங்கும் ஊழியர்களிடம் இருந்து லஞ்சப்பணம் பறிமுதல் செய்யப்பட்டது.

திருவள்ளூர் அரசு ஆஸ்பத்திரியில் 10 பேர் கொண்ட லஞ்ச ஒழிப்பு போலீசார் சோதனையில் ஈடுபட்டனர். மருத்துவமனை கண்காணிப்பாளர் அறையில் முதலில் சோதனையிட்டனர்.

பச்சிளம் குழந்தைகள் வார்டு, மருந்தகம், பிணவறையிலும், கண் சிகிச்சை பிரிவு, எலும்பு முறிவு பிரிவு, மருந்து கிடங்கு, சமையல் அறை உள்ளிட்ட மருத்துவமனையின் அனைத்து பிரிவுகளிலும் ஆய்வு செய்தனர்.

இந்த சோதனை நள்ளிரவு 12 மணி வரை நடைபெற்றது. பின்னர் முக்கிய ஆவணங்களை லஞ்ச போலீசார் எடுத்துச்சென்றனர்.

புற நோயாளிகளுக்கு வழங்கப்படும் மருந்து குறித்து 4-ந்தேதிக்குப் பிறகு ஆவணத்தில் கணக்கு எழுதாதது, சமையல் செய்ய பொருட்கள் வாங்கியது பதிவை சமையல் ஒப்பந்ததாரர் புத்தகத்தில் எழுதாதது ஆகியவை குறித்து விசாரணை மேற்கொள்ளப்பட்டது.

கண் சிகிச்சைப் பிரிவில் கண்கள் பாதிப்புக்காக பயன்படுத்தப்படும் லென்ஸ் 350-க்கும் மேல் இருந்தது. ஆனால் இருப்பு கணக்குப்பதிவின்படி 150 லென்ஸ்தான் உள்ளது. இதனால் கண் லென்சில் முறைகேடு நடந்து இருப்பது உறுதி செய்யப்பட்டது.

திருவள்ளூர் அரசு ஆஸ்பத்திரியில் நடந்த சோதனையில் சில பிரிவுகளில் முறைகேடு நடந்திருப்பது உறுதிசெய்யப்பட்டது. இதனால் 50-க்கும் மேற்பட்ட மருத்துவமனை ஊழியர்கள், சமையல் ஒப்பந்ததாரர்கள் ஆகியோர் விசாரணைக்கு உட்படுத்தப்படுவார்கள் என போலீசார் தெரிவித்தனர்.

காஞ்சீபுரம் அரசு தலைமை ஆஸ்பத்திரியில் பிரசவ வார்டு, ஸ்கேன் சென்டர், எக்ஸ்ரே பிரிவு, விபத்து பிரிவு உள்ளிட்ட பல்வேறு பகுதிகளில் தீவிர சோதனை நடந்தது.

இதில் ஊழியர்களிடம் இருந்து கணக்கில் வராத ரூ.15 ஆயிரம் லஞ்சப் பணம் பறிமுதல் செய்யப்பட்டது.

கடலூர் நெல்லிக்குப்பம் மெயின் ரோட்டில் உள்ள அரசு ஆஸ்பத்திரியில் அவர்கள் அங்குள்ள மகப்பேறு பிரிவு, எக்ஸ்-ரே பிரிவு, அவசர சிகிச்சை பிரிவு உள்ளிட்ட பல்வேறு பிரிவுகளுக்கும் அவர்கள் சென்று சோதனை மேற்கொண்டனர்.

இந்த சோதனை இரவு 7.30 மணி வரை நடந்தது. சோதனை முடிவில் கணக்கில் வராத ரூ.6 ஆயிரம் மற்றும் உதவித்தொகை தொடர்பான ஆவணங்கள் கைப்பற்றப்பட்டது.

ஈரோடு மாவட்டம் கோபி அரசு ஆஸ்பத்திரியில் மதியம் தொடங்கிய சோதனை இரவு 9.30 மணி வரை நீடித்தது.

சோதனையின்போது கணக்கில் வராத ரூ.1000 கைப்பற்றப்பட்டதாக அதிகாரி ஒருவர் தெரிவித்தார். #TNGovtHospitals #VigilanceRaid

சென்னை:

தமிழகம் முழுவதும் உள்ள அரசு மருத்துவமனைகளில் நோயாளிகளிடமும் அவர்களது உறவினர்களிடமும் மருத்துவமனை ஊழியர்கள் லஞ்சம் வாங்குவதாக ஏராளமான புகார்கள் எழுந்தன. இதையடுத்து லஞ்ச ஒழிப்பு போலீசார் இன்று அதிரடி நடவடிக்கையில் இறங்கினார்கள்.

சென்னை ராஜீவ் காந்தி அரசு பொது மருத்துவமனையில் இன்று காலை லஞ்ச ஒழிப்பு போலீசார் சோதனை மேற்கொண்டனர். மருத்துவமனை டீன் ஜெயந்தியிடம் விசாரணை நடத்திய போலீசார் லஞ்சப் புகார் தொடர்பாக எழுந்துள்ள குற்றச்சாட்டுகள் குறித்தும் விரிவாக விசாரித்தனர்.

திருவல்லிக்கேணி கஸ்தூரிபா மருத்துவமனையிலும் சோதனை நடத்தப்பட்டது. பிரசவத்துக்கு பின்னர் ஆண் குழந்தையை காட்டுவதற்கு ரூ.1000-மும், பெண் குழந்தையை காட்டுவதற்கு ரூ.500-ம் கேட்பதாக அங்கிருந்தவர்கள் குற்றம் சாட்டினர்.
இதேபோல் எழும்பூர் மகப்பேறு மருத்துவமனை, திருவள்ளூர் அரசு மருத்துவமனை, கடலூர் அரசு மருத்துவமனை என தமிழகம் முழுவதும் 60-க்கும் மேற்பட்ட அரசு மருத்துவமனைகளில் லஞ்ச வேட்டை நடத்தப்பட்டது.

இந்த சோதனையின்போது பல்வேறு பகுதிகளில் லஞ்சப் பணமும் கைப்பற்றப்பட்டுள்ளது. கடலூர் அரசு மருத்தவமனையில் உள்ள பணியாளர்களிடம் 4000 ரூபாய் பணத்தை லஞ்ச ஒழிப்புத்துறை போலீசார் பறிமுதல் செய்தனர். மதுரை அரசு மருத்துவமனையில் பெண் பணியாளர் ஒருவரிடம் இருந்து ரூ.10 ஆயிரம் பறிமுதல் செய்யப்பட்டுள்ளது. #TNGovtHospitals #VigilanceRaid

சென்னை:

தமிழகம் முழுவதும் உள்ள அரசு ஆஸ்பத்திரிகளில் நோயாளிகளிடமும் அவர்களது உறவினர்களிடமும் ஆஸ்பத்திரி ஊழியர்கள் லஞ்சம் வாங்குவதாக ஏராளமான புகார்கள் எழுந்தன.

அரசு ஆஸ்பத்திரிகளில் ஏழை மற்றும் நடுத்தர வகுப்பை சேர்ந்தவர்களே அதிக எண்ணிக்கையில் சிகிச்சை பெறுகிறார்கள்.

இதனை கருத்தில் கொண்டே ஆஸ்பத்திரிகளில் ஸ்கேன், எக்ஸ்ரே உள்ளிட்ட பரிசோதனைகளுக்கும் குறைந்த கட்டணத்தையே அரசு நிர்ணயித்துள்ளது. ஆனால் ஆஸ்பத்திரியில் பணிபுரியும் நர்சுகள், ஊழியர்கள் உள்ளிட்டோர் சிகிச்சைக்கு வரும் ஏழை நோயாளிகளிடம் குறிப்பிட்ட தொகையை கேட்டு வாங்குவதாக புகார் இருந்து வந்தது.

இதேபோல மகப்பேறு ஆஸ்பத்திரிகளில் குழந்தை பெறும் பெண்களை பார்க்க வரும் நோயாளிகளிடமும் லஞ்சம் கேட்பதாகவும் நீண்ட காலமாகவே குற்றச்சாட்டு இருந்து வருகிறது. ஒரு பெண்ணை பிரசவத்துக்காக அனுப்பிவிட்டு வார்டுக்கு வெளியே காத்திருக்கும் உறவினர்களிடம் பிறந்த குழந்தை ஆணா? பெண்ணா? என்பதை தெரிவிப்பதற்கு கூட லஞ்சம் கேட்கும் அவலம் அரசு ஆஸ்பத்திரிகளில் நீடித்து வருகிறது.

இதுகுறித்து நோயாளிகளின் உறவினர்கள் ஆஸ்பத்திரிகளில் பணியாற்றும் அதிகாரிகளிடம் முறையிட்டாலும் உரிய நடவடிக்கை எடுக்கப்படுவதில்லை என்பதும் பெரிய குறையாகவே உள்ளது.

அரசு ஆஸ்பத்திரிகளில் லஞ்சம் புரையோடி கிடப்பதால் அது தொடர்பான விழிப்புணர்வு வாசகங்களும் ஆஸ்பத்திரிகளில் இடம் பெற்றுள்ளது. அதில் ஆஸ்பத்திரிகளில் பணிபுரியும் ஊழியர்களுக்கு யாரும் லஞ்சமாக பணமோ, பொருளோ கொடுக்க வேண்டாம் என்று குறிப்பிடப்பட்டிருக்கும்.

ஆனால் இதையெல்லாம் ஆஸ்பத்திரி பணியாளர்கள் யாரும் கண்டு கொள்வதே இல்லை. இஷ்டத்துக்கு நோயாளிகளிடம் கை நீட்டும் பழக்கம் தொடர் கதையாகி வருகிறது.

இதனை தடுக்கும் வகையில் லஞ்ச ஒழிப்பு போலீசார் இன்று அதிரடி நடவடிக்கையில் இறங்கினார்கள். தமிழகம் முழுவதும் 60-க்கும் மேற்பட்ட அரசு ஆஸ்பத்திரிகளில் லஞ்ச வேட்டை நடத்தப்பட்டது. காலையில் அரசு ஆஸ்பத்திரிகளில் அதிரடியாக புகுந்து சோதனை நடத்தினர்.

நோயாளிகள் சிகிச்சை பெறும் வார்டுகள் மற்றும் புறநோயாளிகள் பிரிவு உள்ளிட்ட இடங்களில் விசாரணை நடத்தினர். நோயாளிகளிடமும், அவர்களை பார்க்க வந்த உறவினர்களிடமும் விசாரணை நடத்தப்பட்டது. அரசு பொது மருத்துவமனைகள் மட்டுமின்றி, ஆரம்ப சுகாதார நிலையங்களிலும் சோதனை நடைபெற்றது.

சென்னை ராஜீவ் காந்தி அரசு பொது மருத்துவமனையில் இன்று காலை லஞ்ச ஒழிப்பு போலீசார் சோதனை மேற்கொண்டனர்.

ஆஸ்பத்திரி டீன் ஜெயந்தியிடம் விசாரணை நடத்திய போலீசார் லஞ்சப் புகார் தொடர்பாக எழுந்துள்ள குற்றச்சாட்டுகள் குறித்தும் விரிவாக விசாரித்தனர்.

திருவல்லிக்கேணி கஸ்தூரிபா ஆஸ்பத்திரியிலும் சோதனை நடத்தப்பட்டது. பிரசவத்துக்கு பின்னர் ஆண் குழந்தையை காட்டுவதற்கு ரூ.1000-மும், பெண் குழந்தையை காட்டுவதற்கு ரூ.500-ம் கேட்பதாக அங்கிருந்தவர்கள் குற்றம் சாட்டினர்.

எழும்பூரில் உள்ள மகப்பேறு மருத்துவமனை மற்றும் ராயப்பேட்டை அரசு ஆஸ்பத்திரியிலும் தீவிர சோதனை நடத்தப்பட்டது.


கடலூர் அரசு ஆஸ்பத்திரியில் லஞ்ச ஒழிப்பு போலீசார் கடந்த ஒருவாரமாக எக்ஸ்-ரே, மகப்பேறு பிரிவு, ரத்த பரிசோதனை நிலையம் ஆகியவற்றை கண்காணித்து வந்தனர். இன்று அதிரடி சோதனை நடத்தினர்.

ஒவ்வொரு வார்டுக்கும் சென்று விசாரித்தனர். மகப்பேறு பிரிவிலும் சோதனை நடந்தது.

மதுரை அரசு ஆஸ்பத்திரியிலும் 12 பேர் கொண்ட லஞ்ச ஒழிப்புத்துறை போலீசார் பிற்பகலில் அதிரடி சோதனையை தொடங்கினர்.

பிரசவ வார்டு, நோயாளிகள் வருகை பதிவேடு, தலைக்காய பிரிவு உள்பட பல்வேறு வார்டுகளில் சோதனை மேற்கொண்டனர். அங்குள்ள ஆவணங்களை பார்வையிட்டனர். அதில் உள்ள விவரங்கள் குறித்து சம்பந்தப்பட்டவர்களிடம் விசாரித்து வருகிறார்கள்.

தஞ்சை ராஜாமிராசுதார் அரசு ஆஸ்பத்திரியில் பிரசவத்திற்கு லஞ்சம் கேட்பதாக புகார்கள் எழுந்தை தொடர்ந்து லஞ்ச ஒழிப்பு போலீசார் சோதனை நடத்தினர்.

மகப்பேறு பிரிவில் டாக்டர்கள், செவிலியர்கள் மற்றும் நோயாளிகள், உறவினர்களிடம் விசாரணை நடத்தப்பட்டது.

திண்டுக்கல் அரசு ஆஸ்பத்திரியில் லஞ்ச ஒழிப்புத்துறை டி.எஸ்.பி. சத்தியசீலன் தலைமையில் இன்ஸ்பெக்டர்கள் சுந்தர் ராஜன், ரூபா மற்றும் 12 பேர் கொண்ட குழுவினர் சோதனை நடத்தினர். மகப்பேறு பிரிவு மற்றும் குழந்தைகள் நல வார்டிலும் சோதனை நடந்தது.

லஞ்ச ஒழிப்புத்துறை அதிகாரிகள் உள்ளே நுழைந்ததும் நுழைவு வாயில் அடைக்கப்பட்டது. அங்கிருந்த டாக்டர்கள் மற்றும் செவிலியர்கள், மருத்துவ பணியாளர்கள் ஆகியோரிடம் விசாரணை நடந்தது.

ஆஸ்பத்திரியில் அனுமதிக்கப்பட்டுள்ள நோயாளிகள் மற்றும் அவர்களுடன் தங்கி இருப்பவர்களிடமும் பணம் வசூல் செய்யப்படுகிறதா? என்றும் விசாரணை நடத்தப்பட்டது.

சேலம் மாவட்டம் ஓமலூரில் உள்ள அரசு ஆஸ்பத்திரியில் லஞ்ச ஒழிப்பு போலீசார் அதிரடி சோதனை நடத்தினர்.

ஸ்கேன், எக்ஸ்ரே சென்டர், மகப்பேறு அறை, ரத்த சோதனைப்பிரிவு, ஓ.பி.சீட்டு வழங்கும் அறைகளில் உள்ள மேஜைகளை திறந்து பார்த்தனர். அங்கிருந்த ஊழியர்களிடம் விசாரணை நடத்தினர்.

தமிழகம் முழுவதும் நடந்த இந்த சோதனையால் அரசு ஆஸ்பத்திரிகளில் பெரும் பரபரப்பு நிலவியது. #TNGovtHospitals #Bribe