நீங்கள் தேடியது "தீயணைப்பு படையினர்"

திருவள்ளூர்:

திருவள்ளூர் மாவட்டத்தில் வடகிழக்கு பருவமழை காரணமாக தொடர் மழை பெய்து வருகிறது.

இதன் காரணமாக ஆறு, ஏரி, குளங்கள் வேகமாக நிரம்பி வருகிறது. மேலும் கொசஸ்தலை ஆற்றில் வெள்ளப்பெருக்கு ஏற்பட்டதால் மாவட்டம் முழுவதும் வெள்ளக்காடாக காட்சி அளிக்கிறது. இதனால் திருவள்ளூரை அடுத்த பூண்டி ஒன்றியம், குன்னவளம் அடுத்த குப்பத்துப் பாளையத்தில் கொசஸ்தலை ஆற்றில் வெள்ளப்பெருக்கு ஏற்பட்டு மழைநீர் பெருக்கெடுத்து வயல்வெளியில் புகுந்து ஓடுகிறது.

இந்த நிலையில் நேற்று முன்தினம் காஞ்சிப்பாடியை சேர்ந்த மணி மற்றும் அவரது மனைவி அமுலு ஆகிய 2 பேரும் விவசாயப் பணிக்காக குப்பத்துப் பாளையம் கிராமத்திற்கு சென்றனர். பணி முடித்த பிறகு வீட்டிற்கு செல்வதற்காக புறப்பட்டனர்.

ஆனால் தொடர்ந்து மழை பெய்ததால் விவசாய தோட்டத்தில் இருந்த வீட்டில் தங்கிவிட்டனர். இந்நிலையில் கொசஸ்தலை ஆற்றில் ஏற்பட்ட வெள்ளப்பெருக்கால் குப்பத்து பாளையத்தில் உள்ள வயல்வெளி பகுதியில் வெள்ளம் புகுந்தது.

நேற்று மதியம் கணவன், மனைவி இருவரும் வீட்டிற்கு செல்வதற்காக புறப்பட்டனர் ஆனால் இடுப்பளவு தண்ணீர் சூழ்ந்து கொண்டது. இதனால் செய்வதறியாது தவித்தனர். பிறகு வயல்வெளி பகுதியிலிருந்த வீட்டின் மீது ஏறி நின்று கொண்டு வீட்டின் உரிமையாளருக்கு தகவல் தெரிவித்தனர்.

வீட்டின் உரிமையாளர் திருவள்ளூர் வட்டாட்சியர் செந்தில்குமாருக்கு தகவல் தெரிவித்தார். அதன்பேரில் திருவள்ளூர் கோட்டாட்சியர் ரமேஷ், வட்டாட்சியர் ஏ.செந்தில்குமார், மாவட்ட தீயணைப்பு அலுவலர் பாஸ்கரன், உதவி மாவட்ட அலுவலர் வில்சன் ராஜ்குமார், நிலைய அலுவலர் இளங்கோவன் மற்றும் தீயணைப்பு வீரர்கள் மற்றும் போலீசார் சம்பவ இடத்திற்கு விரைந்து சென்றனர். அப்போது அங்கு வெள்ளத்தின் நடுவே சிக்கித் தவித்த 2 பேரையும் கயிறு மற்றும் லைப் ஜாக்கெட் கொண்டு சுமார் ஒரு மணி நேரம் போராடி பத்திரமாக மீட்டனர்.

புதுச்சேரி:

புதுவை மேட்டுப்பாளையம் தொழிற்பேட்டையில் 22-வது குறுக்கு தெருவில் மாத்திரை தயாரிக்கும் தனியார் தொழிற்சாலை உள்ளது. விலை உயர்ந்த மாத்திரைகள் தயாரிக்கும் இந்த தொழிற்சாலை முழுவதும் குளிர்சாதன வசதி கொண்டது.

தொழிற்சாலையின் மேல்தளத்தில் மாத்திரைகள் தயாரிப்பும், கீழ்தளத்தில் மாத்திரைகளை சேமிக்கும் குடோனும் உள்ளது. இந்த நிலையில் இன்று காலை 7மணியளவில் இந்த தொழிற்சாலை குடோனில் இருந்து திடீரென புகைமூட்டம் கிளம்பியது. இதனை பார்த்ததும் தொழிற்சாலையில் மேல்தளத்தில் மாத்திரை தயாரிப்பு பணியில் ஈடுபட்ட தொழிலாளர்கள் அலறியடித்து கொண்டு தொழிற்சாலையில் இருந்து வெளியே ஓடிவந்தனர்.

பின்னர் இதுகுறித்து உடனடியாக கோரிமேடு தீயணைப்பு நிலையத்துக்கு தகவல் தெரிவித்தனர். நிலைய அதிகாரி கிருஷ்ணமூர்த்தி தலைமையில் தீயணைப்பு வீரர்கள் விரைந்து வந்து தீயை அணைக்கும் பணியில் ஈடுபட்டனர். ஆனாலும் தீமுட்டம் அதிகமாக கிளம்பியதால் புதுவை, வில்லியனூர், சேதராப்பட்டு ஆகிய பகுதிகளில் இருந்து தீயணைப்பு வண்டிகள் வரவழைக்கப்பட்டன. அவர்கள் கோரிமேடு தீயணைப்பு படையினருடன் இணைந்து மேலும் தீபரவாமல் அணைத்தனர்.

இந்த திடீர் தீவிபத்தில் குடோனில் வைக்கப்பட்டிருந்த பல லட்சம் மாத்திரைகள் மற்றும் பொருட்கள் எரிந்து சேதமானது. இந்த தீவிபத்து குறித்து மேட்டுப்பாளையம் போலீசார் விசாரணை நடத்தி வருகிறார்கள்.