நீங்கள் தேடியது "நீர் திறப்பு"

சென்னை:

முதல் - அமைச்சர் எடப்பாடி பழனிசாமி வெளியிட்டுள்ள அறிக்கையில் கூறி இருப்பதாவது:-

திருநெல்வேலி மாவட்டம், ராதாபுரம் வட்டத்திலுள்ள நிலங்களின் பாசனத்திற்காக கன்னியாகுமரி மாவட்டம், கோதையாறு பாசனத் திட்ட அணைகளிலிருந்து தண்ணீர் திறந்து விடுமாறு வேளாண் பெருங்குடி மக்களிடமிருந்து எனக்கு கோரிக்கைகள் வந்துள்ளன.

வேளாண் பெருமக்களின் வேண்டுகோளினை ஏற்று, கன்னியாகுமரி மாவட்டத்தில் அமைந்துள்ள கோதையாறு பாசனத் திட்ட அணைகளிலிருந்து திருநெல்வேலி மாவட்டம், ராதாபுரம் வட்டத்திலுள்ள நிலங்களின் பாசனத்திற்கு ராதாபுரம் கால்வாய்க்கு 9.7.2018 முதல் 30 நாட்களுக்கு வினாடிக்கு 75 கனஅடி வீதம் மொத்தம் 194.40 மில்லியன் கனஅடிக்கு மிகாமல் தண்ணீர் திறந்துவிட நான் ஆணையிட்டுள்ளேன்.

இதனால் திருநெல்வேலி மாவட்டம், ராதாபுரம் வட்டத்திலுள்ள 17,000 ஏக்கர் நிலங்கள் பாசன வசதி பெறும் என்பதை மகிழ்ச்சியுடன் தெரிவித்துக் கொள்கிறேன். மேலும், விவசாயப் பெருமக்கள் நீரை சிக்கனமாக பயன்படுத்தி, நீர் மேலாண்மை மேற்கொண்டு உயர் மகசூல் பெற வேண்டுமாய் அன்புடன் கேட்டுக்கொள்கிறேன்.

இவ்வாறு முதல்-அமைச்சர் எடப்பாடி பழனிசாமி கூறியுள்ளார். #TNCM #EdappadiPalanisamy

மேட்டூர்:

தமிழக - கர்நாடக எல்லைப் பகுதியில் கடந்த சில நாட்களாக கோடை மழை பெய்து வருகிறது. இதனால் ஒகேனக்கல் காவிரி ஆற்றில் நீர்வரத்து அதிகரித்தும், குறைந்தும் காணப்பட்டு வருகிறது.

நேற்று முன்தினம் வினாடிக்கு 1500 கன அடியாக இருந்த நீர்வரத்து நேற்று காலை 3 ஆயிரம் கன அடியாக அதிகரித்தது. இதனால் ஒகேனக்கல் மெயின் அருவி, சினிபால்ஸ், ஐந்தருவிகளில் தண்ணீர் ஆர்ப்பரித்து கொட்டுகிறது.

கோடை காலத்தில் அருவிகளில் தண்ணீர் அதிகளவு கொட்டுவதால் தமிழகம் மட்டுமல்லாது கர்நாடகம் உள்பட பல்வேறு பகுதிகளில் இருந்து ஏராளமான சுற்றுலா பயணிகள் ஒகேனக்கல்லில் குவிந்துள்ளனர். இதனால் ஒகேனக்கல் களை கட்டி உள்ளது.

ஒகேனக்கல் காவிரி ஆற்றில் தற்போது 3 ஆயிரம் கன அடி தண்ணீர் வந்து கொண்டிருக்கிறது. இந்த தண்ணீர் நேராக மேட்டூர் அணையை நோக்கி வந்து கொண்டிருக்கிறது.

கோடை மழை காரணமாக மேட்டூர் அணைக்கு வரும் நீர்வரத்து படிப்படியாக அதிகரித்து கடந்த 9-ந் தேதி 1970 கன அடியாக உயர்ந்தது. அதன் பிறகு நீர்வரத்து குறையத் தொடங்கியது.

நேற்று முன்தினம் 611 கன அடியாக இருந்த நீர்வரத்து நேற்று காலை 439 கன அடியாக குறைந்தது. தற்போது மீண்டும் மழை பெய்து வருவதால் இன்று காலை நீர்வரத்து அதிகரித்து 748 கன அடி தண்ணீர் வந்து கொண்டிருக்கிறது.

அணையின் நீர்மட்டம் நேற்று 34.06 அடியாக இருந்தது. இன்று காலை இது 33.85 அடியாக குறைந்தது. மேட்டூர் அணையில் இருந்து குடிநீர் தேவைக்காக 500 கன அடி தண்ணீர் திறக்கப்பட்டது.

கடந்த 11-ந் தேதி இது 2 ஆயிரம் கன அடியாக அதிகரிக்கப்பட்டது. நேற்று முன்தினம் குடிநீர் தேவைக்காக திறக்கப்படும் நீரின் அளவு 1500 கன அடியாக குறைக்கப்பட்டது. இந்த நிலையில் நேற்று இரவு முதல் மீண்டும் 2 ஆயிரம் கன அடி தண்ணீர் அணையில் இருந்து திறந்து விடப்படுகிறது.

காவிரி ஆற்றில் மீண்டும் நீர்வரத்து அதிகரித்துள்ளதால் அணையின் நீர்மட்டம் உயர வாய்ப்புள்ளது. #MetturDam