நீங்கள் தேடியது "நீர் வரத்து அதிகரிப்பு"

கூடலூர்:

கேரளா மற்றும் வைகை அணை நீர் பிடிப்பு பகுதியான மூல வைகை ஆறு, வெள்ளிமலை மற்றும் மேற்கு தொடர்ச்சி மலைப்பகுதிகளில் தொடந்து மழை பெய்து வருகிறது. இதனால் கடந்த சில மாதங்களுக்கு முன்பு வைகை அணை முழு கொள்ளளவை எட்டியது.

தற்போது மீண்டும் மழை தொடர்ந்து வருவதால் அணையின் நீர் மட்டம் 67.78 அடியை எட்டியுள்ளது. அணைக்கு 2,517 கன அடி நீர் வருகிறது. அணையில் இருந்து பாசனம் மற்றும் குடிநீருக்காக 1,560 கன அடி நீர் திறக்கப்படுகிறது. மழை தொடரும் பட்சத்தில் விரைவில் முழு கொள்ளளவை எட்டும்.

முல்லைப் பெரியாறு அணை நீர் மட்டம் 133.75 அடியாக உள்ளது. அணைக்கு 1,953 கன அடி நீர் வருகிறது. அணையில் இருந்து 1,947 கன அடி நீர் திறக்கப்படுகிறது. மஞ்சளாறு அணையின் நீர் மட்டம் 52.40 அடியாக உள்ளது. 43 கன அடி நீர் வருகிறது. நீர் திறப்பு இல்லை.

சோத்துப்பாறை அணையின் நீர் மட்டம் 126.34 அடியாக நீடிக்கிறது. 42 கன அடி நீர் வருகிறது. 30 கன அடி நீர் திறக்கப்படுகிறது.

கூடலூர் லோயர் கேம்ப், உத்தமபாளையம், வீரபாண்டி பகுதியில் நேற்று மாலையில் இருந்தே தொடர்ந்து மழை பெய்து வருகிறது. இன்று காலையும் சாரல் மழை பெய்வதால் விவசாய பணிகள் பாதிக்கப்பட்டுள்ளது.

கூலித் தொழிலாளர்கள் தொடர் மழை காரணமாக வேலையை இழந்துள்ளனர். பெரியாறு 2.4, தேக்கடி 2.6, கூடலூர் 32.3, சண்முகா நதி அணை 27, உத்தமபாளையம் 3.8, வீரபாண்டி 13.2, மி.மீ மழை அளவு பதிவாகியுள்ளது. #VaigaiDam

கூடலூர்:

வடகிழக்கு பருவமழை தொடங்குவதற்கு முன்பாகவே வெப்பச்சலனம் காரணமாக தென் தமிழகத்தில் பரவலாக மழை பெய்து வருகிறது. தேனி மாவட்டத்திலும் கேரள எல்லையை ஒட்டியுள்ள மேற்கு தொடர்ச்சி மலையடிவாரப் பகுதிகளிலும் மழை பெய்து வருவதால் பெரியாறு அணைக்கு தொடர்ந்து நீர்வரத்து அதிகரித்தது.


71 அடி உயரமுள்ள வைகை அணையின் நீர் மட்டம் 56.46 அடியாக உள்ளது. அணைக்கு வினாடிக்கு 1,473 கன அடி தண்ணீர் வருகிறது. அணையில் இருந்து 1,190 கன அடி தண்ணீர் திறக்கப்படுகிறது. நீர் இருப்பு 2,961 மில்லியன் கன அடியாக உள்ளது.

56 அடி உயரமுள்ள மஞ்சளாறு அணையின் நீர் மட்டம் 46.50 அடியாக உள்ளது. நீர் வரத்து 170 கன அடி. சோத்துப்பாறை அணை நீர் மட்டம் அதன் முழு கொள்ளளவை எட்டி 126.67 அடியாக உள்ளது.

அணைக்கு வரும் 184 கன அடி தண்ணீரில் 181 கன அடி நீர் வெளியேற்றப்படுகிறது. நீர் இருப்பு 100.66 மில்லியன் கன அடியாக உள்ளது.

பெரியாறு 1.4, தேக்கடி 5.6, கூடலூர் 2.6, சண்முகாநதி அணை 11, வீரபாண்டி 11, உத்தமபாளையம் 6.4, மஞ்சளாறு 44, சோத்துப்பாறை 44 மி.மீ மழை அளவு பதிவாகியுள்ளது.

சோத்துப்பாறை அணை நீர் மட்டம் முழு கொள்ளளவை எட்டியுள்ளதால் விரைவில் பாசனத்துக்கு தண்ணீர் திறக்கப்படும் என எதிர்பார்க்கப்படுகிறது. பெரியகுளம், தாமரைக்குளம், பாப்பிப்பட்டி கண்மாய்கள், மேல்மங்கலம் மற்றும் பழைய ஆயக்கட்டு பகுதிகளான 1,825 ஏக்கர் நிலங்களும் லெட்சுமிபுரம் புதிய ஆயக்கட்டு பகுதிகளான 1040 ஏக்கர் நிலங்களும் இதனால் பாசன வசதி பெறும். அணை நிரம்பியுள்ளதால் வராக நதிக்கரையோரம் உள்ள பெரியகுளம், வடுகப்பட்டி, மேல்மங்கலம், ஜெயமங்கலம், குள்ளப்புரம் ஆகிய பகுதிகளில் வசிக்கும் கரையோர மக்கள் பாதுகாப்பான இடங்களுக்கு செல்லுமாறு பொதுப்பணித் துறையினரால் அறிவுறுத்தப்பட்டுள்ளனர்.  #PeriyarDam #VaigaiDam

ஸ்ரீமுஷ்ணம்:

கடலூர் மாவட்டம் காட்டுமன்னார் கோவில் அருகே உள்ள லால்பேட்டையில் வீராணம் ஏரி உள்ளது. ஏரியின் மொத்த கொள்ளளவு 47.50 அடி ஆகும். விவசாயிகளின் உயிர் நாடியாக விளங்கும் இந்த ஏரி மூலம் 44 ஆயிரத்து 856 ஏக்கர் விளைநிலங்கள் பாசன வசதி பெறுகிறது. அது மட்டுமின்றி சென்னை மக்களின் குடிநீர் தேவைக்காக 72 கன அடி தண்ணீர் அனுப்பப்படும்.

ஏரியின் நீர்மட்டம் குறைந்ததால் கடந்த மார்ச் மாதம் 21-ந் தேதி வீராணம் ஏரியில் இருந்து சென்னைக்கு குடிநீர் அனுப்புவது நிறுத்தப்பட்டது. நீர் வரத்து இல்லாததால் கடந்த 5 மாதங்களாக வீராணம் ஏரி முற்றிலும் வறண்டு காணப்பட்டது. பாசனத்துக்கு தண்ணீர் இல்லாமல் விவசாயிகள் அவதி அடைந்து வந்தனர்.

இந்த நிலையில் கடந்த சில நாட்களுக்கு முன்பு கர்நாடகாவில் பெய்த கன மழை காரணமாக காவிரி உபரிநீர் தமிழகத்துக்கு திறந்து விடப்பட்டது. அந்த தண்ணீர் மேட்டூர் அணைக்கு வந்தடைந்தது. அங்கிருந்து கடந்த 19-ந் தேதி பாசனத்திற்கு தண்ணீர் திறந்து விடப்பட்டது. கல்லணைக்கு வந்த தண்ணீர் கடந்த 26-ந் தேதி கீழணைக்கு திறக்கப்பட்டது.

கீழணையில் இருந்து நேற்று முன்தினம் வடவாறு வழியாக வீராணம் ஏரிக்கு வினாடிக்கு 1000 கனஅடி தண்ணீர் திறக்கப்பட்டது. நேற்று மாலை அது 2200 கனஅடியாக உயர்த்தப்பட்டது. இதனால் வீராணம் ஏரிக்கு அதிகமான அளவு தண்ணீர் வந்து கொண்டிருக்கிறது. இன்னும் ஒரு வாரத்துக்குள் வீராணம் ஏரி நிரம்பி விடும் என கூறப்படுகிறது.

வீராணம் ஏரி நிரம்பிய பின்னர் சென்னைக்கு குடிநீர் அனுப்புவது குறித்து முடிவு எடுக்கப்படும் என தெரிகிறது.  #VeeranamLake

கூடலூர்:

கேரளாவில் தென்மேற்கு பருவமழை தீவிரமடைந்துள்ளதால் முல்லைப் பெரியாறு அணைக்கு நீர்வரத்து அதிகரித்து நீர் மட்டம் உயரத் தொடங்கியது. 2 நாட்களாக மழை இல்லை. தற்போது மீண்டும் மழை தொடங்கியுள்ளதால் அணைக்கு நீர் வரத்து 2473 கன அடியாக உயர்ந்துள்ளது.

அணையில் இருந்து 2100 கன அடி நீர் திறக்கப்படுகிறது. வைகை அணை நீர் மட்டம் 53.12 அடியாக உள்ளது. 1832 கன அடி நீர் வருகிறது. மதுரை மாநகர குடிநீர் மற்றும் பாசனத்துக்காக 960 கன அடி நீர் திறக்கப்படுகிறது. மஞ்சளாறு அணையின் நீர் மட்டம் 41.95 அடியாக உள்ளது. வரத்தும் திறப்பும் இல்லை. சோத்துப்பாறை அணையின் நீர் மட்டம் 120.86 அடியாக உள்ளது. வரத்து இல்லாத நிலையில் 3 கன அடி நீர் திறக்கப்படுகிறது.

பெரியாறு 26, தேக்கடி 22, கூடலூரில் 23.3, சண்முகாநதி அணை 17, உத்தமபாளையம் 27, வீரபாண்டி 1, வைகை அணை 1, மஞ்சளாறு 12, சோத்துப்பாறை 2 மி.மீ மழை அளவு பதிவாகியுள்ளது.

பெரியாறு அணையில் இருந்து பாசனத்துக்காக கூடுதல் தண்ணீர் திறக்கப்பட்டுள்ளதாலும், தேனி மாவட்டத்தில் பரவலாக மழை பெய்து வருவதாலும் முல்லைப் பெரியாற்றில் தண்ணீர் வரத்து அதிகரித்துள்ளது.

எனவே பொதுமக்கள் ஆற்றை கடக்க, குளிக்க, துணி துவைக்க கூடாது என அறிவுறுத்தப்பட்டுள்ளது. மேலும் கரையோர மக்கள் எச்சரிக்கையுடன் இருக்க வேண்டும் என தெரிவிக்கப்பட்டுள்ளது. மேலும் வருவாய்த்துறை, பொதுப்பணித்துறை மற்றும் போலீசார் சார்பில் முல்லைப் பெரியாறு கரையோரத்தில் பொதுமக்கள் நடமாட்டம் உள்ள பகுதிகளை கண்காணிக்கவும், எச்சரிக்கை பலகைகள் வைக்கவும் பாதுகாப்பு ஏற்பாடுகள் செய்யவும் மாவட்ட கலெக்டர் பல்லவி பல்தேவ் உத்தரவிட்டுள்ளார்.

மேலும் அவசர கால உதவிக்கு பொதுமக்கள் வெள்ள பாதிப்பு குறித்து தெரிவிக்க அந்தந்த வட்டாட்சியர் அலுவலகம் மற்றும் கட்டணம் இல்லா தொலைபேசி எண் 1077 மூலம் தொடர்பு கொண்டு தகவல்களை தெரிவிக்கலாம் என அறிவிக்கப்பட்டுள்ளது. #PeriyarDam #VaigaiDam