நீங்கள் தேடியது "புதுவை அரசு"

புதுச்சேரி:

புதுவை முதியோர் பராமரிப்பு சங்கத்தின் சார்பில் சர்வதேச முதியோர் தின விழா ஆந்திர மகாசபையில் இன்று நடந்தது. விழாவுக்கு அமைச்சர் கந்தசாமி தலைமை தாங்கினார். பிப்டிக் சேர்மன் சிவா எம்.எல்.ஏ. முன்னிலை வகித்தார். முதல்-அமைச்சர் நாராயணசாமி, சபாநாயகர் வைத்திலிங்கம் ஆகியோர் வாழ்த்தி பேசினர். விழாவில் முதல்-அமைச்சர் நாராயணசாமி பேசியதாவது:-

புதுவை அரசு சார்பில் பல்வேறு நலத்திட்டங்கள் செயல்படுத்தப்பட்டு வருகிறது. ஆனால் இதற்கான நிதி மத்திய அரசிடம் இருந்து கிடைப்பதில்லை. அரசு ஊழியர்களுக்கு 7வது சம்பள கமி‌ஷனை அமல்படுத்தியுள்ளோம். அதற்கான தொகையையும் மத்திய அரசு தரவில்லை. ஒத்த கருத்துடைய கட்சிகள் மாநிலத்திலும், மத்தியிலும் பதவியில் இருந்தால்தான் நிதி கிடைக்கும். மாற்று ஆட்சி மத்தியில் இருந்தால் மாற்றாந்தாய் மனப்பான்மையோடுதான் நடக்கின்றனர்.

10 ஆண்டு மத்தியில் காங்கிரஸ் ஆட்சி இருந்தது. அப்போது டெல்லியில் கேட்டதெல்லாம் கொடுத்தனர். ஆனால் இப்போது கொடுக்கமாட்டோம் என சொல்வதில்லை. அதற்குப்பதில் பரிசீலனை செய்கிறோம் என்கின்றனர். 2 ஆண்டாக நிதி தருவதற்கு பரிசீலனை செய்துகொண்டே இருக்கின்றனர். ஆனால் நாங்கள் எங்கள் முயற்சியை கைவிடவில்லை. நானும், அமைச்சர்களும் மத்திய அரசை தொடர்ந்து அணுகி வருகிறோம். 15-வது நிதிக்கமி‌ஷனில் புதுவை இடம்பெறவில்லை.

மாநிலங்களுக்கான குழுவில் இடம்பெற்றிருந்தால் 42 சதவீத நிதி கிடைக்கும். யூனியன் பிரதேச நிதி கமி‌ஷனில் சேர்த்திருந்தால் 90 சதவீதம் நிதி கிடைத்திருக்கும். ஆனால் தற்போது நமக்கு 26 சதவீதம்தான் நிதி கிடைக்கிறது. ஆனால் ஜிஎஸ்படி வரி கமிட்டியில் புதுவையை மாநிலஅரசாக மத்திய அரசு கருதுகிறது. இதனால் நிதி கமி‌ஷனில் புதுவையை இணைக்க தொடர்ந்து வலியுறுத்தி வருகிறோம்.

தற்போது நமக்கு மத்திய அரசின் நிதி ரூ.ஆயிரத்து 650 கோடிதான் கிடைக்கிறது. மாநிலமாக புதுவையை அங்கீகரித்தால் ரூ.3 ஆயிரத்து 700 கோடி நிதி கிடைக்கும். இத்தனை இடையூறுக்கு இடையிலும் பல்வேறு துறைகளில் நாம் தன்னிறைவு அடைந்துள்ளோம். டெல்லி, புதுவை ஆகியவற்றின் முட்டுக்கட்டைகளை தாண்டி ஆட்சி நடத்தி வருகிறோம். இதற்கெல்லாம் 4,5 மாதங்களில் விடிவுகாலம் பிறக்கும்.

இவ்வாறு அவர் பேசினார்.

முதியோர் பராமரிப்பு சங்கத்தின் இயக்குனர் டாக்டர் பத்மநாபன் வரவேற்றார். விழாவில் எம்எல்ஏ லட்சுமிநாராயணன், சமூகநலத்துறை இயக்குனர் சாரங்கபாணி மற்றும் அதிகாரிகள் பங்கேற்றனர். #Narayanasamy

புதுச்சேரி:

அகில இந்திய வணிகர் சம்மேளன துணைத்தலைவராக தேர்ந்தெடுக்கப்பட்டுள்ள, புதுவை வணிகர்கள் கூட்டமைப்பு தலைவர் சிவசங்கருக்கு பாராட்டு விழா ஜெயராம் திருமண நிலையத்தில் நடந்தது.

புதுவை வணிகர்கள் கூட்டமைப்பு துணைத்தலைவர் கலியபெருமாள் தலைமை தாங்கினார். துணைத்தலைவர்கள் ராஜேந்திரன், பழனி அடைக்கலம், ராமலிங்கம் ஆகியோர் முன்னிலை வகித்தனர். பொதுச்செயலாளர் பாலு வரவேற்றார்.

முதல்-அமைச்சர் நாராயணசாமி அகில இந்திய வணிகர் சம்மேளனத்தின் துணைத்தலைவராக தேர்ந்தெடுக்கப்பட்டுள்ள சிவசங்கருக்கு பொன்னாடை அணிவித்து பாராட்டி பேசினார். அவர் பேசும்போது:-

புதுவை வியாபாரிகள் தாங்கள் சம்பாதிப்பதில் ஒரு பகுதியை அரசுக்கு வரியாக செலுத்துகிறார்கள். இதன்மூலம் அவர்கள் அரசின் ஒரு அங்கமாகவே செயல்படுகிறார்கள். புதுவை அரசு வணிகர்களுக்கு என்றும் உறுதுணையாக இருக்கும் என்று கூறினார்.

விழாவில் சபாநாயகர் வைத்திலிங்கம், துணை சபாநாயகர் சிவக்கொழுந்து, தெற்குமாநில தி.மு.க. அமைப்பாளர் சிவா எம்.எல்.ஏ., வடக்குமாநில அமைப்பாளர் சிவக்குமார், இந்திய கம்யூனிஸ்டு விசுவநாதன், அ.தி.மு.க. முன்னாள் எம்.எல்.ஏ. ஓம்சக்திசேகர், பா.ம.க. முன்னாள் எம்.பி. தன்ராஜ், விடுதலை சிறுத்தை கட்சி தேவபொழிலன், தமிழ்ச்சங்க தலைவர் முத்து, தமிழ்நாடு வணிகர் சங்கங்களின் பேரமைப்பு தலைவர் விக்கிரமராஜா ஆகியோர் வாழ்த்தி பேசினர்.

கூட்டமைப்பின் துணைத்தலைவர்கள் பாபு, அன்பழகன், சரவணன், கணேசன், ஆறுமுகம், அனில்குமார், கலீல் ரகுமான், சித்திக்ரகுமான் உள்பட பலர் கலந்து கொண்டனர். முடிவில் பொருளாளர் தங்கமணி நன்றி கூறினார்.  #narayanasamy #puducherrygovernment

புதுச்சேரி:

புதுவை மாநில அ.தி.மு.க. சட்டமன்ற கட்சித்தலைவர் அன்பழகன் நிருபர்களிடம் கூறியதாவது:-

புதுவை சட்டமன்றத்தின் மாண்புகளையும், மரியாதைகளையும், ஜனநாயக நடை முறைகளையும் போட்டி போட்டுக்கொண்டு ஆளும் காங்கிரஸ் அரசும், கவர்னரும் காலில் போட்டு மிதிக்கும் செயலில் ஈடுபட்டு வருகின்றனர்.

பட்ஜெட்டுக்கு அனுமதி பெறாமலேயே சட்டமன்ற கூட்டத்தொடரை கூட்டியது சட்டமன்ற நடைமுறைகளை கேள்விக்குறியாக்கியுள்ளது. இதற்காக காரணமின்றி சட்டமன்றத்தை காலவரையின்றி ஒத்திவைத்ததையும் அ.தி.மு.க. சார்பில் வன்மையாக கண்டிக்கிறோம்.

கவர்னர், முதல்-அமைச்சர் தொடர் மோதலால் புதுவை அரசின் நிர்வாகத்தை முடக்கம் செய்ய சதியாக இருக்குமோ? என்ற சந்தேகம் எழுகிறது. இது மக்கள் மத்தியில் அச்சத்தை ஏற்படுத்தியுள்ளது. சட்டசபையில் கவர்னர் மீதே ஆளும்கட்சி எம்.எல்.ஏ. ஒருவர் சட்டமன்றத்தை கவர்னர் முடக்கம் செய்வது பலிக்காது என பேசியுள்ளார்.

பட்ஜெட்டிற்கு அனுமதி கிடைக்காததற்கு தலைமை செயலாளரும், நிதி செயலாளரும் பொறுப்பேற்க வேண்டும். இதற்கு கவர்னர் விளக்கம் தர வேண்டும்.

புதுவை மாநிலத்தின் வரி சலுகையை பயன்படுத்தி சில வியாபாரிகள் மாநிலத்தை கடத்தல் மாநிலமாக மாற்றியுள்ளனர். மது, பெட்ரோல், டீசல், சிகரெட், தமிழகத்தில் தடை செய்யப்பட்ட போதை பொருட்களுக்கு குடோன் அமைத்து தமிழகத்திற்கு கடத்தி விற்பனை செய்து வருகின்றனர். இதனால் புதுவை கடத்தல் மாநிலமாக மாறியுள்ளது.

இதனால் புதுவை மக்களுக்கு எந்த நன்மையும் இல்லை. ஒவ்வொரு ஆட்சியிலும் அவர்களுக்கு வேண்டியவர்கள் இந்த கடத்தலில் ஈடுபடுகின்றனர். தற்போது மணல் பிரச்சினை பூதாகரமாக எழுந்துள்ளது. கடத்தி கொண்டுவரப்படும் மணலை அனுமதிக்கும் வகையில் அமைச்சர் சட்டமன்றத்தில் பேசினார். இது அமைச்சர் பதவிக்குரிய மாண்புக்கு குந்தகம் விளைவிக்கும் செயலாகும்.

மத்திய அரசின் சட்டப்படி மணலை குடோவுனில் வைத்திருப்பதும், ஒரு இடத்திலிருந்து மற்றொரு இடத்திற்கு கொண்டு செல்வதும் சட்டப்படி குற்றம். புதுவையில் உள்ள சட்டப்படியும் மணலை எடுத்து வருவது குற்றமாகும். அப்படியிருக்க தமிழகத்திலிருந்து கடத்தி கொண்டுவரும் மணலை அரசு அதிகாரிகள் சட்டப்படிதான் பிடிக்கின்றனர். இந்த பிரச்சினையை சட்டரீதியாக தீர்க்க அரசு முன்வர வேண்டும். ஆனால் கடத்தல்காரர்களுக்கு சாதகமாக செயல்படக் கூடாது.

புதுவை மணல் பிரச்சினையை தீர்க்க தமிழக அரசோடு சுமூக போக்கை கடைபிடிக்க வேண்டும். அதைவிடுத்து மோதல் போக்கை கடைபிடித்துக் கொண்டு சட்டசபையில் உண்மைக்கு மாறான தகவல்களை நாராயணசாமி தெரிவித்தார். அவர் தென்மாநில மாநாட்டில் பங்கேற்றபோது மணல் பிரச்சினை பற்றி தமிழக அமைச்சரோடு பேசியதாக கூறினார்.

அப்போது அவர் முதல்-அமைச்சராக இருந்தாரா? தமிழகத்தை உரிய முறையில் அணுகி மணல் பிரச்சினையை தீர்க்க வழி காண வேண்டும். வெளிநாட்டில் இருந்து மணல் இறக்குமதி செய்யப் போவதாக நாராயணசாமி கூறியுள்ளார். இதற்கு கவர்னர் அனுமதி தருவாரா? என்ற சந்தேகம் எழுகிறது. ஏனெனில் துறைமுகம் செயல்படவே கவர்னர் அனுமதிக்கவில்லை.

இவ்வாறு அவர் கூறினார்.