நீங்கள் தேடியது "மக்கள் கூட்டம்"

அபுஜா:

மேற்கு ஆப்பிரிக்க நாடுகளில் ஒன்றான நைஜீரியாவின் வடகிழக்கு பகுதியில் உள்ள கோம்பி மாகாணத்தில் சபோன்-லாயி என்ற இடத்தில் செயின்ட் பீட்டர் ஆங்கிலிகன் தேவாலயம் உள்ளது.

கடந்த ஞாயிறு மாலை ஈஸ்டர் பண்டிகை கொண்டாட்டத்தையொட்டி ஏராளமானவர்கள் இங்கு திரண்டிருந்தனர். சிறுவர்கள் உள்பட பலர் தேவாலயத்துக்கு வெளியே கூட்டமாக நின்று கொண்டிருந்தனர்.

அப்போது, போலீஸ் அதிகாரி ஒருவர் ஓட்டி வந்த கார் திடீரென அவரின் கட்டுப்பாட்டை இழந்து, தேவாலயம் முன் நின்றுகொண்டிருந்த மக்கள் கூட்டத்துக்குள் புகுந்தது. இதில் சாலையில் தூக்கி வீசப்பட்டும், கார் சக்கரத்தில் சிக்கியும் 9 பேர் சம்பவ இடத்திலேயே உயிர் இழந்தனர். 30-க்கும் மேற்பட்டோர் படுகாயம் அடைந்தனர்.

இதனால், கடும் ஆத்திரம் அடைந்த மக்கள் காரை ஓட்டி வந்த போலீஸ் அதிகாரியையும், அவருடன் இருந்த மற்றொரு போலீஸ்காரரையும் சரமாரியாக தாக்கினர். இதில் அவர்கள் இருவரும் சம்பவ இடத்திலேயே பலியாகினர்.   #Nigerian #BrutalAttack 

தூத்துக்குடி:

தூத்துக்குடி மாவட்டத்தில் நேற்று முன்தினம் பொங்கல் பண்டிகை கோலாகலமாக கொண்டாடப்பட்டது. மக்கள் அதிகாலையிலேயே வாசல்களில் வண்ணக் கோலமிட்டு புதுப்பானையில் பொங்கலிட்டு கொண்டாடினர்.

மேலும் பொங்கலுக்கு மறுநாள் தூத்துக்குடி உள்ளிட்ட தென் மாவட்டங்களில் மாட்டுப்பொங்கல் மற்றும் காணும் பொங்கல் விழா கொண்டாடப்பட்டு வருகிறது. அதன்படி நேற்று கிராமங்களில் பசு உள்ளிட்ட மாடுகளுக்கு பொங்கல் வைத்து வழிபாடு செய்தனர்.

காணும் பொங்கலையொட்டி மாவட்டம் முழுவதும் உள்ள முக்கிய கடற்கரை பகுதிகள், சுற்றுலா தலங்களுக்கு மக்கள் சென்று கொண்டாடுவது வழக்கம். அதன்படி தூத்துக்குடி ராஜாஜி பூங்கா, ரோச் பூங்கா, முத்துநகர் கடற்கரை பூங்கா, துறைமுக கடற்கரை பூங்கா பகுதிகளுக்கு மக்கள் சென்றனர். மக்கள் அந்த பகுதிகளில் அமர்ந்து மதிய உணவு சாப்பிட்டு விளையாடி மகிழ்ந்தனர்.

சிறுவர்கள் பட்டங்களை பறக்கவிட்டு விளையாடினர். கடற்கரை மற்றும் பூங்காக்களையொட்டி 100-க்கும் மேற்பட்ட தற்காலிக கடைகள் அமைக்கப்பட்டு இருந்தன. இந்த கடைகளில் தின்பண்டங்கள், சிறுவர்களுக்கு பிடித்தமான விளையாட்டு பொருட்கள் விற்பனை ஜோராக நடந்தது.

தூத்துக்குடி மாவட்டத்தில் காணும் பொங்கலையொட்டி மாவட்டம் முழுவதும் உள்ள முக்கிய கடற்கரை பகுதிகள், சுற்றுலா தலங்களுக்கு மக்கள் தங்கள் குடும்பங்களுடன் சென்று நேரத்தை செலவழிப்பது வழக்கம். காணும் பொங்கலை முன்னிட்டு தூத்துக்குடியில் முயல் தீவு மற்றும் தெர்மல் நகர் கடற்கரை பகுதிகளில் ஆயிரக்கணக்கான மக்கள் தங்கள் குடும்பத்துடன் குவிந்தனர்.

காணும் பொங்கலை முன்னிட்டு மாவட்டம் முழுவதிலும் இருக்கும் சுற்றுலா தலங்களில் மக்கள் கூட்டம் அதிக அளவில் இருக்கும் என்பதால், மாவட்ட போலீஸ் சூப்பிரண்டு முரளிரம்பா உத்தரவின் பேரில், 1,800-க்கும் மேற்பட்ட போலீசார் மாவட்டம் முழுவதிலும் உள்ள சுற்றுலா தலங்களில் பாதுகாப்பு பணியில் ஈடுபடுத்தப்பட்டு இருந்தனர்.

கூட்டம் அதிகமாக இருந்த இடங்களில் கண்காணிப்பு கேமராக்கள் மூலம் கண்காணிக்கப்பட்டது. குற்றங்களை தடுப்பதற்காக சாதாரண உடையிலும் போலீசார் வலம் வந்தனர்.

நெல்லை மாவட்டத்தில் உள்ள சுற்றுலா தலங்களான குற்றாலம், பாபநாசம், மணிமுத்தாறு ஆகிய இடங்களிலும் ஏராளமான மக்கள் காணும் பொங்கலை கொண்டாடினார்கள். இப்பகுதியில் உள்ள பூங்காக்களில் மக்கள் கூட்டம் அலைமோதியது.

களக்காடு தலையணையில் காணும் பொங்கல் கொண்டாட்டம் களை கட்டியது. இதையொட்டி நெல்லை, தூத்துக்குடி, நாகர்கோவில் மற்றும் வெளியூர்களில் இருந்தும் ஆயிரக்கணக்கான சுற்றுலா பயணிகள் குவிந்தனர். அவர்கள் குடும்பத்தினர்களுடன் பச்சையாற்றில் குளித்தனர்.

இந்தாண்டு புதியதாக அமைக்கப்பட்ட பூங்காவில் சிறுவர்கள் விளையாடினர். வனத்துறை சோதனை சாவடியில் சுற்றுலா பயணிகள் தடை செய்யப்பட்ட பிளாஸ்டிக் உள்பட பொருட்கள் கொண்டு வருகிறார்களா? என கடும் சோதனை நடத்தப்பட்டது. மேலும் தற்காலிக வாகனங்கள் நிறுத்துமிடம் அமைக்கப்பட்டிருந்தது. இந்தாண்டு முதல் முறையாக கழிவறை, குடிநீர் வசதி, உடை மாற்றும் அறைகள் உள்பட அடிப்படை வசதிகளும் செய்யப்பட்டிருந்தன.

களக்காடு புலிகள் காப்பக கள இயக்குனரும், தலைமை வன பாதுகாவலருமான அன்வர்தீன் உத்தரவின் பேரில் களக்காடு துணை இயக்குனர் ஆரோக்கியராஜ் சேவியர் ஆலோசனையின்படி வனசரகர்கள் புகழேந்தி, பாலாஜி முன்னிலையில் வனத்துறையினரும், களக்காடு போலீசாரும் பாதுகாப்பு பணியில் ஈடுபட்டனர்.

இதுபோல களக்காடு தேங்காய் உருளி அருவி, பச்சையாறு அணை பகுதிகளில் சுற்றுலா பயணிகள் கூட்டம், கூட்டமாக குவிந்திருந்தனர். #KaanumPongal

சென்னை:

பொங்கல் பண்டிகையையொட்டி அனைத்து குடும்ப அட்டைதாரர்களுக்கும் பொங்கல் பொருட்கள் தொகுப்புடன் ரூ.1000 ரொக்கப் பணமும் வழங்கப்படும் என்று அரசு அறிவித்தது. பொங்கல் பொருட்களுடன் ரூ.1000 வழங்குவது இதுவே முதல் முறையாகும்.

ரே‌ஷன் கடைகளில் அரிசி, சர்க்கரை பெறக் கூடியவர்கள் மட்டுமின்றி ‘என்’ கார்டு என்று சொல்லக்கூடிய எந்த பொருளும் வாங்காதவர்களுக்கும் பொங்கல் பரிசுடன் பணம் வழங்கப்படுகிறது.

ஒரு கிலோ பச்சரிசி, ஒரு கிலோ சர்க்கரை, 20 கிராம் முந்திரி, 20 கிராம் திராட்சை, 5 கிராம் ஏலக்காய், 2 அடி நீள கரும்புத் துண்டு ஆகியவை இன்று முதல் அனைத்து ரே‌ஷன் கடைகளிலும் வினியோகிக்கும் பணி தொடங்கியது.

ரொக்கமாக ரூ.1000 கொடுப்பதால் கூட்ட நெரிசல் ஏற்படும் என்பதால் நெரிசலை தவிர்க்க அதிகாரிகள் சிறப்பு ஏற்பாடுகளை செய்து உள்ளனர்.

இன்று (திங்கட்கிழமை) முதல் வருகிற 12-ந்தேதி வரை 6 நாட்களுக்கு பொங்கல் பரிசு பொருட்கள் வழங்கப்படுகிறது. அனைத்து ரே‌ஷன் கடைகளிலும் தினமும் 200 முதல் 300 ரே‌ஷன் கார்டுகளுக்கு மட்டும் பொங்கல் பரிசு வழங்க திட்டமிடப்பட்டுள்ளது.

எந்தெந்த கார்டுகளுக்கு எந்த நாளில் வழங்கப்படும் என்ற விவரம் ரே‌ஷன் கடைகளில் அறிவிக்கப்பட்டுள்ளது. கார்டுகள் அல்லது தெருக்கள் வாரியாகவும் நெரிசல் இல்லாமல் பொருட்கள் வழங்க ஏற்பாடு செய்யப்பட்டுள்ளது.

சென்னையில் 6 உதவி ஆணையர் அலுவலகம் வழியாக இந்த பணிகள் ஒருங்கிணைக்கப்பட்டுள்ளன.

ரே‌ஷன் கடைகளில் பொங்கல் பரிசு பொருட்களுடன் ரொக்கம் ரூ.1000 இன்று முதல் வழங்கப்படுவதால் காலையிலேயே கூட்டம் குவிந்தது. சென்னையில் சுமார் 10 ஆயிரத்திற்கும் மேற்பட்ட ரே‌ஷன் கடைகள் உள்ளன. காலை 8.30 மணி முதல் ரே‌ஷன் கடைகள் வழக்கமாக செயல்பட தொடங்கும். ரே‌ஷன் கடைகள் திறப்பதற்கு முன்னதாக 6 மணிக்கெல்லாம் மக்கள் கூட தொடங்கி விட்டனர்.

ரே‌ஷன் கடைகளுக்கு பொங்கல் பொருட்கள் நேற்று மாலையே வந்து சேர்ந்து விட்டன. கரும்புகளும் 2 அடி துண்டாக நறுக்கப்பட்டு அனைத்து கடைகளுக்கும் அனுப்பி வைக்கப்பட்டது. ரொக்க பணம் மட்டும் இன்று காலையில்தான் கடைகளுக்கு வழங்கப்பட்டது.

அதனால் பரிசு பொருட்கள் வழங்குவது தாமதமானது. ஒரு சில இடங்களில் வங்கியில் இருந்து பணம் காலையில் எடுத்து வந்த பிறகுதான் கொடுக்கப்பட்டது.

பொங்கல் பரிசு பொருட்களை குடும்ப தலைவர் அல்லது குடும்பத்தில் உள்ள உறுப்பினர்கள் தான் பெற முடியும். வீட்டில் வேலை செய்பவர்களோ, உறவினரோ, நண்பர்களோ பெற்று செல்ல முடியாது.

பரிசு பொருட்களை ஒவ்வொருவரும் 2 கையெழுத்திட்டு பெற வேண்டும். பொங்கல் பொருட்களை பெற்று கொண்டதாக ஒரு கையெழுத்தும் ரொக்கம் ரூ.1000 பெற்று கொண்டதாக மற்றொரு கையெழுத்தும் பெறப்பட்டன.


முதல் நாள் என்பதால் சில மணி நேரம் காத்திருந்து பொருட்களை பெற்று செல்லும் நிலை ஏற்பட்டது. நாளை முதல் காலை 8.30 மணிக்கே வினியோகம் தொடங்கி பகல் 12.30 மணிவரையிலும், பிற்பகல் 1.30 மணி முதல் மாலை 5.30 மணிவரை பெற்றுக்கொள்ள வசதியாக கடைகள் திறந்து இருக்கும் என்று அதிகாரி ஒருவர் தெரிவித்தார். #Pongalgift #Rationshops

பெரம்பலூர்:

தீபாவளி பண்டிகை நாளை மறுநாள் (செவ்வாய்க்கிழமை) கொண்டாடப்பட இருக்கிறது. இதையொட்டி பெரம்பலூர் மாவட்டத்தில் உள்ள பொதுமக்கள் புத்தாடைகளை வாங்குவதற்காகவும், இனிப்பு வகைகள், பட்டாசுகள் உள்ளிட்டவற்றை வாங்குவதற்காக பெரம்பலூர் கடைவீதி, போஸ்ட் ஆபீஸ்தெரு, சூப்பர் பஜார், பள்ளிவாசல் தெரு, பழைய பஸ்நிலையம், புதிய பஸ்நிலையம் உள்ளிட்ட பகுதிகளுக்கு வந்த வண்ணம் உள்ளனர். இதனால் அந்தப்பகுதியில் எப்போதும் மக்கள் கூட்டம் அலைமோதியபடி இருக்கிறது. இதனால் அந்தப்பகுதியில் போலீசார் பாதுகாப்பு பணியிலும், தீவிர ரோந்து பணியிலும் ஈடுபட்டு வருகின்றனர்.

பெரம்பலூர் புதிய பஸ் நிலையம் முதல் பழைய பஸ் நிலையம் வரையிலான சாலையில் திடீரென பட்டாசு கடைகள், இனிப்பு கடைகள் ஏராளமாக ஆரம்பிக்கப்பட்டு விற்பனை தொடங்கியுள்ளது. மேலும் ஜவுளிக்கடைகளிலும் புது ஆடை வாங்குவதற்காக கூட்டம் அலைமோதுகிறது.

பெரம்பலூர் கடைவீதி, போஸ்ட் ஆபீஸ் தெரு உள்ளிட்ட பகுதிகளில் தரைக் கடைகளாக ஜவுளிக்கடைகள் ஏராளமாக ஆரம்பிக்கப்பட்டுள்ளன. அங்கு வியாபாரிகள் ஆடைகளை கூவி, கூவி... விற்பனை செய்கின்றனர். அவர்களிடம் பொதுமக்கள் பேரம் பேசி ஆடைகளை வாங்கி சென்றதை காணமுடிந்தது. தீபாவளி பண்டிகைக்காக பள்ளி, கல்லூரிகளுக்கு தொடர் விடுமுறை விடப்பட்டதால் சிலர் குடும்பத்தினருடன் மகிழ்ச்சியோடு பொருட்களை வாங்கி செல்கின்றனர். வெளியூரில் இருந்து பெரம்பலூர் மாவட்டத்தில் தங்கியிருந்து வேலை செய்பவர்கள் தீபாவளிக்காக முன்னதாக விடுமுறை எடுத்து சொந்த ஊருக்கு செல்வதால் பெரம்பலூர் புதிய பஸ் நிலையத்திலும் வழக்கத்தை விட கூட்டம் அதிகமாக காணப்படுகிறது. பெரம்பலூரில் இருந்து சென்னை, திருச்சி, மதுரை உள்ளிட்ட பல்வேறு பகுதிகளுக்கு அரசு சார்பில் சிறப்பு பஸ்கள் இயக்கப்பட்டு வருகிறது.

இதே போல் அரியலூர் புதுமார்க்கெட் வீதி, எம்.பி.கோவில் தெரு, சின்னகடை தெரு, பெரியகடை தெரு உள்ளிட்ட முக்கிய கடைவீதிகளில் ஜவுளி எடுப்பதற்காகவும், தீபாவளிக்கு பொருட்கள் வாங்குவதற்காகவும் மக்கள் கூட்டம் அலைமோதிய வண்ணம் இருந்தது. மக்களின் கூட்டத்தை பயன்படுத்தி பெரம்பலூர் மற்றும் அரியலூர் மாவட்ட கடைவீதிகளில் திருட்டு உள்ளிட்ட குற்ற சம்பவங்களை தடுக்கும் பொருட்டு போலீசார் ஆங்காங்கே தீவிர கண்காணிப்பில் ஈடுபட்டு வருகின்றனர். மேலும் அங்கு பொருத்தப்பட்டுள்ள கண்காணிப்பு கேமராக்களின் பதிவுகளையும் கட்டுப்பாட்டு அறையில் இருந்து பார்வையிட்டு போலீசார் பாதுகாப்பை பலப்படுத்தி உள்ளனர். 

மாஸ்கோ:

ரஷிய நாட்டில் உலக கால்பந்து போட்டி நடப்பதால் உலகமெங்கும் இருந்து கால்பந்து ரசிகர்கள் அங்கு குவிந்து வருகின்றனர்.

இந்த நிலையில் தலைநகர் மாஸ்கோவில் நேற்று முன்தினம் செஞ்சதுக்க பகுதியில் மெக்சிகோ நாட்டை சேர்ந்த கால்பந்து ரசிகர்கள் உள்பட மக்கள் கூட்டம் அலைமோதியது.

அப்போது ஒரு கார் வேகமாக வந்து, மக்கள் கூட்டத்தில் மோதியது. இதனால் பெரும் பதற்றம் ஏற்பட்டது. மக்கள் நாலாபுறமும் அலறியடித்துக்கொண்டு ஓடினர். இருப்பினும் இந்த சம்பவத்தில் 7 பேர் படுகாயம் அடைந்தனர்.



இந்த சம்பவத்துக்கு காரணமான காரை ஓட்டி வந்தவர் கைது செய்யப்பட்டார். அவர் கிர்கிஸ்தான் நாட்டில் வழங்கப்பட்ட ஓட்டுனர் உரிமம் வைத்து இருந்தது தெரிய வந்தது.

சம்பவத்தை நேரில் கண்டவர்கள் கூறும்போது “மக்கள் கூட்டத்தில் மோதிய காரை மக்கள் மறித்து, அதை ஓட்டி வந்தவரை வெளியே இழுத்தனர். ஆனால் அவர் ஓடத் தொடங்கினார். இருப்பினும் சிலர் அவரை விரட்டிச்சென்று மடக்கிப் பிடித்தனர்” என்றனர்.

இந்த சம்பவத்தின்போது, அவர் மது அருந்தி இருந்ததாக தெரிய வந்துள்ளது. மேலும், மக்கள்கூட்டத்தில் மோத வேண்டும் என்ற நோக்கத்தில் மோதவில்லை என்று அவர் கூறி உள்ளார். இருப்பினும் அவரிடம் தீவிர விசாரணை நடத்தப்படுகிறது.

படுகாயம் அடைந்தவர் களுக்கு மருத்துவமனையில் சிகிச்சை அளிக்கப்படுகிறது. 

சென்னை:

சென்னை நேரு பூங்கா-சென்டிரல் மற்றும் சின்னமலை-ஏ.ஜி.டி.எம்.எஸ். இடையிலான மெட்ரோ ரெயில் போக்குவரத்தை 25-ந் தேதி முதல்-அமைச்சர் எடப்பாடி பழனிசாமி தொடங்கி வைத்தார். இந்த புதிய வழித்தட மெட்ரோ ரெயில் போக்குவரத்து குறித்து மக்களிடையே விழிப்புணர்வு ஏற்படுத்த 3 நாட்களுக்கு இலவச பயணத்துக்கு நிறுவனம் அனுமதித்தது.

இதனால் 25, 26-ந் தேதிகளில் ஏராளமான மக்கள் மெட்ரோ ரெயிலில் பயணம் செய்தனர். 3-வது நாளான நேற்று ஞாயிற்றுக்கிழமை விடுமுறை நாள் என்பதாலும், இலவச பயணத்தின் கடைசி நாள் என்பதாலும் மெட்ரோ ரெயில்களில் பயணம் செய்ய மக்கள் கூட்டம் அலைமோதியது. சிறுவர்-சிறுமிகள் குடும்பத்துடனும், இளைஞர்களும், இளம்பெண்களும் குழுக்களாகவும், குடும்பத்தினருடனும் அதிக அளவில் வந்து மெட்ரோ ரெயில் பயணத்தை மேற்கொண்டு குதூகலித்தனர்.



கூட்டம் அலைமோதிய போதிலும், மெட்ரோ ரெயில் நிறுவன ஊழியர்கள் மற்றும் போலீசார் கூட்டத்தை கட்டுப்படுத்தி மக்கள் எளிமையாக பயணம் மேற்கொள்ள வழி செய்தனர். மெட்ரோ ரெயில் நடைமேடைக்கு வரும் நேரத்தில், ஒலிபெருக்கி மூலமாகவும் மக்களை ஒழுங்குபடுத்தி நெரிசல் இல்லாமல் ரெயிலில் ஏறுவதற்கு ஏற்பாடு செய்தனர். இலவச பயணம் என்பதால், சிலர் ஒன்றுக்கும் மேற்பட்ட முறைகள் ரெயில்களில் பயணித்தனர்.



சென்டிரல்-பரங்கிமலை வழித்தடத்தில் 9 ரெயில்களும், சென்டிரல்-விமான நிலையம் வழித்தடத்தில் 5 ரெயில்களும், விமான நிலையம்-ஏ.ஜி.டி.எம்.எஸ். வழித்தடத்தில் 6 ரெயில்களும் என 20 ரெயில்கள் இயக்கப்படுகிறது. ஞாயிற்றுக்கிழமை தவிர மற்ற நாட்களில் காலை 8.30 மணி முதல் 10.30 மணி வரையும், மாலை 5.30 மணி முதல் இரவு 8.30 மணி வரையும் கூடுதலாக 5 ரெயில்கள் இயக்கப்படுவதாகவும், அந்த நேரத்தில் 4 நிமிடத்துக்கு ஒரு ரெயில் இயக்கப்படும் என்றும் மெட்ரோ ரெயில் அதிகாரி ஒருவர் தெரிவித்தார்.

முதல் நாளான 25-ந் தேதி 50 ஆயிரம் பேரும், நேற்று முன்தினம் 1 லட்சத்து 20 ஆயிரம் பேரும் பயணித்துள்ளனர். நேற்று பயணம் செய்தவர்களின் எண்ணிக்கை 1 லட்சத்து 50 ஆயிரத்தை தாண்டும் என்று எதிர்பார்க்கப்படுகிறது.

மெட்ரோ ரெயில் பயணம் குறித்து அரும்பாக்கத்தை சேர்ந்த இந்துஜா என்ற பிளஸ்-2 மாணவி கூறும்போது, ‘மெட்ரோ ரெயிலில் இலவசமாக பயணம் செய்யலாம் என்பதை ‘தினத்தந்தி’ பத்திரிகையில் காலையில் பார்த்ததுமே மெட்ரோ ரெயிலில் பயணம் செய்வது என முடிவு செய்தேன். மாலையில் எனது குடும்பத்துடன் அரும்பாக்கத்தில் இருந்து சென்டிரல் வரை மெட்ரோ ரெயில் பயணத்தை மேற்கொண்டேன். மிகவும் உற்சாகமாக உள்ளது. ரெயில் பெட்டியில் திருக்குறள் ஒட்டப்பட்டு இருப்பது பாராட்டுக்குரியது’ என்றார்.

ஈக்காட்டுத்தாங்கலை சேர்ந்த ஜாஸ்மின்-விஜி தம்பதி கூறும்போது, ‘விமான நிலையம், எழும்பூர், சென்டிரல் ரெயில் நிலையங்கள் செல்வதற்கும் மிகவும் வசதியாக உள்ளது. இன்னும் கொஞ்சம் கட்டணம் குறைவாக இருந்தால் நடுத்தர மக்களுக்கும் வசதியாக இருக்கும். மெட்ரோ ரெயிலுக்குள் செல்போன் டவர் கிடைக்கவில்லை. டவர் கிடைக்க வழிசெய்தால் இன்னும் நன்றாக இருக்கும்’ என்றனர்.