நீங்கள் தேடியது "வாலிபருக்கு பீர் பாட்டில் குத்து"

புதுச்சேரி:

புதுவை ரெட்டியார்பாளையம் சரவணன் நகரை சேர்ந்தவர் பிரபாகரன் (வயது26). சுமை தூக்கும் தொழிலாளி. இவர் நேற்று புதுவை சோனாம்பாளையத்தில் உள்ள ஒரு மதுக்கடையில் மதுகுடித்து கொண்டு இருந்தார். அப்போது அங்கு மதுகுடித்து கொண்டிருந்த வம்பாகீரப்பாளையத்தை சேர்ந்த மீனவர் ராஜேந்திரனுக்கும், பிரபாகரனுக்கும் வாய்த்தகராறு ஏற்பட்டது.

இதனால் ஆத்திரம் அடைந்த ராஜேந்திரன் தனது நண்பர்களுடன் சேர்ந்து பிரபாகரனை தாக்கினார். மேலும் ராஜேந்திரன் பீர் பாட்டிலை எடுத்து பிரபாகரனை குத்தினார். இதில் பிரபாகரனுக்கு தலையில் பலத்த காயம் ஏற்பட்டது. இதையடுத்து அவர் புதுவை அரசு ஆஸ்பத்திரியில் சிகிச்சை பெற்றார்.

பின்னர் இதுகுறித்து ஒதியஞ்சாலை போலீசில் புகார் செய்தார். போலீஸ் சப்-இன்ஸ்பெக்டர்கள் கீர்த்தி, நாராயணசாமி ஆகியோர் வழக்குபதிவு செய்து ராஜேந்திரன் மற்றும் அவரது நண்பர்களை தேடி வருகிறார்கள்.

பாகூர்:

பாகூர் அருகே குருவிநத்தம் சித்தேரியில் உள்ள ஒரு தனியார் மதுபான கடையில் மருதாடு கிராமத்தை சேர்ந்த மனநலம் பாதித்த 45 வயது பெண் துப்புரவு தொழிலாளியாக வேலைபார்த்து வருகிறார். நேற்று அந்த பெண் மதுக்கடையில் துப்புரவு பணியில் ஈடுபட்ட போது அங்கு மதுகுடித்து கொண்டு இருந்த குருவிநத்தம் கிராமத்தை சேர்ந்த அய்யப்பன் (வயது23), ரமேஷ்(25), மற்றும் சாவடியை சேர்ந்த பிரகாஷ் (28) ஆகியோர் அந்த பெண்ணிடம் தகராறு செய்தனர்.

அப்போது அந்த பெண்ணுக்கு ஆதரவாக நத்தப்பட்டு கிராமத்தை சேர்ந்த ராஜசேகர் (25) என்பவர் அந்த கும்பலிடம் தட்டிக்கேட்டார். இதில் ஆத்திரம் அடைந்த அய்யப்பன் உள்ளிட்ட 3 பேரும் சேர்ந்து ராஜசேகரை சரமாரியாக தாக்கினர். மேலும் அய்யப்பன் பீர் பாட்டிலை உடைத்து ராஜசேகரை குத்தினார்.

இதில் படுகாயம் அடைந்த ராஜசேகர் புதுவை அரசு ஆஸ்பத்திரியில் சேர்க்கப்பட்டார். இதுகுறித்த புகாரின் பேரில் பாகூர் போலீசார் வழக்குபதிவு செய்து அய்யப்பன் உள்ளிட்ட 3 பேரையும் தேடி வருகிறார்கள்.